▪️ഇടതുപക്ഷത്തിന്റെ ജനസമ്പര്‍ക്ക പരിപാടി തെരഞ്ഞെടുപ്പ് മാത്രം മുന്നില്‍ കണ്ടുള്ള രാഷ്ട്രീയതട്ടിപ്പാണെന്ന് കെപിസിസി പ്രസിഡന്റ് കെ സുധാകരന്‍ എംപി. മുന്‍മുഖ്യമന്ത്രി ഉമ്മന്‍ ചാണ്ടി നടത്തിയ ജനസമ്പര്‍ക്ക പരിപാടിയെ ആക്ഷേപിക്കുകയും അതില്‍ പങ്കെടുക്കാനെത്തിയവരെ കായികമായി ആക്രമിക്കുകയും ചെയ്ത സിപിഎം ഇപ്പോള്‍ അതേ പരിപാടിയെന്ന പേരിലാണ്ഇപ്പോള്‍ രംഗത്തുവരുന്നതെന്നും സുധാകരന്‍ പറഞ്ഞു.
▪️കരുവന്നൂര്‍ ബാങ്ക് തട്ടിപ്പിനെ പരസ്യമായി ന്യായീകരിച്ച് സിപിഎം സംസ്ഥാന സെക്രട്ടറി എംവി ഗോവിന്ദന്‍ സ്വയം പരിഹാസ്യനാവുകയാണെന്ന് ബിജെപി സംസ്ഥാന അദ്ധ്യക്ഷന്‍ കെ.സുരേന്ദ്രന്‍. മര്‍ദ്ദനവും ഇരവാദവുമെല്ലാം സിപിഎമ്മിന്റെ തിരക്കഥയുടെ ഭാഗമാണെന്നും സുരേന്ദ്രന്‍ പറഞ്ഞു.
▪️അന്തവും കുന്തവും തിരിയാത്ത ഒരു സാധനമാണ് ഇപ്പോഴത്തെ ആരോഗ്യ മന്ത്രിയെന്ന അധിക്ഷേ പരാമര്‍ശവുമായി മുസ്ലിം ലീഗ് നേതാവ് കെ എം ഷാജി. നിപ എന്ന് കേള്‍ക്കുമ്പോള്‍ വവ്വാലിനെയും ദുരന്തം എന്ന് കേള്‍ക്കുമ്പോള്‍ മുഖ്യമന്ത്രിയേയുമാണ് ഓര്‍മ്മ വരുന്നതെന്നും ഷാജി കൂട്ടിച്ചേര്‍ത്തു. അതേസമയം ഷാജി നടത്തിയ പരാമര്‍ശം അപലപനീയമാണെന്നും നിരുപാധികം പിന്‍വലിച്ച് മാപ്പുപറയണമെന്നും സിപിഎം നേതാവ് പികെ ശ്രീമതി ടീച്ചര്‍ പറഞ്ഞു.
▪️മന്ത്രി വീണാ ജോര്‍ജിനെതിരെ അധിക്ഷേപ പരാമര്‍ശം നടത്തിയ മുസ്ലീം ലീഗ് നേതാവ് കെഎം ഷാജി കേരള രാഷ്ട്രീയത്തിലെ മാലിന്യമാണെന്ന് ഡിവൈഎഫ്‌ഐ. സ്ത്രീകള്‍ ഉന്നത പദവികള്‍ വഹിക്കുന്നതും, രാഷ്ട്രീയവും ഭരണപരവുമായ നേതൃത്വത്തിലേക്ക് വരുന്നതും അംഗീകരിക്കാന്‍ കഴിയാത്ത മാനസികാവസ്ഥയുള്ള വ്യക്തിയാണ് ഷാജിയെന്നും ഇത്തരത്തിലുള്ളവരെ നിലക്കുനിര്‍ത്തുവാന്‍ മുസ്ലീം ലീഗ് തയ്യാറാവണമെന്നും ഡിവൈഎഫ്‌ഐ സംസ്ഥാന സെക്രട്ടറിയേറ്റ് ആവശ്യപ്പെട്ടു.
