അയോഗ്യത നീക്കി ലോക്‌സഭ സെക്രട്ടറിയേറ്റ് വിജ്ഞാപനം പുറത്തിറിക്കി. ഇനി
രാഹുൽ ഗാന്ധിക്ക് വീണ്ടും വയനാട് എംപിയായി ലോക്‌സഭയിൽ പ്രവേശിക്കാം.
രാഹുലിന് ഇനി ലോക്‌സഭയിൽ എത്താം. മോദി സർക്കാരിനെതിരായ അവിശ്വാസ പ്രമേയ
ചർച്ചയിലും പങ്കെടുക്കാം. രാഹുലിനെ ഭയക്കുന്നില്ലെന്ന് വ്യക്തമാക്കാൻ കൂടി
വേണ്ടിയാണ് കേന്ദ്ര സർക്കാർ ഇടപെടലിൽ അതിവേഗം അംഗത്വം പുനഃസ്ഥാപിക്കുന്നത്.
സ്പീക്കറുടേതായിരുന്നു തീരുമാനം.
ലോക്സഭാ സെക്രട്ടേറിയറ്റാണ് വിജ്ഞാപനമിറക്കിയത്. ചൊവ്വാഴ്ച കേന്ദ്ര
സർക്കാരിനെതിരായുള്ള അവിശ്വാസപ്രമേയത്തിൽ രാഹുൽ ഗാന്ധി പങ്കെടുത്തേക്കും.
ചൊവ്വാഴ്ചയും ബുധനാഴ്ചയുമായി 12 മണിക്കൂറാണ് അവിശ്വാസ പ്രമേയ ചർച്ചയ്ക്കു
ലോക്‌സഭ നീക്കിവച്ചിരിക്കുന്നത്. വ്യാഴാഴ്ച പ്രധാനമന്ത്രി നരേന്ദ്ര മോദി
മറുപടി പറയും. അവിശ്വാസപ്രമേയത്തിന് നോട്ടീസ് നൽകിയ ഗൗരവ് ഗൊഗോയ്ക്കു ശേഷം
രാഹുൽ ഗാന്ധിയാകും പ്രതിപക്ഷത്ത് നിന്ന് പ്രസംഗിക്കുക. രാഹുലിന്റെ അംഗത്വം
റദ്ദാക്കുന്നതിന് എടുത്തവേഗം, അംഗത്വം പുനഃസ്ഥാപിക്കുന്നതിനും
ആവശ്യമുണ്ടെന്നാണ് കോൺഗ്രസ് ഉന്നയിച്ചിരുന്നു. ഇതെല്ലാം പരിഗണിച്ചാണ്
തീരുമാനം.
ലക്ഷദ്വീപ് എംപി പി.പി.മുഹമ്മദ് ഫൈസലിന്റെ അംഗത്വം കോടതി ഉത്തരവ് വന്ന്
ഒരുമാസം കഴിഞ്ഞാണ് പുനഃസ്ഥാപിച്ചിരുന്നത്. കോടതിയലക്ഷ്യത്തിന്
സുപ്രീംകോടതിയെ സമീപിക്കുമെന്ന് മുഹമ്മദ് ഫൈസൽ പ്രഖ്യാപിച്ചതിന്
പിന്നാലെയായിരുന്നു അംഗത്വം പുനഃസ്ഥാപിച്ചത്. രാഹുൽ ഗാന്ധിയുടെ കാര്യത്തിൽ ആ
കീഴ് വഴക്കം വേണ്ടെന്ന് വച്ചു. 134 ദിവസങ്ങൾക്കു ശേഷമാണ് രാഹുൽ ഗാന്ധി
പാർലമെന്റ് അംഗമായി വീണ്ടും മാറുന്നത്.
കുറ്റക്കാരനാണെന്ന വിധിക്കു സ്റ്റേ വന്നതോടെ, രാഹുൽ ഗാന്ധിക്കുള്ള
അയോഗ്യത നീങ്ങിയിരുന്നു. എന്നാൽ, ലോക്‌സഭാംഗത്വം റദ്ദാക്കിക്കൊണ്ടു ലോകസഭാ
സെക്രട്ടേറിയറ്റ് നേരത്തെ വിജ്ഞാപനമിറക്കിയതിനാൽ ഇതു പുനഃസ്ഥാപിച്ചുള്ള
വിജ്ഞാപനവും വേണ്ടതുണ്ടായിരുന്നു. ഈ നടപടി ക്രമമാണ് ഇപ്പോൾ
നടപ്പിലാക്കുന്നത്. ഇതിനായി ലോക്സഭാ സ്പീക്കർ ഓം ബിർലയ്ക്ക് കോൺഗ്രസ്
കത്ത് നൽകിയിരുന്നു. എന്നാലിത് നേരിട്ട് സ്വീകരിക്കാതെ സ്പീക്കർ ഓം ബിർല
ഒഴിഞ്ഞു മാറിയിരുന്നു.
സമയം അനുവദിക്കാതിരുന്നതോടെ, കോൺഗ്രസ് ലോകസ്സഭാ കക്ഷി നേതാവ് അധീർ രഞ്ജൻ
ചൗധരി കത്ത് ലോക്സഭാ സെക്രട്ടേറിയറ്റിനെ എൽപ്പിക്കുകയായിരുന്നു. കഴിഞ്ഞ
മാർച്ച് 23ലെ സുപ്രീംകോടതി ഉത്തരവു വന്ന് 24 മണിക്കൂറിനുള്ളിലാണ് രാഹുലിനെ
അയോഗ്യനാക്കി ലോകസഭാ സെക്രട്ടേറിയറ്റ് ഉത്തരവിറക്കിയത്. കോൺഗ്രസ് സമ്മർദ്ദം
കാരണം അതിവേഗം അയോഗ്യത നീക്കുകയും ചെയ്തു.
