◾സ്‌കൂളുകളുടെ പ്രവൃത്തിദിനം 210 ദിവസമാക്കി വര്‍ധിപ്പിച്ച വിദ്യാഭ്യാസ മന്ത്രി വി. ശിവന്‍കുട്ടി പ്രവൃത്തിദിനം 205 ദിവസമാക്കി കുറച്ചു. മധ്യവേനലവധി ഏപ്രില്‍ ആറു മുതലാകുമെന്ന പ്രഖ്യാപനവും തിരുത്തി. നിലവിലെ മാര്‍ച്ച് 31 നു തന്നെ മധ്യവേനലവധി ആരംഭിക്കും. സിപിഎം അനുകൂല അധ്യാപക സംഘടനയായ കെഎസ്ടിഎ എതിര്‍ത്തതോടെയാണ് സര്‍ക്കാര്‍ തീരുമാനം മാറ്റിയത്.
◾ട്രാഫിക് നിയമലംഘനങ്ങള്‍ പിടികൂടാന്‍ ക്യാമറകള്‍ പ്രവര്‍ത്തിച്ചു തുടങ്ങിയെങ്കിലും സെര്‍വര്‍ തകരാര്‍മൂലം പിഴ ഈടാക്കാനുള്ള നടപടികളിലേക്കു കടക്കാനായില്ല. കേന്ദ്ര സര്‍ക്കാരിന്റെ വാഹന്‍ പരിവാഹന്‍ സൈറ്റിലേക്ക് കുറ്റകൃത്യങ്ങളുടെ വിവരങ്ങള്‍ രേഖപ്പെടുത്താന്‍ കഴിയാത്തതാണു തടസം. നിയമലംഘകര്‍ക്ക് ഇതുമൂലം നോട്ടീസ് അയക്കാന്‍ സാധിച്ചിട്ടില്ല.
◾അറബിക്കടലില്‍ രൂപം കൊണ്ട ബിപാര്‍ജോയ് ചുഴലിക്കാറ്റ് അതിതീവ്ര ചുഴലിക്കാറ്റായി മാറി. മണിക്കൂറില്‍ 135 -145 കിലോമീറ്റര്‍ വേഗതയിലായിരിക്കും ബിപാര്‍ജോയ് ചുഴലിക്കാറ്റ് മുന്നോട്ട് പോകുക. കേരളത്തില്‍ കാറ്റോടുകൂടിയ മഴയ്ക്കു സാധ്യത.
◾മാര്‍ക്കു തട്ടിപ്പില്‍ എസ്എഫ്ഐ സംസ്ഥാന സെക്രട്ടറി പിഎം ആര്‍ഷോയ്ക്കു പങ്കില്ലെന്ന് മഹാരാജാസ് കോളേജ് പ്രിന്‍സിപ്പല്‍. ആര്‍ഷോ മൂന്നാം സെമസ്റ്റര്‍ പരീക്ഷയ്ക്കായി രജിസ്റ്റര്‍ ചെയ്തിരുന്നെന്ന മുന്‍ നിലപാട് തിരുത്തി. റീ അഡ്മിഷന്‍ എടുത്തതിനാലാണ് 2021 ബാച്ചിനൊപ്പം ഫലം വന്നതെന്നും പ്രിന്‍സിപ്പല്‍ പറഞ്ഞിരുന്നു. പ്രിന്‍സിപ്പാള്‍ കള്ളമാണു പറഞ്ഞതെന്നും താന്‍ പരീക്ഷയ്ക്ക് അപേക്ഷിച്ചതിന്റെ രേഖകള്‍ പുറത്തു വിടണമെന്നും ആര്‍ഷോ പ്രതികരിച്ചിരുന്നു. ഇതിനു പിറകേയാണ് പ്രിന്‍സിപ്പല്‍ മുന്‍ വാദങ്ങള്‍ തിരുത്തിയത്.
