◾വനിതാ സംവരണ ബില്‍ രാജ്യസഭയിലും പാസായി. രാജ്യസഭയില്‍ 215 പേര്‍ ബില്ലിനെ പിന്തുണച്ചു. ആരും എതിര്‍ത്തില്ല. എല്ലാ രാഷ്ട്രീയ പാര്‍ട്ടികളും ബില്ലിനെ പിന്തുണച്ചത് സ്ത്രീശാക്തീകരണത്തിന് ഊര്‍ജ്ജമാണെന്ന് പ്രധാനമന്ത്രി നരേന്ദ്രമോദി പറഞ്ഞു. രാജ്യത്തിന് പുതിയ ദിശാബോധം നല്‍കുന്ന ബില്ലാണെന്നും അദ്ദേഹം പറഞ്ഞു.
◾നിയോജക മണ്ഡലം തലത്തിലുള്ള ജനസദസും കേരളീയം' പരിപാടിയും ബഹിഷ്‌ക്കരിക്കുമെന്നു യുഡിഎഫ്. എല്‍ഡിഎഫ് പരിപാടി സര്‍ക്കാര്‍ ചെലവില്‍ നടത്തുന്നത് അംഗീകരിക്കാനാവില്ലെന്നു പ്രതിപക്ഷനേതാവ് വി.ഡി. സതീശന്‍. നവംബര്‍ ഒന്നു മുതല്‍ തിരുവനന്തപുരത്താണു കേരളീയം പരിപാടി. നവംബറിലും ഡിസംബറിലുമായി എംഎല്‍എമാരുടെ നേതൃത്വത്തില്‍ ജനസദസ് നടത്താനാണു സര്‍ക്കാരിന്റെ തീരുമാനം. നെല്‍കര്‍ഷകര്‍ക്കുള്ള പണം നല്‍കാതെ രാഷ്ട്രീയ പ്രചാരണത്തിനായി ഖജനാവില്‍നിന്ന് വന്‍തുക ചെലവാക്കുന്നതു ശരിയല്ലെന്ന് പ്രതിപക്ഷനേതാവ് വി.ഡി. സതീശന്‍ വിമര്‍ശിച്ചു. പ്രതിപക്ഷവുമായി ഒരു ചര്‍ച്ചയും നടത്തിയില്ലെന്നും സതീശന്‍ പറഞ്ഞു.
◾സത്യജിത് റായ് ഫിലിം ആന്‍ഡ് ടെലിവിഷന്‍ ഇന്‍സ്റ്റിറ്റ്യൂട്ട് പ്രസിഡന്റായി സുരേഷ് ഗോപിയെ നിയമിച്ചു. മൂന്നു വര്‍ഷത്തേക്കാണ് നിയമനം. സുരേഷ് ഗോപിയെ ഇന്‍സ്റ്റിറ്റ്യൂട്ട് ഗവേണിംഗ് കൗണ്‍സില്‍ അധ്യക്ഷനായും കേന്ദ്ര സര്‍ക്കാര്‍ നിയമിച്ചു.
◾കനത്ത മഴ തുടരും. തോരാമഴയില്‍ മണ്ണിടിഞ്ഞതിനാല്‍ ഈരാറ്റുപേട്ട- വാഗമണ്‍ റൂട്ടില്‍ വാഹന ഗതാഗതം തടസപ്പെട്ടു. മലയോര മേഖലയിലേക്കുള്ള യാത്രകള്‍ ഒഴിവാക്കണമെന്നു കോട്ടയം ജില്ലാ കളക്ടര്‍. മീനച്ചിലാറില്‍ ജലനിരപ്പ് ഉയര്‍ന്നു. അടുത്ത നാലു ദിവസം ശക്തമായ മഴക്ക് സാധ്യത. ചക്രവാതചുഴിയും ന്യുനമര്‍ദ്ദവും മൂലമാണ് മഴ സാധ്യത ശക്തമാകുന്നത്. ഇന്ന് മലപ്പുറം, കണ്ണൂര്‍ ജില്ലകളില്‍ യെല്ലോ അലെര്‍ട്ട്.
◾പുതിയ നിപ കേസുകള്‍ ഇല്ലെന്ന് മന്ത്രി വീണാ ജോര്‍ജ്. ഇന്നലെ ലഭിച്ച 27 പരിശോധന ഫലങ്ങളും നെഗറ്റീവാണ്. സ്വകാര്യ ആശുപത്രിയില്‍ ചികിത്സയിലുള്ള ഒന്‍പത് വയസുകാരന്റെ ആരോഗ്യനില മെച്ചപ്പെട്ടു. ചികിത്സയിലുള്ള മറ്റുള്ളവരുടേയും നില തൃപ്തികരമാണ്.
◾മുഖ്യമന്ത്രിയുടെയും കുടുംബാംഗങ്ങളുടെയും അഴിമതി ചൂണ്ടിക്കാട്ടിയതിനാണ് മാത്യു കുഴല്‍നാടന്‍ എംഎല്‍എക്കെതിരെ വിജിലന്‍സ് അന്വേഷണത്തിന് സര്‍ക്കാര്‍ ഉത്തരവിട്ടതെന്ന് പ്രതിപക്ഷ നേതാവ് വി ഡി സതീശന്‍. രാഷ്ട്രീയ എതിരാളികള്‍ക്കെതിരെ അന്വേഷണ ഏജന്‍സികളെ ഉപയോഗിക്കുകയാണ്. കെപിസിസി അധ്യക്ഷന്‍ കെ സുധാകരനെയും തന്നെയും കള്ളക്കേസില്‍ കുടുക്കിയതിനു പിന്നാലെയാണ് മാത്യുവിനെതിരെ തിരിഞ്ഞിരിക്കുന്നത്. സതീശന്‍ പറഞ്ഞു.
