ലോകത്തിലെ ഏറ്റവും ഉയരം കൂടിയ റെയില്‍വേ ആര്‍ച്ച് ബ്രിഡ്ജ് ആയ ചെനാബ് റെയില്‍വേ പാലം കത്ര-സങ്കല്‍ദാന്‍ പാതയുടെ ഭാഗമാകും. നദീതടത്തില്‍ നിന്നും 359 മീറ്റര്‍ ഉയരത്തില്‍ സ്ഥിതി ചെയ്യുന്ന എന്‍ജിനീയറിങ് വിസ്മയമാണ് ചെനാബ് റെയില്‍വേ പാലം. ഇത് കശ്മീര്‍ താഴ്‌വരയെ റെയില്‍ വഴി ഇന്ത്യയുടെ മറ്റ് ഭൂപ്രദേശങ്ങളുമായി ബന്ധിപ്പിക്കും. ന്യൂഡല്‍ഹിയെ നേരിട്ട് കശ്മീരുമായി ബന്ധിപ്പിക്കുന്നതാണ് കത്ര-സങ്കല്‍ദാന്‍ പാത.
ഉദംപൂര്‍-ശ്രീനഗര്‍-ബാരാമുള്ള റെയില്‍ ലിങ്കിന്റെ ഭാഗമായ ഈ പദ്ധതി യാഥാര്‍ത്ഥ്യമാകാന്‍ അപകടം നിറഞ്ഞ ഭൂപ്രകൃതിയും ഭൂകമ്പ സാധ്യതയും കാരണം നിരവധി വെല്ലുവിളികള്‍ നേരിട്ടു. പദ്ധതി മേഖല അപകടം നിറഞ്ഞ പര്‍വ്വത പ്രദേശങ്ങളായതിനാല്‍ എന്‍ജിനീയറിങ് രംഗത്തും ലോജിസ്റ്റിക്കല്‍പരമായും ധാരാളം വെല്ലുവിളികളാണ് നേരിട്ടത്.