◾മഹാരാജാസ് കോളേജില്‍ എഴുതാത്ത പരീക്ഷ താന്‍ ജയിച്ചെന്ന് വരുത്തിത്തീര്‍ക്കാന്‍ ഗൂഢാലോചന നടന്നെന്ന് എസ്എഫ്ഐ സംസ്ഥാന സെക്രട്ടറി പിഎം ആര്‍ഷോ. 2020 അഡ്മിഷനില്‍ ഉള്ള തന്നെ 2021 ലെ കുട്ടികളുടെ ഒപ്പം പരീക്ഷ എഴുതിയതായി പ്രചരിപ്പിച്ചെന്നും മഹാരാജാസ് കോളേജ് പ്രിന്‍സിപ്പല്‍ വാക്കു മാറ്റി പറയുന്നുവെന്നും ആര്‍ഷോ പറഞ്ഞു. തനിക്കെതിരെ വ്യാജ പ്രചാരണം നടത്തി വിദ്യാര്‍ത്ഥി പ്രസ്ഥാനത്തെ ഇല്ലാതാക്കാമെന്നാണ് കരുതുന്നതെന്നും അദ്ദേഹം വിമര്‍ശിച്ചു.
◾എസ്എഫ്ഐ സംസ്ഥാന സെക്രട്ടറി പിഎം ആര്‍ഷോയുടെ മാര്‍ക്ക് ലിസ്റ്റ് വിവാദത്തില്‍ പ്രതിഷേധിച്ച് എറണാകുളം മഹാരാജാസ് കോളേജിലേക്ക് കെഎസ്യു പ്രകടനത്തില്‍ സംഘര്‍ഷം. പ്രവര്‍ത്തകര്‍ പൊലീസ് ബാരിക്കേഡ് തള്ളി മാറ്റി. പൊലീസ് ജലപീരങ്കി പ്രയോഗിച്ചു. വനിതാ പ്രവര്‍ത്തകരെ ഉള്‍പ്പടെ പൊലീസ് അറസ്റ്റു ചെയ്തു.
◾എസ് എഫ് ഐ നേതാക്കള്‍ പ്രതികളായ കേസുകള്‍ പോലീസ് അന്വേഷിക്കുകയോ പ്രതികളെ അറസ്റ്റു ചെയ്യുകയോ ചെയ്യുന്നില്ലെന്ന് പ്രതിപക്ഷ നേതാവ് വി ഡി സതീശന്‍. 'മഹാരാജാസ് കോളേജിന്റെ പേരില്‍ വ്യാജരേഖയുണ്ടാക്കി അധ്യാപക ജോലിക്കു ശ്രമിച്ച പ്രതിയെ അറസ്റ്റു ചെയ്യണം. സംവരണം അട്ടിമറിച്ച് പിഎച്ച്ഡിക്ക് ഇതേ വിദ്യാര്‍ത്ഥിനിക്ക് അവസരം നല്‍കി. എസ്എഫ്ഐ സംസ്ഥാന സെക്രട്ടറി പരീക്ഷ എഴുതാതെ പാസാക്കിയ സംഭവത്തില്‍ കേസെടുത്തിട്ടുപോലുമില്ല. സതീശന്‍ ചൂണ്ടിക്കാട്ടി.
◾നാല്‍പതു ക്രിമിനല്‍ കേസുകളില്‍ പ്രതിയും പിടികിട്ടാപ്പുള്ളിയുമായ എസ്എഫ്ഐ സംസ്ഥാന സെക്രട്ടറി പിഎം ആര്‍ഷോയെ സിപിഎം സംരക്ഷിക്കുന്നതിന്റെ ദുരന്തമാണ് ഇപ്പോള്‍ മഹാരാജാസ് കോളേജും മറ്റു കാമ്പസുകളും നേരിടുന്നതെന്ന് കെപിസിസി പ്രസിഡന്റ് കെ സുധാകരന്‍. തെറ്റായ നിലപാട് സ്വീകരിച്ച ഒരാളയെും പിന്തുണയ്ക്കില്ലെന്നു പ്രഖ്യാപിച്ച സിപിഎം സംസ്ഥാന സെക്രട്ടറി എംവി ഗോവിന്ദന്‍ ഈ തെറ്റിനെ തലയിലേറ്റി വച്ചിരിക്കുകയാണ്. സുധാകരന്‍ പറഞ്ഞു.
◾മഹാരാജാസ് കോളേജ് വ്യാജരേഖാ കേസില്‍ കുറ്റാരോപിതയായ കെ. വിദ്യയുടെ ഗവേഷണ ഗൈഡ് സ്ഥാനത്തു നിന്ന് ബിച്ചു എക്സ്മലയില്‍ പിന്മാറി. വിദ്യ നിയമപരമായി നിരപരാധിത്വം തെളിയിരുന്നതുവരെ മാറിനില്‍ക്കുകയാണെന്ന് ബിച്ചു എക്സ്മല കാലടി സര്‍വകലാശാലയെ അറിയിച്ചു.