▪️മാത്യു കുഴല്‍നാടനെതിരായ വിജിലന്‍സ് കേസ് വിജിലന്‍സ് കോട്ടയം റേഞ്ച് എസ് പി വിനോദ് കുമാറിന്റെ നേതൃത്വത്തില്‍ അന്വേഷിക്കും. ഇടുക്കി ജില്ലയിലെ ചിന്നക്കനാലില്‍ ഭൂമിയും കെട്ടിടവും വാങ്ങിയതിലെ ക്രമക്കേട് അന്വേഷിക്കാനാണ് വിജിലന്‍സിന് അനുമതി നല്‍കിയത്. മുഖ്യമന്ത്രിക്കും മകള്‍ക്കുമെതിരായ മാസപ്പടി തട്ടിപ്പ് ശക്തമായി ഉന്നയിച്ചതിന് പിന്നാലെയായിരുന്നു മാത്യു കുഴല്‍നാടനെതിരെ സിപിഎം ഭൂമി ക്രമക്കേട് എന്ന ആരോപണം ഉയര്‍ത്തിയത്.
▪️മാത്യു കുഴല്‍നാടനെതിരെ വിജിലന്‍സ് അന്വേഷണം പ്രഖ്യാപിച്ച മുഖ്യമന്ത്രി പിണറായി വിജയന്‍ വെറും അല്‍പനാണെന്ന് വീണ്ടും തെളിയിച്ചിരിക്കുകയാണെന്ന് കെപിസിസി അധ്യക്ഷന്‍ കെ സുധാകരന്‍. മാത്യു കുഴല്‍നാടന്റെ മടിയില്‍ കനമില്ലെന്നും അതുകൊണ്ട് തന്നെ പിണറായി വിജയന്റെ പിപ്പിടിവിദ്യ കണ്ട് തളരില്ലെന്നും 'പ്രത്യേക ഏക്ഷന്‍' മാത്യു കുഴല്‍നാടനോട് വേണ്ടെന്നും സുധാകരന്‍ പറഞ്ഞു.
▪️കേരളത്തില്‍ നിപ്പ നിയന്ത്രണ വിധേയമെന്നും ആശങ്കയുടെ നാളുകള്‍ കഴിഞ്ഞുവെന്നും കേന്ദ്ര ആരോഗ്യ സഹമന്ത്രി ഭാരതി പവാര്‍. സംസ്ഥാനവും കേന്ദ്രവും സഹകരിച്ചാണ് മുന്നോട്ട് പോകുന്നതെന്നും പരിശോധനകള്‍ ഉള്‍പ്പെടെയുള്ള പ്രവര്‍ത്തനങ്ങള്‍ തുടരുന്നുണ്ടെന്നും മന്ത്രി കൂട്ടിച്ചേര്‍ത്തു.
▪️കോണ്‍ഗ്രസ് എംഎല്‍എമാരുമായി ഖാര്‍ഗെ നടത്തിയ കൂടിക്കാഴ്ചയില്‍ ഭൂരിപക്ഷംപേരും പ്രതിപക്ഷ സ്ഥാനത്തേക്ക് പിന്തുണച്ചത് രമേശ് ചെന്നിത്തലയെ ആയിരുന്നുവെന്ന വെളിപ്പെടുത്തലുമായി ഉമ്മന്‍ചാണ്ടിയുടെ ആത്മകഥ കാലം സാക്ഷി. എന്നാല്‍, ഹൈക്കമാന്‍ഡിന്റെ മനോഗതം വേറെയായിരുന്നുവെന്നും അതനുസരിച്ചാണ് വി.ഡി.സതീശന് നറുക്കുവീണതെന്നും 'കാലം സാക്ഷി'യില്‍ പറയുന്നു.
▪️രണ്ടാം വന്ദേഭാരതിന് മലപ്പുറം തിരൂരില്‍ സ്റ്റോപ് അനുവദിച്ചതായി റെയില്‍വേ അറിയിച്ചെന്ന് ഇ ടി മുഹമ്മദ് ബഷീര്‍ എംപി. ആദ്യ വന്ദേ ഭാരതിനും തിരൂരില്‍ സ്റ്റോപിനായുള്ള ശ്രമം തുടരുമെന്നും ഇടി മുഹമ്മദ് ബഷീര്‍ പറഞ്ഞു.
