പെരുങ്ങുഴിയിൽനിന്ന് ഈ റെയിൽവേ ഗേറ്റ് കടന്നുവേണം പെരുങ്ങുഴിക്കടവ്, നേരുകടവ്, ചല്ലിമുക്ക്, കുഴിയം, ഇടഞ്ഞുംമൂല, അഴൂർ തുടങ്ങിയ പ്രദേശങ്ങളിലേക്കു പോകാൻ. അതിനാൽ നൂറുകണക്കിന് സ്ഥലവാസികൾക്ക് ഗേറ്റ് കടക്കേണ്ടതുണ്ട്. കയർപിരി ചകിരിക്കായി പച്ചത്തൊണ്ട് കായലിൽ താഴ്ത്തുന്ന വട്ടങ്ങളിലേക്കുള്ള വാഹനങ്ങളും ഈ റോഡാണ് ഉപയോഗിക്കുന്നത്. തൊണ്ടും ചകിരിയും കയറ്റിയ വലിയ ലോറികളാണ് ഇതുവഴി കടന്നുപോകേണ്ടത്. തൊണ്ടടിക്കുന്ന മില്ലുകളും ഇവിടെയുണ്ട്. കയർ, മത്സ്യത്തൊഴിലാളികളും ധാരാളം വിദ്യാർഥികൾക്കും ഗേറ്റ് സമയനഷ്ടം വരുത്തുന്നു. ദീർഘസമയമാണ് ഇവരുടെ യാത്രയിൽ കവർന്നെടുക്കുന്നത്.
നാട്ടുകാരുടെ ന്യായമായ ആവശ്യമാണ് പെരുങ്ങുഴിയിൽ റെയിൽവേ അടിപ്പാത നിർമിക്കണമെന്നത്. ഈ ആവശ്യം അംഗീകരിക്കണമെന്ന് ആവശ്യപ്പെട്ട് ഗ്രാമപ്പഞ്ചായത്ത് പാസാക്കിയ പ്രമേയം മുഖ്യമന്ത്രി, ധനകാര്യമന്ത്രി, എംപി, എംഎൽഎ, റെയിൽവേ ഡിവിഷണൽ സീനിയർ ഫിനാൻസ് മാനേജർ എന്നിവർക്ക് നൽകിയിരിക്കുകയാണ്