◾കൊടുവള്ളിയില്‍ യുവാവ് ഇടിമിന്നലേറ്റ് മരിച്ചു. കൊടുവള്ളി സ്വദേശി കക്കോടന്‍ നസീര്‍ (42) ആണ് മരിച്ചത്.
◾തിരുവനന്തപുരം അരുവിക്കര ഡാമിന്റെ ഷട്ടറുകള്‍ 20 സെന്റി മീറ്റര്‍കൂടി ഉയര്‍ത്തി. ഡാമിന്റെ മൂന്നാമത്തേയും നാലാമത്തേയും ഷട്ടറുകള്‍ നേരത്തെ 10 സെന്റീ മീറ്റര്‍ വീതം ഉയര്‍ത്തിയിരുന്നു.
◾സാമ്പത്തിക തട്ടിപ്പു കേസില്‍ മുന്‍ മന്ത്രിയും കോണ്‍ഗ്രസ് നേതാവുമായ വിഎസ് ശിവകുമാറിന്റെ മുന്‍ അഡീഷണല്‍ പ്രൈവറ്റ് സെക്രട്ടറി രാജേന്ദ്രനെ അറസ്റ്റു ചെയ്തു. യുഎന്‍ എംപ്ലോയ്മെന്റ് സര്‍വ്വീസ് സൊസൈറ്റിയുമായി ബന്ധപ്പെട്ട സാമ്പത്തിക തട്ടിപ്പു കേസിലാണ് നടപടി.
◾ക്രൈംബ്രാഞ്ച് അന്വേഷണത്തില്‍ നീതി കിട്ടുമെന്ന് ആത്മഹത്യ ചെയ്ത അമല്‍ ജ്യോതി കോളജിലെ ബിരുദ വിദ്യാര്‍ത്ഥിനി ശ്രദ്ധയുടെ അച്ഛന്‍ സതീശന്‍. മകള്‍ മരിച്ചതിന്റെ കാരണമറിയണം. അതിനായി നിയമനടപടികളുമായി മുന്നോട്ടു പോകുമെന്നും സതീശന്‍ പറഞ്ഞു.
◾ഭക്ഷ്യ സുരക്ഷാ സൂചികയില്‍ കേരളം ഒന്നാം സ്ഥാനത്ത്. ഫുഡ് സേഫ്റ്റി ആന്‍ഡ് സ്റ്റാന്റേര്‍ഡ്‌സ് അതോറിറ്റി ഓഫ് ഇന്ത്യയുടെ ഭക്ഷ്യ സുരക്ഷാ സൂചികയിലാണ് കേരളം മുന്നിലെത്തിയത്.
◾പൊലീസ് കസ്റ്റഡിയില്‍നിന്ന് പോക്സോ കേസ് പ്രതി രക്ഷപ്പെട്ടു. പത്തനംതിട്ട ജില്ലയിലെ സീതത്തോടാണ് സംഭവം. മീന്‍കുഴി സ്വദേശി ജിതിനാണ് സീതത്തോട് തെളിവെടുപ്പിന് എത്തിച്ചപ്പോള്‍ ഓടിപ്പോയത്.
◾പൊലീസ് ആസ്ഥാനത്തെ എഐജി ഹരിശങ്കറിന് സൈബര്‍ ഓപ്പറേഷന്റെ ചുമതല നല്‍കി. പാലക്കാട് എസ് പി മായ വിശ്വനാഥിനെ പൊലീസ് ആസ്ഥാനത്തെ പുതിയ എഐജിയായി നിയമിച്ചു. വയനാട് എസ്പി ആനന്ദിനെ പാലക്കാട് എസ് പിയാക്കി. പദം സിംഗാണ് വയനാട് എസ്പി. ഷൗക്കത്തലിയെ ആന്റി ടെററിസ്റ്റ് സ്‌ക്വാഡില്‍നിന്നു ക്രൈംബ്രാഞ്ചിലേക്കു മാറ്റി.