▪️മന്ത്രി കെ രാധാകൃഷ്ണനെതിരായ അയിത്ത വിവാദത്തില്‍ കേസെടുക്കണമെന്ന് ആവശ്യപ്പെട്ട് ഡിജിപിക്ക് പരാതി. സിവില്‍ റൈറ്റ്‌സ് ആന്‍ഡ് സോഷ്യല്‍ ജസ്റ്റിസ് സൊസൈറ്റിയാണ് പരാതി നല്‍കിയത്. പട്ടികജാതി പട്ടിക വര്‍ഗ അതിക്രമം തടയല്‍ നിയമപ്രകാരം കേസ് എടുക്കണമെന്നും പരാതിയില്‍ പറയുന്നു. സംസ്ഥാന പൊലീസ് മേധാവി ഷേയ്ഖ് ദര്‍വേഷ് സാഹിബിനും പയ്യന്നൂര്‍ പൊലീസ് സ്റ്റേഷന്‍ എസ്എച്ച്ഒയ്ക്കുമാണ് പരാതി നല്‍കിയിരിക്കുന്നത്.
▪️കായംകുളത്തെ കെഎസ്ആര്‍ടിസി സ്റ്റാന്‍ഡിലെ കാന്റീന്‍ അടച്ചുപൂട്ടാന്‍ നോട്ടീസ്. കായംകുളം നഗരസഭ ആരോഗ്യ വിഭാഗമാണ് ശുചിത്വം പാലിക്കാത്തതിനെ തുടര്‍ന്ന് നോട്ടീസ് നല്‍കിയത്. ശുചിത്വം പാലിക്കുന്നില്ലെന്ന നിരന്തരമായ പരാതിയുടെ അടിസ്ഥാനത്തില്‍ ആരോഗ്യ വിഭാഗം ജീവനക്കാര്‍ കാന്റീനില്‍ പരിശോധന നടത്തുകയായിരുന്നു.
▪️പാലക്കാട് കാഞ്ഞിരപ്പുഴ ഡാമിന് മുകള്‍ഭാഗത്തെ പാലക്കയം പാണ്ടന്‍മലയില്‍ ഉരുള്‍പൊട്ടി കടകളിലും വീടുകളിലും വെള്ളം കയറി. പാലക്കയം ഭാഗങ്ങളില്‍ വലിയ വെള്ളക്കെട്ട് രൂപപ്പെട്ടിരിക്കുകയാണ്. പുഴയിലെ ജലനിരപ്പും ഉയര്‍ന്നിട്ടുണ്ട്. മണ്ണാര്‍ക്കാട് കാഞ്ഞിരപ്പുഴ ഡാമിന്റെ വൃഷ്ടിപ്രദേശത്ത് മഴ കനത്തതോടെ ഡാമിന്റെ 3 ഷട്ടറുകളും 20 സെന്റീമീറ്റര്‍ വീതം ഉയര്‍ത്തിയിരിക്കുകയാണ്.
▪️ജനതാദള്‍ സെക്യുലര്‍ പാര്‍ട്ടി എന്‍ഡിഎയില്‍ ചേര്‍ന്നു. പാര്‍ട്ടിയെ മുന്നണിയിലേക്ക് പൂര്‍ണ മനസോടെ സ്വാഗതം ചെയ്തെന്ന് ബിജെപി ദേശീയ അധ്യക്ഷന്‍ ജെപി നദ്ദ. ഇന്നലെ ദില്ലിയിലെത്തിയ എച്ച്ഡി കുമാരസ്വാമി കേന്ദ്ര ആഭ്യന്തര മന്ത്രി അമിത് ഷാ, ബിജെപി ദേശീയ അധ്യക്ഷന്‍ ജെപി നദ്ദ എന്നിവരുമായി കൂടിക്കാഴ്ച നടത്തിയിരുന്നു. അതേസമയം പാര്‍ട്ടി ദേശീയ നേതൃത്വത്തിന്റെ തീരുമാനത്തിനൊപ്പമല്ലെന്ന് ജെഡിഎസ് കേരളാ ഘടകം നിലപാടറിയിച്ചു. വിഷയം ചര്‍ച്ച ചെയ്യാന്‍ ഒക്ടോബര്‍ ഏഴിന് സംസ്ഥാന കമ്മിറ്റി ചേരുമെന്ന് മാത്യു ടി തോമസ് അറിയിച്ചു.