◾മുഖ്യമന്ത്രി പിണറായി വിജയന്റെ മകള്‍ വീണ വിജയന് കരിമണല്‍ കമ്പനി ഭിക്ഷയായി നല്‍കിയതാണോ മാസപ്പടി പണമെന്ന് മാത്യു കുഴല്‍നാടന്‍. മാസപ്പടി ഡയറിയിലെ പിവി എന്ന ചുരുക്കപ്പേര് പിണറായി വിജയന് തന്നെയാണെന്നും മാത്യു കുഴല്‍നാടന്‍ ആരോപിച്ചു. ഏത് അന്വേഷണവുമായി സഹകരിക്കുമെന്നും അദ്ദേഹം കൂട്ടിച്ചേര്‍ത്തു.
◾അട്ടപ്പാടി മധു കൊലക്കേസില്‍ അഡ്വ. കെ.പി സതീശനെ സ്പെഷ്യല്‍ പബ്ളിക് പ്രോസിക്യൂട്ടറായി നിയമിച്ചതിനെതിരെ മധുവിന്റെ അമ്മ മല്ലിയമ്മ ഇന്ന് ഹൈക്കോടതി ചീഫ് ജസ്റ്റിസിന് സങ്കട ഹര്‍ജി നല്‍കും. തങ്ങള്‍ നല്‍കിയ മൂന്നു പേരുടെ പട്ടികയില്‍ ഇല്ലാത്തയാളെ നിയമിച്ചതു ദുരൂഹമാണെന്നു മല്ലിയമ്മ പറഞ്ഞു.
◾കേരള പാഠ്യപദ്ധതിയുടെ കരട് ചട്ടക്കൂട് മന്ത്രി വി ശിവന്‍കുട്ടി പുറത്തിറക്കി. വിദ്യാര്‍ത്ഥികള്‍ക്കുള്ള പാഠപുസ്തകങ്ങള്‍ക്കൊപ്പം അധ്യാപകര്‍ക്കും രക്ഷിതാക്കള്‍ക്കുമുള്ള പുസ്തകങ്ങളും തയ്യാറാക്കുമെന്ന് മന്ത്രി അറിയിച്ചു. 2007 ലെ കേരളാ പാഠ്യപദ്ധതി ചട്ടക്കൂടിന് പിന്നാലെ പരിഷ്‌കരിച്ച പാഠപുസ്തകങ്ങളില്‍ 2013ല്‍ ചില മാറ്റങ്ങള്‍ ഉണ്ടായെങ്കിലും കഴിഞ്ഞ 10 വര്‍ഷത്തിനു ശേഷം പാഠ്യപദ്ധതി പരിഷ്‌കരിക്കുന്നത് ഇപ്പോഴാണ്.
◾തിരുവനന്തപുരം മെഡിക്കല്‍ കോളേജ് ആശുപത്രിയില്‍ രോഗികള്‍ക്കുള്ള പാലും ബ്രെഡും വിതരണം നിര്‍ത്തി. 15 ലക്ഷം രൂപ കുടിശ്ശികയായതോടെയാണ് മില്‍മ പാല്‍ വിതരണം നിര്‍ത്തിയത്. പ്രതിഷേധവുമായി കോണ്‍ഗ്രസ് പ്രവര്‍ത്തകര്‍ രോഗികള്‍ക്കു പാലും ബ്രെഡും വിതരണം ചെയ്തു.
◾വയനാട് കമ്പളക്കാടുനിന്ന് കാണാതായ അമ്മയെയും അഞ്ചു മക്കളെയും ഗുരുവായൂരില്‍ ക്ഷേത്രത്തിന്റെ പടിഞ്ഞാറെ നടയില്‍ കണ്ടെത്തി. ഭര്‍തൃസഹോദരി അടക്കം വീട്ടിലുള്ളവരുടെ ദ്രോഹം സഹിക്കാനാകാതെ വീടുവിട്ടതാണെന്നാണു യുവതി പറയുന്നത്. 18 നാണ് യുവതിയും അഞ്ച് മക്കളും കമ്പളക്കാട്ടെ വീട്ടില്‍നിന്ന് സ്വന്തം വീട്ടിലേക്കാണെന്നു പറഞ്ഞ് ഇറങ്ങിപ്പോയത്.
◾പൊതുമേഖലാ ബാങ്കുകളില്‍ കേരളത്തിലെ സഹകരണ ബാങ്കുകളിലേതിനേക്കാള്‍ വലിയ ക്രമക്കേടുകള്‍ നടന്നിട്ടുണ്ടെന്നു മന്ത്രി എംബി രാജേഷ്. കേരളത്തിലെ സഹകരണ മേഖലയെ തകര്‍ക്കാനാണ് കേന്ദ്രസര്‍ക്കാരിന്റെ നീക്കം. നോട്ട് നിരോധനത്തിനു പിറകേ തുടങ്ങിയ ശ്രമമാണിത്. കരുവന്നൂര്‍ ബാങ്ക് തട്ടിപ്പ് കേസില്‍ പ്രതികരിക്കുകയായിരുന്നു മന്ത്രി.
◾തിരുവനന്തപുരം മെഡിക്കല്‍ കോളജില്‍ രോഗികള്‍ക്കു പാല്‍ വാങ്ങാന്‍പോലും കഴിയാത്ത ഗുരുതര സാമ്പത്തിക പ്രതിസന്ധിയുള്ളപ്പോഴാണ് മുഖ്യമന്ത്രിക്കു സഞ്ചരിക്കാന്‍ പ്രതിമാസം 80 ലക്ഷം രൂപ വാടക നല്കി ഹെലികോപ്റ്റര്‍ വാടകയ്‌ക്കെടുത്തതെന്ന് കെപിസിസി പ്രസിഡന്റ് കെ സുധാകരന്‍ എംപി. ഡല്‍ഹി കേരള ഹൗസില്‍ ജീവനക്കാര്‍ പോക്കറ്റില്‍നിന്ന് 20,000 രൂപ മുടക്കിയാണ് പാല്‍ വാങ്ങുന്നത്. വലിയ സുരക്ഷാസംവിധാനമൊരുക്കി സെക്രട്ടേറിയറ്റിനെ രാവണന്‍കോട്ടയാക്കിയിരിക്കുകയാണ്. സുധാകരന്‍ കുറ്റപ്പെടുത്തി.