◾വിഭാഗീയത അനുവദിക്കില്ലെന് സംസ്ഥാന സെക്രട്ടറി എംവി ഗോവിന്ദന്‍ സിപിഎം പാലക്കാട് ജില്ലാ സെക്രട്ടേറിയറ്റ് യോഗത്തില്‍ പറഞ്ഞു. വിഭാഗീയത രൂക്ഷമായ ചെര്‍പ്പുളശ്ശേരി ഏരിയ കമ്മിറ്റി പുനസംഘടിപ്പിക്കും. മുതിര്‍ന്ന നേതാവായ പി കെ ശശി, വി.കെ ചന്ദ്രന്‍ എന്നിവര്‍ക്കെതിരേ യോഗത്തില്‍ വിമര്‍ശനം ഉയര്‍ന്നു.
◾പാലക്കാട് പാലക്കയം കൈക്കൂലി കേസില്‍ വില്ലേജ് ഫീല്‍ഡ് അസിസ്റ്റന്റ് സുരേഷ് കുമാറിനെ പിരിച്ചുവിടണമെന്ന റവന്യു ജോയിന്റ് സെക്രട്ടറിയുടെ ശുപാര്‍ശ മന്ത്രി അംഗീകരിച്ചു. വില്ലേജ് ഓഫീസര്‍ സജിതിനെതിരെയും നടപടിയെടുക്കണമെന്നാണ് റിപ്പോര്‍ട്ടിലെ ശുപാര്‍ശ.
◾ആലപ്പുഴ പുന്നമ്മൂട്ടില്‍ നാലു വയസുകാരിയെ മദ്യലഹരിയില്‍ അച്ഛന്‍ മഴുകൊണ്ട് വെട്ടിക്കൊന്നു. മാവേലിക്കര പുന്നമൂട് ആനക്കൂട്ടില്‍ മഹേഷിന്റെ മകള്‍ നക്ഷത്രയാണ് കൊല്ലപ്പെട്ടത്. മഹേഷിനെ (38) പൊലീസ് അറസ്റ്റു ചെയ്തു. ആക്രമണത്തില്‍ പരിക്കേറ്റ അമ്മ സുനന്ദയെ ഗുരുതരാവസ്ഥയില്‍ ആശുപത്രിയില്‍ പ്രവേശിപ്പിച്ചു. മഹേഷിന്റെ ഭാര്യ രണ്ട് വര്‍ഷം മുമ്പ് ആത്മഹത്യ ചെയ്തിരുന്നു.
◾നെയ്യാറ്റിന്‍കര തിരുപുറം പുത്തന്‍ കടയില്‍ തട്ടുകട നടത്തുന്ന രാജന്റെ മകള്‍ രാഖിമോളെ (30) കൊന്നു വീട്ടുവളപ്പില്‍ കുഴിച്ചിട്ട കേസില്‍ മൂന്നു പ്രതികളും കുറ്റക്കാരെന്ന് തിരുവനന്തപുരം ആറാം അഡീഷണല്‍ സെഷന്‍സ് കോടതി. അമ്പൂരി തട്ടാമുക്ക് അശ്വതി ഭവനില്‍ അഖില്‍ (24), അഖിലിന്റെ സഹോദരന്‍ രാഹുല്‍ (27), ഇവരുടെ സുഹൃത്ത് അമ്പൂരി തട്ടാന്‍മുക്ക് ആദര്‍ശ് നായര്‍ (23) എന്നിവരെയാണ് കുറ്റക്കാരെന്ന് കണ്ടെത്തിയത്.
◾കണ്ണൂര്‍ വിമാനത്താവളത്തില്‍ ഒരു കോടി പത്തു ലക്ഷം രൂപയുടെ സ്വര്‍ണവുമായി രണ്ടു പേര്‍ പിടിയില്‍. കാസര്‍കോട് സ്വദേശി മുഹമ്മദ് അല്‍ത്താഫ്, പയ്യന്നൂര്‍ സ്വദേശി മുഹമ്മദ് ബഷീര്‍ എന്നിവരാണ് പിടിയിലായത്. ഇവരില്‍നിന്ന് 1797 ഗ്രാം സ്വര്‍ണം പിടികൂടി.