▪️കാവേരി നദീ ജല തര്‍ക്കത്തില്‍ കര്‍ണാടകയില്‍ പ്രതിഷേധം ശക്തമാകുന്നു. കഴിഞ്ഞ രണ്ടാഴ്ചയായി മണ്ഡ്യയില്‍ അനിശ്ചിതകാല സമരം തുടരുന്ന കാവേരി ഹിതരക്ഷണ സമിതി ഇന്ന് മണ്ഡ്യയില്‍ ബന്ദിന് ആഹ്വാനം ചെയ്തു.
▪️തമിഴ്നാട്ടിലെ എഐഎഡിഎംകെ - ബിജെപി തര്‍ക്കത്തില്‍ പ്രശ്നപരിഹാരത്തിനായി ദില്ലിയിലെത്തിയ മുതിര്‍ന്ന എഐഎഡിഎംകെ നേതാക്കളുടെ സംഘം അമിത് ഷായെയും ജെ പി നദ്ദയെയും കണ്ടേക്കും. അണ്ണാദുരൈയെ അധിക്ഷേപിച്ചത് അംഗീകരിക്കില്ലെന്നും അഞ്ച് സീറ്റില്‍ കൂടുതല്‍ ബിജെപിക്ക് നല്‍കില്ലെന്നുമാണ് എഐഎഡിഎംകെ നിലപാട്. അതേസമയം തമിഴ്നാട്ടില്‍ കുറഞ്ഞത് 15 സീറ്റെങ്കിലും വേണമെന്നാണ് ബിജെപിയുടെ ആവശ്യം.
▪️ബിജെപി എംപി രമേഷ് ബിധുരി ലോക്സഭയില്‍ തനിക്കെതിരെ നടത്തിയ വര്‍ഗീയ പരാമര്‍ശം തന്നെ അസ്വസ്ഥനാക്കിയെന്ന് ബിഎസ്പി എംപി കുന്‍വാര്‍ ഡാനിഷ് അലി. തല പൊട്ടിച്ചിതറുന്നതു പോലെ തോന്നിയെന്നും കഴിഞ്ഞ രാത്രിയില്‍ തനിക്ക് ഉറങ്ങാന്‍ കഴിഞ്ഞില്ലെന്നും ഡാനിഷ് അലി പറഞ്ഞു. തന്റെ അനുഭവം ഇതാണെങ്കില്‍ ഇന്ത്യയിലെ സാധാരണക്കാരുടെ അനുഭവം എന്തായിരിക്കുമെന്നും തിരഞ്ഞെടുക്കപ്പെട്ട എംപി അദ്ദേഹത്തിന്റെ സമുദായത്തിന്റെ പേരില്‍ ആക്രമിക്കപ്പെടുന്നത് രാജ്യത്തിനാകെ നാണക്കേടാണെന്നും രരമേഷ് ബിദുരിക്കെതിരെ അദ്ദേഹത്തിന്റെ പാര്‍ട്ടി നടപടിയെടുക്കുമോ അതോ പ്രോത്സാഹിപ്പിക്കുമോയെന്ന് നോക്കാമെന്നും അദ്ദേഹം കൂട്ടിച്ചേര്‍ത്തു.
▪️ബിഎസ്പി എംപി ഡാനിഷ് അലിക്കെതിരെയുള്ള വിദ്വേഷ പരാമര്‍ശത്തില്‍ ബിജെപി എം.പി രമേഷ് ബിദുരിക്കെതിരെ കാരണം കാണിക്കല്‍ നോട്ടീസ് നല്‍കി ബിജെപി. ഡാനിഷ് അലിയെ ഭീകരവാദിയെന്നും മുല്ല എന്നുമാണ് എംപി വിളിച്ചത്. സഭയിലെ ചര്‍ച്ചയ്ക്കിടെയായിരുന്നു ബിദുരിയുടെ പരാമര്‍ശം.
▪️വര്‍ഗീയ അധിക്ഷേപം നേരിട്ട ബി.എസ്.പി എംപി ഡാനിഷ് അലിയെ സന്ദര്‍ശിച്ച് കോണ്‍ഗ്രസ് നേതാവ് രാഹുല്‍ ഗാന്ധി. തനിക്ക് മനോവീര്യം നല്‍കാനും പിന്തുണ നല്‍കാനുമാണ് രാഹുല്‍ ഇവിടെ വന്നതെന്നും നിങ്ങള്‍ തനിച്ചല്ലെന്നും ജനാധിപത്യത്തിനൊപ്പം നില്‍ക്കുന്ന എല്ലാവരും നിങ്ങളുടെ കൂടെ ഉണ്ടെന്നും രാഹുല്‍ പറഞ്ഞതായി ഡാനിഷ് അലി വ്യക്തമാക്കി.