◾താമരശേരി ഫോറസ്റ്റ് റെയ്ഞ്ച് ഓഫീസ് ആക്രമിച്ച കേസില്‍ കൂറുമാറിയ വനം വകുപ്പ് ഉദ്യോസ്ഥര്‍ക്കെതിരെ വകുപ്പുതല നടപടി സ്വീകരിക്കുമെന്ന് മന്ത്രി എകെ ശശീന്ദ്രന്‍. ഡെപ്യൂട്ടി റെയ്ഞ്ച് ഓഫീസര്‍ എ.കെ.രാജീവന്‍, ബീറ്റ് ഫോറസ്റ്റ് ഓഫീസര്‍മാരായ ബി.കെ പ്രവീണ്‍കുമാര്‍, വി.പി സുരേന്ദ്രന്‍, എം. സുബ്രഹ്‌മണ്യന്‍ എന്നിവരാണു കൂറുമാറിയത്.
◾എയര്‍ ഇന്ത്യ എക്സ്പ്രസിന്റെ കൊച്ചി- ദോഹ വിമാനം സാങ്കേതിക തകരാര്‍മൂലം വൈകി.
◾ഇന്നു ശ്രീനാരായണ ഗുരു സമാധിദിനം. എസ്എന്‍ഡിപി യോഗത്തിന്റെ നേതൃത്വത്തില്‍ വിവിധ പ്രദേശങ്ങളില്‍ അനുസ്മരണ പരിപാടികള്‍.
◾പുല്‍പ്പള്ളിയില്‍ ഒന്നര മാസം മുമ്പു കാണാതായ മധ്യവയസ്‌കന്റെ മൃതദേഹം ജീര്‍ണിച്ച നിലയില്‍ കുറ്റിക്കാട്ടില്‍ കണ്ടെത്തി. പുല്‍പ്പള്ളി മണ്ഡപമൂല അശോകവിലാസത്തില്‍ രത്‌നാകരന്റെ മൃതദേഹമാണ് സീതാദേവി ക്ഷേത്രഭൂമിയില്‍ കണ്ടെത്തിയത്. വിഷക്കുപ്പിയും കണ്ടെടുത്തിട്ടുണ്ട്.
◾തൃശൂര്‍ ചിറക്കേക്കോട് മകനെയും ചെറുമകനെയും തീ കൊളുത്തി കൊന്നശേഷം വിഷം കഴിച്ച അച്ഛന്‍ മരിച്ചു. കൊട്ടേക്കാടന്‍ ജോണ്‍സന്‍ (67) ആണ് മരിച്ചത്.
◾ആന്ധ്രയില്‍നിന്ന് കാറില്‍ 60 കിലോ കഞ്ചാവുമായി വന്ന യുവാക്കളെയും വാങ്ങാനെത്തിയവരേയും എക്സൈസ് പിടികൂടി. നെടുമങ്ങാട് ചുള്ളിമാനൂര്‍ സ്വദേശി ജെസിം, ബീമാപള്ളി സ്വദേശി സജീര്‍ എന്നിവരെയും വാങ്ങാന്‍ എത്തിയ ബീമാപള്ളി സ്വദേശി മുജീബ്, റാഫി എന്നിവരെയുമാണ് പിടികൂടിയത്.
◾വര്‍ക്കലയില്‍ അമ്മക്കൊപ്പം സ്‌കൂട്ടിയില്‍ സഞ്ചരിച്ച പത്തു വയസുകാരന്‍ ബസിടിച്ച് മരിച്ചു. ഡ്രൈവര്‍ ഇടവ വെണ്‍കുളം വയല്‍ത്തൊടിവീട്ടില്‍ മഹേഷിനെ (23) അറസ്റ്റു ചെയ്തു.
◾മുത്തലാഖ് ബില്ലിനുശേഷം എല്ലാ മുസ്ലീം സ്ത്രീകളുടെയും പിന്തുണ ബിജെപിക്കുണ്ടെന്ന് മുസ്ലീം ലീഗ് നേതാവ് പിവി അബ്ദുല്‍ വഹാബ് എംപി. രാജ്യസഭയില്‍ വനിതാ സംവരണ ബില്ലില്‍ സംസാരിക്കുകയായിരുന്നു അദ്ദേഹം. മുസ്ലീങ്ങളെ വെറും ന്യൂനപക്ഷങ്ങളായി കാണരുതെന്നും അദ്ദേഹം പറഞ്ഞു.
◾ദേവസ്വം മന്ത്രി കെ രാധാകൃഷ്ണന് ക്ഷേത്രത്തില്‍ 'അയിത്തം' അനുഭവിക്കേണ്ടിവന്നെന്ന് രാജ്യസഭയില്‍ അവതരിപ്പിച്ച് മുസ്ലിം ലീഗ് എം പി അബ്ദുള്‍ വഹാബ്. ജാതി വ്യവസ്ഥ ഇക്കാലത്തും ശക്തമാണെന്നതു സങ്കടകരമാണെന്ന് അദ്ദേഹം ചൂണ്ടികാട്ടി.
◾ലോക്സഭയിലും നിയമസഭകളിലും 33 ശതമാനം വനിതാ സംവരണം ഏര്‍പ്പെടുത്തി പാര്‍ലമെന്റ് പാസാക്കിയ നിയമം അടുത്ത ലോക്സഭാ തെരഞ്ഞെടുപ്പോടെ നടപ്പാക്കണമെന്ന് കോണ്‍ഗ്രസ് അധ്യക്ഷന്‍ മല്ലികാര്‍ജുന ഖര്‍ഗെ. നിയമം നടപ്പാക്കുന്നത് 2029 വരെ നീട്ടരുതെന്ന് അദ്ദേഹം ആവശ്യപ്പെട്ടു.
