ചെമ്പഴന്തി : ചിങ്ങപ്പുലരി മുതല്‍ ശ്രീനാരായണ ഗുരുദേവ വിശ്വാസികള്‍ക്ക് ഗുരുദേവന്‍റെ അവതാരഗൃഹം വയല്‍വാരം വീട്ടില്‍ ജന്‍മനക്ഷത്ര ഗുരുപൂജ നടത്താനുള്ള അവസരം കൈവരുന്നു. ഏതൊരാള്‍ക്കും തന്‍റെ ജന്‍മദിനത്തില്‍ നേരിട്ടെത്തിയോ മുന്‍കൂട്ടി ബു ക്ക് ചെയ്തോ പൂജ നിര്‍വ്വഹിക്കാം. നേരിട്ടെത്തുന്നവര്‍ക്ക് സംന്യാസി ശ്രേഷ്ഠരുടെ നേതൃത്വത്തില്‍ നടത്തുന്ന വിശേഷാല്‍ പൂജയിലും പ്രാര്‍ത്ഥനയിലും സംബന്ധിച്ച് ഗുരുപൂജാപ്രസാദം അന്നദാനത്തിന് ശേഷം മടങ്ങാനാവും. നേരില്‍ വരാന്‍ കഴിയാതെ പൂജ ബുക്ക് ചെയ്യുന്നവര്‍ പേരും വിലാസവും ജന്‍മ നക്ഷത്രവും അറിയിച്ചാല്‍ മതിയാകും. പൂജയ്ക്ക് ശേഷം അവര്‍ക്കുള്ള വിശേഷാല്‍ പ്രസാദം തപാല്‍ മുഖേന ലഭ്യമാകും. നേരില്‍ വരുന്നവര്‍ക്ക് കുടുംബാംഗങ്ങളേയും ഒപ്പം കൂട്ടാനാവും. താമസ ഭക്ഷണ ക്രമീകരണം ഗുരുകുലത്തില്‍ സൗജന്യമായി ലഭിക്കും. വിവരങ്ങള്‍ക്ക് : സെക്രട്ടറി, ശ്രീനാരായണഗുരുകുലം, ചെമ്പഴന്തി പി.ഒ., തിരുവനന്തപുരം എന്ന വിലാസത്തിലോ ഫോണ്‍ - 8281119121, 0471-2592721- ലോ വിവരം നല്‍കാനാവും.