▪️അംബേദ്കര്‍ പട്ടിക ജാതിക്കാരനാണെന്നും അദ്ദേഹത്തെ ഭരണഘടനശില്പി എന്ന് വിഷേപ്പിക്കുന്നവര്‍ക്ക് വട്ടാണെന്നും വിഎച്ച്പി നേതാവ് ആര്‍ബിവിഎസ് മണിയന്‍. വിഎച്ച്പി മുന്‍ തമിഴ്നാട് വൈസ് പ്രസിഡന്റായ ആര്‍ബിവിഎസ് മണിയന്റെ പരാമര്‍ശം വലിയ രീതിയില്‍ വിമര്‍ശനത്തിന് ഇടയാക്കി. ഇതോടെ അധിക്ഷേപ പരാമര്‍ശത്തില്‍ മാപ്പ് പറയാന്‍ തയ്യാറാക്കിയിരിക്കുകയാണ് ആര്‍ബിവിഎസ് മണിയന്‍.
▪️അരുണാചല്‍ പ്രദേശില്‍ നിന്നുള്ള താരങ്ങള്‍ക്ക് ചൈന പ്രവേശനം വിലക്കിയ സാഹചര്യത്തില്‍ കേന്ദ്ര മന്ത്രി അനുരാഗ് ഠാക്കൂറിന്റെ ചൈന സന്ദര്‍ശനം റദ്ദാക്കി. ചൈനയുടെ നടപടി ഏഷ്യന്‍ ഗെയിംസ് നടത്തിപ്പ് നിയമങ്ങളുടെ ലംഘനമാണെന്ന് ഇന്ത്യയുടെ വിദേശകാര്യ മന്ത്രാലയം പ്രതികരിച്ചു.
▪️ഓസ്‌ട്രേലിയയ്‌ക്കെതിരായ ഏകദിന പരമ്പരയിലെ ആദ്യ മത്സരത്തില്‍ ഇന്ത്യയ്ക്ക് അഞ്ചു വിക്കറ്റ് വിജയം. ഓസ്‌ട്രേലിയ ഉയര്‍ത്തിയ 277 റണ്‍സ് വിജയലക്ഷ്യം ഇന്ത്യ 48.4 ഓവറില്‍ അഞ്ചുവിക്കറ്റ് നഷ്ടത്തില്‍ മറികടന്നു. 74 റണ്‍സെടുത്ത ശുഭ്മാന്‍ ഗില്ലും 71 റണ്‍സെടുത്ത റിതുരാജ് ഗെയ്ക്കവാദും ചേര്‍ന്നെടുത്ത 142 റണ്‍സിന്റെ ഓപ്പണിംഗ് കൂട്ടുകെട്ടാണ് ഇന്ത്യന്‍ വിജയത്തിന് അടിത്തറയേകിയത്. ഇതോടെ മൂന്ന് മത്സരങ്ങളടങ്ങിയ പരമ്പരയില്‍ ഇന്ത്യ 1-0 ന് മുന്നിലെത്തി..
▪️2023 ക്രിക്കറ്റ് ലോകകപ്പ് വിജയിക്ക് 33 കോടി രൂപ ലഭിക്കും. സമ്മാനത്തുക പ്രഖ്യാപിച്ച് അന്താരാഷ്ട്ര ക്രിക്കറ്റ് സംഘടനയായ ഐ.സി.സി. റണ്ണേഴ്സ് അപ്പാകുന്ന ടീമിന് ഏകദേശം 16 കോടി രൂപ ലഭിക്കും. ആകെ 84 കോടി രൂപയാണ് സമ്മാനത്തുകയായി നല്‍കുന്നത്.