◾റെയില്‍വെ സ്റ്റേഷനില്‍ പോര്‍ട്ടറുടെ വേഷം ധരിച്ച് തലയില്‍ പെട്ടി ചുമന്നു നടക്കുന്ന കോണ്‍ഗ്രസ് എംപി രാഹുല്‍ ഗാന്ധിയുടെ ദൃശ്യം സോഷ്യല്‍ മീഡിയയില്‍ വൈറലായി. ചുവന്ന ഷര്‍ട്ട് ധരിച്ച് ഡല്‍ഹിയിലെ ആനന്ദ് വിഹാര്‍ റെയില്‍വെ സ്റ്റേഷനിലാണ് രാഹുല്‍ പെട്ടി ചുമന്നത്. റെയില്‍വേ സ്റ്റേഷനിലെ പോര്‍ട്ടര്‍മാരുമായി കൂടിക്കാഴ്ച നടത്താനാണ് രാഹുല്‍ ഗാന്ധി എത്തിയത്. അവര്‍ നല്‍കിയ ചുവന്ന ഷര്‍ട്ടു ധരിച്ച് പെട്ടി തലയില്‍ ചുമന്ന് രാഹുല്‍ അവര്‍ക്കൊപ്പം നടക്കുകയായിരുന്നു.
◾കാനഡയില്‍ ഖലിസ്ഥാന്‍ വാദി നേതാവ് ഹര്‍ദീപ് സിംഗ് നിജ്ജാര്‍ കൊല്ലപ്പെട്ട സംഭവത്തില്‍ തെളിവു നല്‍കാന്‍ ജസ്റ്റിന്‍ ട്രൂഡോ ഭരണകൂടം തയ്യാറായില്ലെന്ന് ഇന്ത്യന്‍ വിദേശകാര്യ മന്ത്രാലയം. തെളിവ് നല്‍കിയാല്‍ പരിശോധിക്കുമെന്നാണ് ഇന്ത്യയുടെ നിലപാട്. കാനഡയില്‍ ഇന്ത്യയുടെ നയതന്ത്ര പ്രതിനിധികള്‍ക്ക് ഭീഷണിയുണ്ട്. ഇന്ത്യയിലെ നയതന്ത്ര പ്രതിനിധികളുടെ എണ്ണം കുറയ്ക്കാന്‍ ഇന്ത്യ കാനഡയോട് ആവശ്യപ്പെട്ടെന്ന് വിദേശകാര്യ വക്താവ് അരിന്ദം ബാഗ്ചി വാര്‍ത്താ സമ്മേളനത്തില്‍ പറഞ്ഞു.
◾വൃന്ദ കാരാട്ട് സിപിഎം പൊളിറ്റ് ബ്യൂറോയിലെത്താന്‍ എത്ര കാലമെടുത്തെന്ന് കേന്ദ്രമന്ത്രി നിര്‍മ്മല സീതാരാമന്‍. ആര്‍എസ്എസിലെ വനിതാ പ്രാതിനിധ്യത്തെ ചോദ്യം ചെയ്യാന്‍ ഇക്കൂട്ടര്‍ക്കാവില്ലെന്നും നിര്‍മ്മല സീതാരാമന്‍ പറഞ്ഞു. രാജ്യസഭയില്‍ വനിതാ സംവരണ ബില്‍ ചര്‍ച്ചക്കിടെയാണ് ഇങ്ങനെ സംസാരിച്ചത്.
◾മധ്യപ്രദേശിലെ നര്‍മ്മദാ നദീതീരത്തെ ഓംകാരേശ്വരിലുള്ള മാന്ധാത പര്‍വതത്തില്‍ ആദിശങ്കരാചാര്യരുടെ 108 അടി ഉയരമുള്ള പ്രതിമ അനാച്ഛാദനം ചെയ്തു. 12 വയസുള്ള ശങ്കരാചാര്യരുടെ പ്രതിമയാണു മുഖ്യമന്ത്രി ശിവരാജ് സിംഗ് ചൗഹാന്‍ അനാച്ഛാദനം ചെയ്തത്. അദ്വൈത ലോക് എന്ന പേരില്‍ മ്യൂസിയവും വേദാന്ത ഇന്‍സ്റ്റിറ്റ്യൂട്ടും സ്ഥാപിച്ചിട്ടുണ്ട്. 2000 കോടി രൂപ മുടക്കിയാണ് പ്രതിമ സ്ഥാപിച്ചത്.
◾സുഹൃത്തിന്റെ ഫ്‌ളാറ്റിലെ അത്താഴ വിരുന്നിനിടെ 23കാരിയായ വിദ്യാര്‍ഥിനി വെടിയേറ്റു മരിച്ചു. ലഖ്‌നൗ ബിബിഡി കോളേജിലെ ബികോം വിദ്യാര്‍ഥിനിയായ നിഷ്ത ത്രിപാഠിയാണ് കൊലപ്പെട്ടത്. നിഷ്തയുടെ സുഹൃത്തായ ആദിത്യ പഥക്കിനെയും ഫ്‌ളാറ്റിലുണ്ടായിരുന്ന മറ്റൊരു യുവാവിനെയും അറസ്റ്റു ചെയ്തു.
◾ഇന്ത്യയിലേക്കുള്ള സര്‍വീസ് നിര്‍ത്തിവച്ച് ഒമാന്റെ ബജറ്റ് വിമാന കമ്പനിയായ സലാം എയര്‍. അടുത്ത മാസം ഒന്നു മുതലാണ് ഇന്ത്യയിലേക്കുള്ള സര്‍വീസ് നിര്‍ത്തുന്നത്.