◾മുത്തങ്ങ വന്യജീവി സങ്കേതത്തില്‍ കാട്ടാനയുടെ ഫോട്ടോ എടുക്കാന്‍ ശ്രമിച്ച യുവാവിനു പിറകെ ആന ഓടി. തമിഴ്നാട് സ്വദേശിയായ യുവാവ് തലനാരിഴക്കാണ് രക്ഷപ്പെട്ടത്. വിനോദ സഞ്ചാരികള്‍ ബഹളംവച്ചതോടെ ആന പിന്തിരിയുകയായിരുന്നു. യുവാവിനെ വാഹനം സഹിതം കസ്റ്റഡിയിലെടുത്ത വനം വകുപ്പ് നാലായിരം രൂപ പിഴയടപ്പിച്ചാണ് വിട്ടയച്ചത്.
◾എറണാകുളം കണ്ടെയ്നര്‍ റോഡില്‍ മാല പിടിച്ചുപറിച്ചിരുന്ന കേസുകളിലെ പ്രതി ലക്ഷദ്വീപ് സ്വദേശി മുജീബ് റഹ്‌മാനെ മുളവുകാട് പൊലീസ് അറസ്റ്റു ചെയ്തു. അറുപതിനായിരം രൂപ ശമ്പളം വാങ്ങുന്ന കപ്പല്‍ ജീവനക്കാരനായ ഇയാള്‍ ജോലിയില്ലാത്ത ദിവസങ്ങളിലാണ് ബൈക്കിലെത്തി മാല പിടിച്ചുപറിച്ചിരുന്നത്.
◾പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ചു ഗര്‍ഭിണിയാക്കിയ മുക്കം കുറ്റിപ്പാല രാജീവ് ഗാന്ധി കോളനിയിലെ കരടി ഷെമീറിനെ (26) അറസ്റ്റു ചെയ്തു.
◾പ്രായപൂര്‍ത്തിയാവാത്ത പെണ്‍കുട്ടിയെ ലൈംഗികമായി പീഡിപ്പിക്കുകയും ദൃശ്യങ്ങള്‍ പ്രചരിപ്പിക്കുകയും ചെയ്ത മൂന്നംഗ സംഘത്തെ പൊലീസ് കസ്റ്റഡിയിലെടുത്തു. വയനാട് കൃഷ്ണഗിരി സ്വദേശിയായ ജ്യോതിഷ്, തൃക്കൈപ്പറ്റ സ്വദേശി ഉണ്ണികൃഷ്ണന്‍, കൊളഗപ്പാറ സ്വദേശി സജിത്ത് എന്നിവരെയാണ് മീനങ്ങാടി പൊലീസ് കസ്റ്റഡിയിലെടുത്തത്.
◾മലപ്പുറം എടവണ്ണപ്പാറയില്‍ വിദ്യാര്‍ത്ഥികളെ കയറ്റാതെ പോയ സ്വകാര്യ ബസിനെ രക്ഷിതാവ് തടഞ്ഞു. ഡ്രൈവറെ മര്‍ദിച്ചെന്ന് ആരോപിച്ചു എടവണ്ണപ്പാറ- കോഴിക്കോട് റൂട്ടിലെ സ്വകാര്യ ബസുകള്‍ മിന്നല്‍ പണിമുടക്ക് നടത്തി.
◾ട്രെയിന്‍ ടിക്കറ്റ് റദ്ദാക്കാതെ യാത്ര തീയതിയില്‍ മാറ്റം വരുത്താവുന്ന സൗകര്യവുമായി ഐആര്‍സിടിസി. തീയതിയില്‍ മാറ്റം വരുത്തുന്നതിന് അധിക പണം നല്‍കേണ്ടതില്ല. 48 മണിക്കൂര്‍ മുമ്പ് റിസര്‍വേഷന്‍ കൗണ്ടറില്‍ സ്ഥിരീകരിച്ച ടിക്കറ്റ് സറണ്ടര്‍ ചെയ്താല്‍ തീയതി മാറ്റാം. ഉയര്‍ന്ന ക്ലാസിലേക്ക് അപ്ഗ്രേഡ് ചെയ്യാനുള്ള അവസരവുമുണ്ട്.