▪️ഇന്ത്യയെ എമെര്‍ജിംഗ് മാര്‍ക്കറ്റ് ഡെബ്റ്റ് ഇന്‍ഡക്‌സില്‍ ഉള്‍പ്പെടുത്താനൊരുങ്ങി ജെപി മോര്‍ഗന്‍. ലോകത്തിലെ പ്രമുഖ ധനകാര്യ സ്ഥാപനങ്ങളിലൊന്നായ ജെപി മോര്‍ഗന്‍, ഇന്ത്യയുടെ പ്രാദേശിക ബോണ്ടുകള്‍ കമ്പനിയുടെ ഗവണ്‍മെന്റ് ബോണ്ട് ഇന്‍ഡക്‌സ്-എമര്‍ജിംഗ് മാര്‍ക്കറ്റ്സ് സൂചികയിലും അതിന്റെ അനുബന്ധ സൂചിക സ്യൂട്ടിലും ഉള്‍പ്പെടുത്തുമെന്ന് കഴിഞ്ഞ ദിവസം പ്രഖ്യാപിച്ചിരുന്നു. ലോകമെമ്പാടും സ്വീകാര്യമായ സൂചികളില്‍ ഒന്നാണ് ഇത്. ഈ സൂചികയില്‍ ഉള്‍പ്പെടുത്തുന്നതിനുള്ള പ്രക്രിയ 2024 ജൂണ്‍ 28 മുതല്‍ ആരംഭിക്കും, ഇത് പത്ത് മാസത്തോളം നീണ്ടുനില്‍ക്കും. ജെപി മോര്‍ഗന്‍ അറിയിച്ചത് പ്രകാരം പരമാവധി വിഹിതമായ 10 ശതമാനത്തില്‍ എത്തുന്നതുവരെ ഇന്ത്യയുടെ സൂചിക വെയ്റ്റിംഗില്‍ 1 ശതമാനം വര്‍ദ്ധനവ് കൂടി ഇതില്‍ ഉള്‍പ്പെടും. ലോകത്തെ അഞ്ചാമത്തെ വലിയ സമ്പദ്വ്യവസ്ഥയ്ക്ക് സുപ്രധാനമായ ഉത്തേജനമായി ഗണ്യമായ വിദേശ നിക്ഷേപം ആകര്‍ഷിക്കാന്‍ ഈ നീക്കത്തിലൂടെ സാധിക്കുമെന്ന് പ്രതീക്ഷിക്കുന്നു.
▪️രാഘവ ലോറന്‍സ് പ്രധാന കഥാപാത്രമായെത്തുന്ന 'ചന്ദ്രമുഖി 2' വിന്റെ കേരളത്തിലെ വിതരണാവകാശം സ്വന്തമാക്കി ഗോകുലം മൂവീസ്. പൊന്നിയിന്‍ സെല്‍വനു ശേഷം ലൈക്ക പ്രൊഡക്ഷന്‍സം ഗോകുലം മൂവീസും ഒന്നിക്കുന്ന ചിത്രം കൂടിയാണ് ചന്ദ്രമുഖി 2. 18 വര്‍ഷങ്ങള്‍ക്ക് മുന്‍പ് രജനികാന്തിനെയും നയന്‍താരയെയും പ്രധാന കഥാപാത്രങ്ങളാക്കി ബോക്സ് ഓഫീസില്‍ ചരിത്രം സൃഷ്ടിച്ച സിനിമയായിരുന്നു ചന്ദ്രമുഖി. രാഘവ ലോറന്‍സിനൊപ്പം കങ്കണ റണാവത്താണ് സിനിമയില്‍ പ്രധാന വേഷത്തിലെത്തുന്നത്. വടിവേലു, രാധിക ശരത്കുമാര്‍, ലക്ഷ്മി മേനോന്‍, മഹിമ നമ്പ്യാര്‍ സൃഷ്ടി എന്നിവരാണ് ലൈക്ക പ്രൊഡക്ഷന്‍സ് നിര്‍മ്മിക്കുന്ന സിനിമയിലെ മറ്റ് പ്രധാന താരങ്ങള്‍. ലൈക്ക പ്രൊഡക്ഷന്‍സുമായി ഗോകുലം മൂവീസ് സഹകരിക്കുന്ന ആറാമത് ചിത്രമായിരിക്കും ചന്ദ്രമുഖി 2. സെപ്റ്റംബര്‍ 28 നാണ് ചിത്രം തീയേറ്ററുകളിലെത്തുന്നത്. ഡ്രീം ബിഗ് ഫിലിംസ് ആണ് ഗോകുലം മൂവീസിന്റെ വിതരണ പങ്കാളികള്‍.