◾ഐ.എസ്എല്ലില്‍ ബെംഗളൂരു എഫ്സിക്കെതിരെ പകരം വീട്ടി കേരള ബ്ലാസ്റ്റേഴ്സിന്റെ വിജയാഘോഷം. കലൂര്‍ ജവഹര്‍ലാല്‍ നെഹ്രു സ്റ്റേഡിയത്തിലെ തിമിര്‍ത്തുപെയ്ത മഴയിലും തിങ്ങി നിറഞ്ഞ മഞ്ഞക്കടലിനു നടുവില്‍ ഒന്നിനെതിരെ രണ്ടു ഗോളുകള്‍ക്കാണ് ബ്ലാസ്റ്റേഴ്സിന്റെ വിജയം.
◾ഏഷ്യന്‍ ഗെയിംസ് ഫുട്ബോളില്‍ ബംഗ്ലദേശിനെ മറുപടിയില്ലാത്ത ഒരു ഗോളിന് തോല്‍പിച്ച് ഇന്ത്യ. ക്യാപ്റ്റന്‍ സുനില്‍ ഛേത്രിയാണ് ഇന്ത്യയ്ക്കായി ലക്ഷ്യം കണ്ടത്.
◾ഫിഫ പുറത്തുവിട്ട ഏറ്റവും പുതിയ റാങ്കിങ് പ്രകാരം ഒന്നാം സ്ഥാനം നിലനിര്‍ത്തി അര്‍ജന്റീന. ലോകകപ്പ് ഫൈനലിസ്റ്റുകളായ ഫ്രാന്‍സാണ് രണ്ടാം സ്ഥാനത്ത്. ബ്രസീല്‍, ഇംഗ്ലണ്ട്, ബെല്‍ജിയം എന്നീ ടീമുകളാണ് മൂന്ന് മുതല്‍ അഞ്ചുവരെയുള്ള സ്ഥാനങ്ങളില്‍. അതേസമയം 99-ാം സ്ഥാനത്തുണ്ടായിരുന്ന ഇന്ത്യ 102-ാം സ്ഥാനത്തേക്ക് വീണു.
◾ഒക്ടോബര്‍ അവസാനത്തോടെ പ്രാരംഭ ഓഹരി വില്‍പ്പനയക്കായി (ഐ.പി.ഒ) പേപ്പറുകള്‍ സെബിയില്‍ ഫയല്‍ ചെയ്യാന്‍ ഒല ഇലക്ട്രിക്. ഈ ഐ.പി.ഒ വഴി 700 മില്യണ്‍ ഡോളര്‍ ( 5,800 കോടി രൂപ) സമാഹരിക്കാനാണ് ലക്ഷ്യമിടുന്നതെന്ന് റോയിട്ടേഴ്സ് റിപ്പോര്‍ട്ട് പറയുന്നു. സിംഗപ്പൂരില്‍ നിന്നുള്ള ടെമാസേക്, ജപ്പാനില്‍ നിന്നുള്ള സോഫ്റ്റ്ബാങ്ക് തുടങ്ങിയ നിക്ഷേപകരുടെ പിന്തുണയോടെ 45,000 കോടി രൂപ മൂല്യം വിലയരുത്തി ഒല ഇലക്ട്രിക് അടുത്തിടെ ധനസമാഹരണം നടത്തിയിരുന്നു. വില്‍പ്പനയുടെ കാര്യത്തില്‍ ഇന്ത്യയിലെ ഏറ്റവും വലിയ വൈദ്യുത വാഹന കമ്പനിയാണ് ഒല ഇലക്ട്രിക്. 'പ്രോജക്റ്റ് ഹിമാലയ' എന്നാണ് കമ്പനിക്കുള്ളില്‍ ഈ ഐ.പി.ഒയ്ക്ക് പേരിട്ടിരിക്കുന്നത്. ഐ.പി.ഒ പേപ്പറുകള്‍ ഫയല്‍ ചെയ്തുകഴിഞ്ഞാല്‍, അവ സെബി അവലോകനം ചെയ്യും. ഇതിനു ശേഷമാണ് ഐ.പി.ഒ നടക്കുക. 2024 ആദ്യ പകുതിയില്‍ പൊതു വിപണിയിലെത്താനാണ് ഭവിഷ് അഗര്‍വാള്‍ സ്ഥാപിച്ച ഒല ഇലക്ട്രിക് ലക്ഷ്യമിടുന്നത്. ഇതേ കാലയളവില്‍ നിക്ഷേപകരുടെ ഇടയില്‍ റോഡ്‌ഷോ നടത്താനും കമ്പനി പദ്ധതിയിട്ടിട്ടുണ്ട്. 2022-23 സാമ്പത്തിക വര്‍ഷത്തില്‍ കമ്പനി 2,800 കോടി രൂപയുടെ വരുമാനം രേഖപ്പെടുത്തിയെങ്കിലും ഇതേ കാലയളവില്‍ കമ്പനി 1,200 കോടി രൂപയുടെ പ്രവര്‍ത്തന നഷ്ടം രേഖപ്പെടുത്തിയിരുന്നതായും റോയിട്ടേഴ്സ് റിപ്പോര്‍ട്ട് ചെയ്തു.
