ജി.സ്റ്റീഫൻ എം.എൽഎ ചെയര്‍മാനും ജില്ലാ പ്ലാനിംഗ് ഓഫീസർ വി.എസ്. ബിജു കണ്‍വീനറും മണ്ഡലത്തിലെ ജനപ്രതിനിധികൾ, ഉദ്യോഗസ്ഥർ , രാഷ്ട്രീയ സാംസ്കാരിക രംഗത്തെ പ്രമുഖർ എന്നിവർ അംഗങ്ങളുമായി 1500 പേരുടെ വിപുലമായ സംഘാടകസമിതിയാണ് രൂപീകരിച്ചത് . ഇതിനു പുറമെ പരിപാടിയുടെ സുഗമമായ നടത്തിപ്പിന് 11 സബ് കമ്മിറ്റികൾക്കും രൂപം നൽകി. ഡിസംബര്‍ 22ന് പതിനൊന്ന് മണിയ്ക്കാണ് അരുവിക്കര മണ്ഡലത്തിലെ നവകേരള സദസ്. അന്നേദിവസം മണ്ഡലത്തിലെ പ്രമുഖര്‍ പങ്കെടുക്കുന്ന പ്രഭാതസദസ് കാട്ടാക്കടയില്‍ നടക്കും. കാട്ടാക്കട, അരുവിക്കര, പാറശാല, നെയ്യാറ്റിന്‍കര മണ്ഡലങ്ങളിലെ പ്രഭാത സദസാണ് കാട്ടാക്കടയില്‍ സംഘടിപ്പിച്ചിരിക്കുന്നത്. ജി സ്റ്റീഫൻ എം.എൽ.എ അധ്യക്ഷനായ ചടങ്ങില്‍ ത്രിതല പഞ്ചായത്തംഗങ്ങള്‍, ജില്ലാ കളക്ടർ ജെറോമിക് ജോർജ് , അബ്കാരി ക്ഷേമ ബോർഡ് ചെയർമാൻ കെ.എസ്.സുനിൽകുമാർ, തഹസീൽദാർ നന്ദകുമാർ, ബി.ഡി.ഓ ജീവൻ.എസ്, മറ്റ് ഉദ്യോഗസ്ഥര്‍, രാഷ്ട്രീയ സാംസ്കാരിക രംഗത്തെ പ്രമുഖര്‍ എന്നിവരും സംബന്ധിച്ചു.
*പഞ്ചായത്ത്തല സംഘാടക സമിതി*
നവകേരള സദസിന്റെ വിജയത്തിനായി മണ്ഡലത്തിലെ എട്ട് ഗ്രാമപഞ്ചായത്തുകളിലും സംഘാടക സമിതി രൂപീകരിക്കും. ഒക്ടോബർ 19 ന് ഉഴമലക്കൽ, 20 ന് കുറ്റിച്ചൽ, 21 ന് ആര്യനാട്, അരുവിക്കര, 25 ന് വിതുര, 27 ന് തൊളിക്കോട്, 28 ന് പൂവച്ചൽ , 30 ന് വെള്ളനാട് ഗ്രാമപഞ്ചായത്തുകളിലാണ് സംഘാടക സമിതി രൂപീകരണം നിശ്ചയിച്ചിരിക്കുന്നത്.