▪️നടന്‍ ശങ്കര്‍ വീണ്ടും സംവിധായകന്റെ കുപ്പായമണിയുന്നു. ശങ്കര്‍ തന്നെ തിരക്കഥയും എഴുതിയിരിക്കുന്ന ചിത്രത്തിന്റെ പേര് 'എറിക്' എന്നാണ്. ഹൊറര്‍ വിഭാഗത്തില്‍ പെടുന്ന ചിത്രമാണിത്. മലയാള ചലച്ചിത്ര നിര്‍മ്മാണ രംഗത്ത് അരങ്ങേറ്റം കുറിക്കുന്ന ക്യൂ സിനിമാസിന്റെ ആദ്യ ചിത്രമാണ് എറിക്. ക്യൂ സിനിമാസിന്റെ ലോഗോയും എറിക്കിന്റെ ടൈറ്റിലും പ്രശസ്ത നടനും നിര്‍മ്മാതാവുമായ വിജയ് ബാബു പ്രകാശനം ചെയ്തു. തെന്നിന്ത്യന്‍ താരം ഗീതിക തിവാരി, ഹേമന്ത് മേനോന്‍, പ്രേം പ്രവീണ്‍, മനു കുരിശിങ്കല്‍, കിരണ്‍ പ്രതാപ്, ആഷ് തുടങ്ങിയവരാണ് പ്രധാന കഥാപാത്രങ്ങളെ അവതരിപ്പിക്കുന്നത്. ഭൂരിഭാഗവും യുകെയില്‍ ചിത്രീകരിക്കുന്ന എറിക് എന്ന ചിത്രത്തിന്റെ ആദ്യഘട്ടം എറണാകുളത്ത് ആരംഭിച്ചു.
▪️റോയല്‍ എന്‍ഫീല്‍ഡ് ഹിമാലയന്‍ 450 നവംബര്‍ 1, 2023-ന് നിരത്തിലെത്തും. ഈ അഡ്വഞ്ചര്‍ ബൈക്കില്‍ പുതിയ 451.65 സിസി ലിക്വിഡ്-കൂള്‍ഡ് എഞ്ചിന്‍ ഉണ്ടായിരിക്കും, പരമാവധി 40പിഎസ് പവര്‍ ഔട്ട്പുട്ട്, ടോര്‍ക്ക് ഏകദേശം 40-45എന്‍എം ആയിരിക്കും. ഹിമാലയന്‍ 450 ന് 394 കിലോഗ്രാം ഭാരവും 210 കിലോഗ്രാം കെര്‍ബ് ഭാരവുമുണ്ട്, 180 കിലോഗ്രാം ലോഡിംഗ് ശേഷിയുണ്ട്. 1510 എംഎം നീളമുള്ള വീല്‍ബേസ് ഇതിനുണ്ട്. പൂര്‍ണമായും ഡിജിറ്റല്‍ ഇന്‍സ്ട്രുമെന്റ് ക്ലസ്റ്റര്‍, ബ്ലൂടൂത്ത് നാവിഗേഷന്‍, റൗണ്ട് ഹെഡ്‌ലൈറ്റ്, ഓള്‍-എല്‍ഇഡി ലൈറ്റിംഗ്, ഡ്യുവല്‍ എല്‍ഇഡി ഇന്‍ഡിക്കേറ്ററുകള്‍, ബ്രേക്ക് സിഗ്നലുകള്‍, ട്രിപ്പിള്‍-ഇന്‍-വണ്‍ ടെയ്‌ലാമ്പ് എന്നിവ ഹിമാലയന്‍ 450-ന്റെ പ്രധാന സവിശേഷതകളാണ്. വിലയുടെ കാര്യത്തില്‍, റോയല്‍ എന്‍ഫീല്‍ഡ് ഹിമാലയന്‍ 450 ന് ഏകദേശം 2.8 ലക്ഷം രൂപ എക്സ്-ഷോറൂം വില പ്രതീക്ഷിക്കുന്നു.