◾ആസിഫ് അലി, സണ്ണി വെയ്ന്‍, വിനായകന്‍, ദീപക് പറമ്പോല്‍, മാളവിക ശ്രീനാഥ്, ശ്രീരഞ്ജിനി നായര്‍ എന്നിവരെ പ്രധാന കഥാപാത്രങ്ങളാക്കി മൃദുല്‍ നായര്‍ കഥയെഴുതി സംവിധാനം ചെയ്ത കാസര്‍ഗോള്‍ഡിലെ പുതിയ ഗാനം അണിയറക്കാര്‍ പുറത്തുവിട്ടു. 'ഐ ആം എ ഗോള്‍ഡ'് എന്ന ഗാനത്തിന് വരികള്‍ എഴുതിയിരിക്കുന്നത് വിനായക് ശശികുമാര്‍ ആണ്. നിരഞ്ജ് സുരേഷ് ആണ് സംഗീതം പകര്‍ന്നിരിക്കുന്നത്. നിരഞ്ജ് സുരേഷിനൊപ്പം അര്‍ജുന്‍ അശോകനും ചേര്‍ന്നാണ് ഗാനത്തിന്റെ ആലാപനം. സ്വര്‍ണ്ണക്കടത്ത് പശ്ചാത്തലമാക്കുന്ന ചിത്രമാണിത്. നിരവധി ട്വിസ്റ്റുകളുള്ള, ആക്ഷന്‍ രംഗങ്ങള്‍ക്ക് പ്രാധാന്യമുള്ള സ്റ്റൈലിഷ് ചിത്രം. ബിടെക് എന്ന ചിത്രത്തിനു ശേഷം മൃദുല്‍ നായരും ആസിഫ് അലിയും ഒരുമിക്കുന്ന ചിത്രവുമാണ് കാസര്‍ഗോള്‍ഡ്. മുഖരി എന്റര്‍ടെയ്ന്‍മെന്റ്സും യൂഡ്‌ലീ ഫിലിംസുമായി സഹകരിച്ച് സരിഗമ നിര്‍മിക്കുന്ന ചിത്രമാണ് കാസര്‍ഗോള്‍ഡ്. സിദ്ദിഖ്, ധ്രുവന്‍, അഭിറാം രാധാകൃഷ്ണന്, പ്രശാന്ത് മുരളി, സമ്പത്ത് റാം, സാഗര്‍ സൂര്യ, ജെയിംസ് ഏലിയ തുടങ്ങിയവരാണ് മറ്റ് പ്രമുഖ താരങ്ങള്‍.
◾നയന്‍താര നായികയാകുന്ന പുതിയ തമിഴ് ചിത്രമാണ് 'ഇരൈവന്‍'. ജയം രവിയാണ് ഇരൈവനില്‍ നായകനാകുന്നത്. ഐ അഹമ്മദ് ആണ് ചിത്രം സംവിധാനം ചെയ്യുന്നത്. ഇരൈവിന്റെ റണ്ണിംഗ് ടൈം സംബന്ധിച്ച വിവരങ്ങള്‍ പുറത്തുവിട്ടിരിക്കുകയാണ്. രണ്ട് മണിക്കൂര്‍ 31 മിനുട്ടാണ് ചിത്രത്തിന്റെ ദൈര്‍ഘ്യം. ഒരു സൈക്കോ ത്രില്ലറായിട്ടാണ് നയന്‍താരയുടെ ചിത്രം പ്രദര്‍ശനത്തിന് എത്തുക. സഞ്ജിത് ഹെഗ്ഡെയും ഖരേസ്മ രവിചന്ദ്രനും ചിത്രത്തിനായി ആലപിച്ച ഒരു ഗാനം അടുത്തിടെ വന്‍ ഹിറ്റായി മാറിയിരുന്നു. ഐ അഹമ്മദിന്റേതാണ് ഇരൈവന്റെ തിരക്കഥയും. ഹരി കെ വേദാന്ദാണ് നയന്‍താര ചിത്രത്തിന്റെ ഛായാഗ്രാഹണം നിര്‍വഹിച്ചിരിക്കുന്നത്. പൊന്നിയിന്‍ സെല്‍വനായി പ്രേക്ഷപ്രീതി നേടിയ ശേഷം വന്‍ ഹിറ്റ് ലക്ഷ്യമിട്ടാണ് ജയം രവി ഇരൈവനുമായി എത്താന്‍ തയ്യാറെടുക്കുന്നത്. സുധന്‍ സുന്ദരമും ജയറാം ജിയുമാണ് ചിത്രം നിര്‍മിക്കുന്നത്. ജയം രവിയും നയന്‍താരയും ഒന്നിക്കുന്ന ചിത്രത്തില്‍ നരേന്‍, ആശിഷ് വിദ്യാര്‍ഥി എന്നിവരും പ്രധാന വേഷത്തില്‍ ഉണ്ടാകും. പലതവണ മാറ്റിവച്ചെങ്കിലും നയന്‍താരയുടെ ഇരൈവന്‍ സിനിമ സെപ്റ്റംബര്‍ 28ന് റിലീസാകുകയാണ്.
◾ഇന്ത്യയില്‍ ഇനി റോയല്‍ എന്‍ഫീല്‍ഡ് അംഗീകൃത കേന്ദ്രങ്ങളില്‍ നിന്നു തന്നെ മോട്ടോര്‍സൈക്കിളുകള്‍ വാടകയ്ക്ക് എടുക്കാം. 25 നഗരങ്ങളിലെ 40 മോട്ടോര്‍ സൈക്കിള്‍ റെന്റല്‍ ഓപറേറ്റര്‍മാര്‍ വഴിയാണ് റോയല്‍ എന്‍ഫീല്‍ഡ് റെന്റല്‍ ആരംഭിച്ചിരിക്കുന്നത്. ഇതുവഴി ഏതാണ്ട് 300ലേറെ റോയല്‍ എന്‍ഫീല്‍ഡ് മോട്ടോര്‍ സൈക്കിളുകളാണ് വാടകയ്ക്കു നല്‍കാനായി മാറ്റിവെച്ചിരിക്കുന്നത്. കേരളത്തിലെ രണ്ടു നഗരങ്ങളിലും ഈ സൗകര്യം ലഭ്യമാണ്. ഡല്‍ഹി, ചെന്നൈ, ബെംഗളൂരു, ഹൈദരാബാദ്, അഹ്‌മദാബാദ്, മുംബൈ എന്നിങ്ങനെയുള്ള വന്‍ നഗരങ്ങളില്‍ ഈ സേവനം ലഭ്യമാണ്. ദീര്‍ഘദൂരയാത്രകള്‍ക്ക് ബുള്ളറ്റുകള്‍ വാടകക്ക് എടുക്കുന്നതിന് വലിയ തോതില്‍ ആവശ്യക്കാരുള്ള മണാലി, ലേ, ഹരിദ്വാര്‍, ഋഷികേശ്, ഷിംല, നൈനിത്താള്‍, ബിര്‍ ബില്ലിങ്, സിലിഗുരി, ഡെറാഡൂണ്‍, ധര്‍മ്മശാല എന്നിവിടങ്ങളിലും ഇനി റോയല്‍ എന്‍ഫീല്‍ഡ് അംഗീകൃത കേന്ദ്രങ്ങളില്‍ നിന്നും മോട്ടോര്‍ സൈക്കിളുകള്‍ വാടകയ്ക്ക് ലഭിക്കും. കേരളത്തില്‍ തിരുവനന്തപുരത്തും കൊച്ചിയിലുമാണ് റോയല്‍ എന്‍ഫീല്‍ഡ് മോട്ടോര്‍സൈക്കിളുകള്‍ ഔദ്യോഗിക കേന്ദ്രങ്ങളില്‍ നിന്നും വാടകക്ക് ലഭിക്കുക. ഇവക്കു പുറമേ ചണ്ഡീഗഡ്, വിശാഖപട്ടണം, ഭുവനേശ്വര്‍, ജയ്‌സാല്‍മീര്‍, ജയ്പൂര്‍, ഉദയ്പൂര്‍, ഗോവ എന്നിങ്ങനെ സഞ്ചാരികള്‍ കൂടുതലായെത്തുന്ന നഗരങ്ങളിലും ഇത് ആരംഭിച്ചിട്ടുണ്ട്. റോയല്‍ എന്‍ഫീല്‍ഡിന്റെ വെബ്‌സൈറ്റ് വഴിയാണ് മോട്ടോര്‍ സൈക്കിള്‍ വാടകയ്ക്ക് എടുക്കാനാവുക.
