കോഴിക്കോട് കൊയിലാണ്ടിയില്‍ മുളകു പൊടി വിതറി യുവാവിനെ കെട്ടിയിട്ട് പണം കവര്‍ന്ന സംഭവത്തില്‍ പരാതിക്കാരനും സുഹൃത്തും അറസ്റ്റില്‍. കണ്ണില്‍ മുളക് പൊടി വിതറി, കൈ കെട്ടിയിട്ട് പണം കവര്‍ന്നത് പ്രതികള്‍ നടത്തിയ നാടകമാണെന്ന് പൊലീസ് പറഞ്ഞു. പയ്യോളി സ്വദേശി സുഹൈല്‍, സുഹൃത്ത് താഹ എന്നിവരാണ് അറസ്റ്റിലായത്. താഹയില്‍ നിന്നും 37 ലക്ഷം രൂപ കണ്ടെത്തി. സുഹൃത്തായ താഹ പയ്യോളിയിലെ പള്ളി ജീവനക്കാരനാണ്.72,40,000 നഷ്ടപ്പെട്ടു എന്നായിരുന്നു എഫ്‌ഐആറില്‍ രേഖപ്പെടുത്തിയിരുന്നത്. എടിഎം കൗണ്ടറുകളില്‍ പണം നിറക്കാന്‍ പോകുന്നതിനിടെ കാട്ടിലപ്പീടികയില്‍ വെച്ച് കാറില്‍ വന്ന യുവാവിന്റെ കണ്ണില്‍ മുളകുപൊടി വിതറിയെന്നും ബന്ദിയാക്കിയെന്നും ശേഷം പണം കവര്‍ന്നെന്നുമായിരുന്നു പരാതി. സുഹൈലിനെ കാറില്‍ ബന്ദിയാക്കിയ നിലയിലും ശരീരമാകെ മുളകുപൊടി വിതറിയ നിലയിലുമാണ് കണ്ടെത്തിയത്.ആദ്യം നഷ്ടമായത് 25 ലക്ഷം രൂപ ആണെന്ന് പറഞ്ഞിരുന്നുവെങ്കിലും 72, 40, 000 രൂപ നഷ്ടപ്പെട്ടു എന്നാണ് എഫ്‌ഐആറില്‍ രേഖപ്പെടുത്തിയത്. യാത്രയ്ക്കിടെ പര്‍ദ്ദ ധരിച്ച രണ്ടുപേരില്‍ ഒരാള്‍ വണ്ടിയുടെ മുന്നിലേക്ക് വീണു എന്നും വാഹനം നിര്‍ത്തിയപ്പോള്‍ മറ്റൊരു സ്ത്രീ ആക്രമിക്കുകയായിരുന്നു എന്നുമായിരുന്നു സുഹൈല്‍ നല്‍കിയ മൊഴി. എന്നാല്‍ യുവാവിന്റെ മൊഴിയില്‍ വൈരുദ്ധ്യം ഉണ്ടായിരുന്നു. തുടര്‍ന്ന് നടത്തിയ അന്വേഷണത്തിലാണ് പരാതിക്കരനും സുഹൃത്തും അറസ്റ്റിലാകുന്നത്.