▪️പ്രശസ്ത തെലുങ്ക് സാഹിത്യക്കാരന്‍ സി ആര്‍ ശര്‍മ്മയുടെ ബാലകഥകളുടെ വിവര്‍ത്തനം നിര്‍വഹിച്ചിരിക്കുന്നത് കൃതഹസ്തനായ മഹാകവി അക്കിത്തം. ഈ വിവര്‍ത്തന കൃതി കുഞ്ഞുമനസ്സുകളിലേയ്ക്ക് ഒരു വലിയ ലോകം തുറന്നിടുന്നു. 'ധനഗുപ്തനെന്ന കച്ചവടക്കാരന്റെ അത്യാര്‍ത്തി'. അക്കിത്തം അചുതന്‍ നമ്പൂതിരി. ഹരിതം ബുക്സ്. വില 114 രൂപ.
▪️ഇന്നത്തെക്കാലത്ത് മിക്കവരെയും അലട്ടുന്ന ഒരു പ്രശ്‌നമാണ് എല്ലുകളുടെ വേദന. എന്നാല്‍ സ്ഥിരമായ വേദന മറ്റ് പല മാരക രോഗങ്ങളുടെയും ലക്ഷണങ്ങളാകാം. അതിലൊന്നാണ് എല്ലുകളെ ബാധിക്കുന്ന ബോണ്‍ കാന്‍സര്‍. തുടര്‍ച്ചയായ വേദനയും ഇതിനു ശേഷം ഉണ്ടാകുന്ന നീര്‍ക്കെട്ടും എല്ലുകളിലെ അര്‍ബുദത്തിന്റെ പ്രധാന ലക്ഷണമാണ്. ഈ വേദന രാത്രിയില്‍ കഠിനമാകുകയും ഉറക്കത്തെ ബാധിക്കുകയും ചെയ്യും. എല്ലുകളുടെ അര്‍ബുദവുമായി ബന്ധപ്പെട്ട് പൊതുവായി കാണപ്പെടുന്ന മറ്റൊരു ലക്ഷണമാണ് പനി. സ്വാഭാവിക ചലനങ്ങളെ പോലും ബാധിക്കുന്ന തരത്തില്‍ സന്ധികള്‍ക്കുണ്ടാകുന്ന പിരിമുറുക്കം ബോണ്‍ കാന്‍സറിന്റെ ലക്ഷണമാണ്. നടക്കാനോ ദൈനംദിന കാര്യങ്ങള്‍ ചെയ്യാനോ കഴിയാത്ത വിധം ഈ സന്ധിവേദനയും പിരിമുറുക്കവും രോഗിയെ ബുദ്ധിമുട്ടിക്കും. ഈ ലക്ഷണവും അവഗണിക്കാതെ കൃത്യസമയത്ത് ചികിത്സ തേടണം. വിശദീകരിക്കാനാകാത്ത പെട്ടെന്നുള്ള ഭാരനഷ്ടവും ബോണ്‍ കാന്‍സറിന്റെ മറ്റൊരു ലക്ഷണമാണ്. ഇത് ശ്രദ്ധയില്‍പ്പെട്ടാല്‍ ഉടനെ വൈദ്യസഹായം തേടേണ്ടതാണ്. എപ്പോഴും ക്ഷീണം തോന്നുന്നത് ബോണ്‍ കാന്‍സറിന്റെ മാത്രമല്ല മറ്റ് പല രോഗങ്ങളുടെയും ലക്ഷണമാകാം. എല്ലുകള്‍ക്ക് പുറത്തോ അകത്തോ കാണപ്പെടുന്ന മുഴകളും അര്‍ബുദത്തിന്റെ ലക്ഷണമാണ്. അര്‍ബുദം മൂലമല്ലാത്ത മുഴകളും എല്ലില്‍ വരാമെന്നതിനാല്‍ കൃത്യമായ പരിശോധന രോഗനിര്‍ണയത്തിന് ആവശ്യമാണ്. രാത്രി കാലങ്ങളില്‍ അമിതമായി വിയര്‍ക്കുന്നത് ഗുരുതരമായ പല രോഗങ്ങളുടെയും സൂചനയാകാം. ബോണ്‍ കാന്‍സറിന്റെ സാധ്യതയും തള്ളിക്കളയാന്‍ സാധിക്കില്ല എന്നതിനാല്‍ വിശദമായ ആരോഗ്യ പരിശോധന ആവശ്യമാണ്.