◾സത്യവും മിഥ്യയും സങ്കല്പങ്ങളും യാഥാര്‍ത്ഥ്യങ്ങളും ചേര്‍ന്നു നെയ്ത അല്പജ്ഞാനത്തിന്റെ ചിലന്തിവലയ്ക്കുള്ളില്‍ വേര്‍പ്പെടാനാവാതെ കുരുങ്ങിപ്പോയവര്‍! ശരിതെറ്റുകളുടെ കുരുക്ഷേത്രഭൂവില്‍ നിരാലംബരായി തീര്‍ന്നവര്‍. ഒരേസമയം ബുദ്ധിയുള്ളവരും വിഡ്ഡികളുമായി അവശേഷിക്കുന്നവര്‍! സാങ്കേതികതയുടെ പരമോന്നതിയില്‍ നില്‍ക്കുമ്പോഴും ഹൃദയത്തില്‍ അറിയാതുയര്‍ന്നു പോകുന്ന നിലവിളികളെ നിശ്ശബ്ദമാക്കി വെളുക്കെച്ചിരിക്കേണ്ടിവരുന്നവര്‍. ജീവിതത്തിന്റെ അതിവേഗക്കുതിപ്പില്‍ മടുപ്പനുഭവപ്പെട്ടു തുടങ്ങുമ്പോള്‍ അറിയാതെ വേരുകളിലേക്ക് എത്തിനോക്കിപ്പോകുന്നവര്‍. നമ്മള്‍ പങ്കുവെക്കുന്നതൊരേ രക്തം, ഒരേ മാംസം. വൈവിദ്ധ്യങ്ങളിലും വൈരുധ്യങ്ങളിലും വൈചിത്ര്യങ്ങളിലും ഏകതാനത കണ്ടെത്തുന്നവര്‍ക്ക് ആസ്വാദ്യകരമായ വായനാനുഭവം നല്‍കുന്നുണ്ട് ഈ പുസ്തകം. 'ശിലീഭൂതം'. സൂര്യ മോഹന്‍. ഗ്രീന്‍ ബുക്സ്. വില 142 രൂപ.
◾സംതൃപ്തികരമായ ലൈംഗിക ബന്ധം പ്രായമായവരിലെ മങ്ങുന്ന ഓര്‍മശക്തി മെച്ചപ്പെടുത്താന്‍ സഹായകമാണെന്ന് പുതിയ പഠനം. ടെക്‌സാസ് എ ആന്‍ഡ് എം സര്‍വകലാശാലയിലെ സോഷ്യല്‍ സയന്‍സസ് വിഭാഗമാണ് ഇതു സംബന്ധിച്ച പഠനം നടത്തിയത്. ജേണല്‍ ഫോര്‍ സെക്‌സ് റിസര്‍ച്ചിന്റെ 2023 ജൂലൈ ലക്കത്തില്‍ ഗവേഷണ ഫലം പ്രസിദ്ധീകരിച്ചു. 1683 പേരിലാണ് ഗവേഷണ പഠനം നടത്തിയത്. 75 മുതല്‍ 90 വരെ പ്രായമുള്ള പുരുഷന്മാരില്‍ ആഴ്ചയില്‍ ഒന്നോ അതിലധികമോ തവണ ലൈംഗിക ബന്ധത്തില്‍ ഏര്‍പ്പെടുന്നവര്‍ക്ക് ലൈംഗിക ബന്ധത്തില്‍ ഏര്‍പ്പെടാത്തവരെ അപേക്ഷിച്ച് അഞ്ച് വര്‍ഷത്തിന് ശേഷം കൂടുതല്‍ മെച്ചപ്പെട്ട മേധാശക്തി ഉണ്ടായിരിക്കുന്നതായി ഗവേഷകര്‍ നിരീക്ഷിച്ചു. എന്നാല്‍ ഈ പ്രായവിഭാഗത്തിലുള്ള സ്ത്രീകളില്‍ ലൈംഗിക ബന്ധത്തിന്റെ ആവൃത്തിയും മേധാശക്തിയും തമ്മില്‍ ബന്ധം കണ്ടെത്താന്‍ സാധിച്ചില്ല. 62 മുതല്‍ 74 വരെ പ്രായവിഭാഗത്തിലുള്ളവരില്‍ ലൈംഗിക ബന്ധത്തിന്റെ ആവൃത്തിയല്ല മറിച്ച് നിലവാരമാണ് മേധാശക്തിയെ സ്വാധീനിക്കുന്നതായി കണ്ടെത്തിയത്. ഈ പ്രായ വിഭാഗക്കാരില്‍ ശാരീരികമായി സുഖവും വൈകാരികമായി സംതൃപ്തിയും നല്‍കുന്ന ലൈംഗിക ബന്ധം ഉള്ളവര്‍ക്ക് മറ്റുള്ളവരെ അപേക്ഷിച്ച് അഞ്ച് വര്‍ഷത്തിന് ശേഷം മെച്ചപ്പെട്ട ധാരണാശേഷി നിരീക്ഷിക്കപ്പെട്ടു. ശരീരം വലിയാനും രക്തചംക്രമണം മെച്ചപ്പെടുത്താനും എന്‍ഡോര്‍ഫിന്‍ തുടങ്ങിയ ഹോര്‍മോണുകള്‍ ഉല്‍പാദിപ്പിക്കാനും ലൈംഗിക ബന്ധം സഹായിക്കും. ദീര്‍ഘകാല പങ്കാളിയുമായുള്ള ലൈംഗിക ബന്ധം കൂടുതല്‍ സംതൃപ്തിയും തലച്ചോറിന് ഉള്‍പ്പെടെ ആരോഗ്യ ഗുണങ്ങളും നല്‍കും. പങ്കാളിയുമായുള്ള ലൈംഗിക ബന്ധം മാത്രമാണ് പഠനത്തില്‍ വിലയിരുത്തപ്പെട്ടത്.
