നാല് പ്രിവന്റീവ് ഓഫീസർമാരുള്ളതിൽ ഒരാൾ വർക്കിംഗ് അറേഞ്ച്മെന്റിൽ മറ്റൊരിടത്തേക്ക് പോകും. 12 സിവിൽ എക്സൈസ് ഓഫീസർമാർ വേണ്ടിടത്ത് 10 പേരാണുള്ളത്. ഇതിൽ 3പേർ വർക്കിംഗ് അറേഞ്ച്മെന്റിൽ മറ്റിടങ്ങളിലാകും. പിന്നെയുള്ളത് ഒരു എക്സൈസ് ഇൻസ്‌പെക്ടറും 3 വനിത സിവിൽ എക്സൈസ് ഓഫീസറുമാണ്. ഇവർക്ക് വിവിധ കേസുകളുമായി ബന്ധപ്പെട്ട് ആറ്റിങ്ങൽ, വർക്കല, തിരുവനന്തപുരം കോടതികളിലേക്ക് പോകണം. പിന്നെ ലീവ്, പ്രതിവാര ഓഫ് എന്നിവ എല്ലാം കഴിയുമ്പോൾ രണ്ടോ മൂന്നോ പേർ മാത്രമാകും ഡ്യൂട്ടിയിലുണ്ടാവുക. കൂടാതെ വിമുതി മിഷന്റെ ഭാഗമായി സ്കൂൾ-കോളേജുകളിൽ ബോധവത്കരണ ക്യാമ്പുകൾ, ലഹരിക്കെതിരായ ബോധവത്കരണ കമ്മിറ്റികൾ എന്നിവയിലും പങ്കെടുക്കണം.
ചിറയിൻകീഴ് ഓവർബ്രിഡ്ജിൽ അപ്രോച്ച് റോഡിന്റെ നിർമാണപ്രവർത്തനങ്ങൾ പൂർണമാകാത്തതിനാൽ മഴപെയ്താൽ എക്സൈസ് ഓഫീസ് പരിസരം വെള്ളക്കെട്ടിലാകും. മുട്ടോളം വരുന്ന വെള്ളത്തിൽ ചവിട്ടി വേണം ജീവനക്കാർക്ക് ഓഫീസിലെത്താൻ. ഈ വെള്ളക്കെട്ട് മാറാൻ ദിവസങ്ങളെടുക്കും. വെള്ളക്കെട്ട് ഒഴിഞ്ഞാലും സ്റ്റേഷൻ പരിസരം ആഴ്ചകളോളം ചെളിക്കളമാണ്. ഈ സമയങ്ങളിൽ എക്സൈസ് ഓഫീസിനകത്തേക്ക് വാഹനങ്ങൾ കയറാൻ പാടുപെടും. സ്വന്തം ചെലവിലാണ് പലപ്പോഴും സ്റ്റേഷൻ പരിസരത്തെ ചെളി വൃത്തിയാക്കുന്നത്.