*ശുഭദിനം*
അയാള്‍ വലയുമായി കടല്‍തീരത്ത് എത്തിയതായിരുന്നു. അപ്പോഴാണ് ചെങ്കുത്തായ പാറക്കെട്ടിന് മുകളില്‍ ഒരു ചെറുപ്പക്കാരന് തനിച്ചിരിക്കുന്നത് അയാളുടെ ശ്രദ്ധയില്‍പെട്ടത്. അയാളുടെ മനസ്സില്‍ അശുഭചിന്തകള്‍ കടന്നുവന്നു. ആയാള്‍ ആ ചെറുപ്പക്കാരന് അടുത്തെത്തി. ചോദ്യങ്ങള്‍ക്കൊന്നും മിണ്ടാതെ തലയും താഴ്ത്തി നിന്നു. കടലിലേക്ക് വരുന്നുണ്ടോയെന്ന ചോദ്യത്തിന് ഉണ്ടെന്ന് അയാള്‍ തലയാട്ടി. അയാള്‍ ആ ചെറുപ്പക്കാരനെയും കൊണ്ട് കടലിലേക്ക് യാത്രയായി. ആഴക്കടലില്‍ പോയി തിരിച്ചുവരുന്നത് വഴി കാററും മഴയും വലിയ തിരമാലകളുമുണ്ടായി. അയാള്‍ തന്റെ വഞ്ചിയെ അതിവിദഗ്ദമായി നിയന്ത്രിച്ചുകൊണ്ടേയിരുന്നു. ചെറുപ്പക്കാരന് മരിക്കാനാണ് തീരുമാനിച്ചിരുന്നതെങ്കിലും ഈ നിമിഷത്തില്‍ ജീവിക്കാനും ഈ അപകടത്തില്‍ നിന്നും രക്ഷപ്പെടാനും അതിയായി ആഗ്രഹിക്കുകയും പ്രാര്‍ത്ഥിക്കുകയും ചെയ്തു. കുറച്ച് സമയങ്ങള്‍ക്ക് ശേഷം കാറും കോളും അവസാനിച്ചു. കടല്‍ ശാന്തമായി. ചെറുപ്പക്കാരന് അയാളോട് ചോദിച്ചു: എങ്ങിനെയാണ് മനസ്സാന്നിധ്യത്തോടെ ഇങ്ങനെ ചെയ്യാന്‍ സാധിക്കുന്നത്? തിരിച്ച് അയാള്‍ കുറച്ച് ചോദ്യങ്ങള്‍ ചോദിച്ചു: ഈ കാറ്റിനെ നമുക്ക് പിടിച്ച് കെട്ടാന്‍ സാധിക്കുമോ? തിരമാലകളെ നിയന്ത്രിക്കാന്‍ ആകുമോ? മഴയെ തടഞ്ഞുനിര്‍ത്താന്‍ ആകുമോ? ഇല്ലെന്ന് ചെറുപ്പക്കാരന് തലയാട്ടി. അയാള്‍ തുടര്‍ന്നു. എനിക്ക് സാധിക്കുന്നത് ഈ വഞ്ചിയെ നിയന്ത്രിക്കുക എന്നത് മാത്രമാണ്. അതെനിക്ക് മാത്രമേ ചെയ്യാന്‍ കഴിയൂ.. ഏത് വശത്തേക്ക് പോകണം എത്ര സ്പീഡില്‍ പോകണം എന്നത് മാത്രമേ എനിക്ക് നിയന്ത്രിക്കാന്‍ കഴിയൂ. എന്നെക്കൊണ്ട് നിയന്ത്രിക്കാന്‍ പററാത്ത കാറ്റിനെ കുറിച്ചും തിരകളെ കുറിച്ചും മഴയെക്കുറിച്ചും എന്തിനാണ് ഞാന്‍ ആലോചിച്ച് അസ്വസ്ഥമാകുന്നത്. ചെറുപ്പക്കാരന്റെ മുഖത്ത് ഒരു പുഞ്ചിരി വിരിഞ്ഞു. നമുക്ക് നിയന്ത്രണവിധേയമല്ലാത്ത കാര്യങ്ങളില്‍ ആകുലപ്പെടാതെ നിയന്ത്രണവിധേയമായവയെ ഏറ്റവും മനോഹരമാക്കുക - മുന്നോട്ട് തന്നെ പോവുക - *ശുഭദിനം.*