◾ബിഹാര്‍ മുഖ്യമന്ത്രി നിതീഷ്‌കുമാറിന്റെ നേതൃത്വത്തില്‍ ഈ മാസം 23 നു പാറ്റ്നയില്‍ പ്രതിപക്ഷ പാര്‍ട്ടി നേതാക്കളുടെ യോഗം. മല്ലികാര്‍ജുന്‍ ഖര്‍ഗെ, രാഹുല്‍ഗാന്ധി, മമത ബാനര്‍ജി, എം.കെ. സ്റ്റാലിന്‍, അരവിന്ദ് കേജരിവാള്‍ തുടങ്ങിയവര്‍ പങ്കെടുക്കുമെന്ന് ബിഹാര്‍ ഉപമുഖ്യമന്ത്രി തേജസ്വി യാദവ് പറഞ്ഞു. ഈ മാസം 12 നു നടത്താനിരുന്ന യോഗം 23 ലേക്കു മാറ്റിവച്ചതാണ്.
◾ഒഡിഷയിലെ ബാലസോറിലുണ്ടായ ട്രെയിന്‍ അപകടത്തില്‍ ഭര്‍ത്താവ് മരിച്ചതായി വ്യാജമായി അവകാശപ്പെട്ട് നഷ്ടപരിഹാര തുക സ്വന്തമാക്കാന്‍ ശ്രമിച്ച സ്ത്രീക്കെതിരേ കേസ്. കട്ടക്ക് ജില്ലയിലെ മണിബണ്ട സ്വദേശിനിയായ ഗീതാഞ്ജലി ദത്തയാണ് ഭര്‍ത്താവ് ബിജയ് ദത്ത മരിച്ചതായി കാണിച്ച് നഷ്ടപരിഹാര തുക നേടിയെടുക്കാന്‍ ശ്രമിച്ചത്. തട്ടിപ്പു പൊളിഞ്ഞതോടെ ഗീതാഞ്ജലിയെ താക്കീത് നല്‍കി പൊലീസ് വിട്ടയച്ചു. അതേസമയം ഭര്‍ത്താവായ ബിജയ് ദത്ത മണിബണ്ട ഭാര്യക്കെതിരേ പൊലീസ് സ്റ്റേഷനില്‍ പരാതി നല്‍കിയതോടെ കേസെടുത്തു. യുവതി ഇപ്പോള്‍ ഒളിവിലാണ്.
◾കര്‍ണാടകത്തില്‍ ഏറ്റവും പുതിയ സാമ്പത്തിക- ജാതി സര്‍വേ കണക്കുകള്‍ പുറത്തുവിടുമെന്ന് മുഖ്യമന്ത്രി സിദ്ധരാമയ്യ. പിന്നാക്ക വിഭാഗങ്ങളുടെ കൂട്ടായ്മയായ ശോഷിത വര്‍ഗകള മഹാ ഒക്കൂട്ടയുടെ പ്രതിനിധികള്‍ക്കാണ് സിദ്ധരാമയ്യ ഉറപ്പ് നല്‍കിയത്.
◾ഉത്തര്‍ പ്രദേശില്‍ പൊലീസ് കസ്റ്റഡിയില്‍ ഗുണ്ടാനേതാവായ പ്രതി വെടിയേറ്റു മരിച്ചു. ലക്നോ കോടതി പരിസരത്ത് സഞ്ജീവ് ജീവയാണ് കൊല്ലപ്പെട്ടത്. ബിജെപി നേതാവ് ബ്രഹ്‌മദത്ത് ദ്വിവേദിയെ കൊലപ്പെടുത്തിയ കേസിലെ പ്രതിയാണ് ഇയാള്‍. വെടിവയ്പില്‍ രണ്ടു പേര്‍ക്ക് പരിക്കേറ്റിട്ടുണ്ട്.
◾ഒഡീഷയില്‍ ട്രെയിനിന് അടിയില്‍പ്പെട്ട് നാലു പേര്‍ മരിച്ചു. ജജ്പൂര്‍ റോഡ് റെയില്‍വേ സ്റ്റേഷനിലാണ് സംഭവം. ഗുഡ്സ് ട്രെയിനിന് അടിയില്‍ കിടന്ന് ഉറങ്ങിയവരാണ് മരിച്ചത്.
◾ഗുജറാത്തിലെ ജാംനഗറിലെ പ്രശസ്ത ഹൃദ്രോഗ വിദഗ്ധന്‍ ഡോ. ഗൗരവ് ഗാന്ധി (41) ഹൃദയാഘാതത്തെ തുടര്‍ന്ന് അന്തരിച്ചു. പതിനാറായിരത്തിലേറെ ഹൃദയ ശസ്ത്രക്രിയകള്‍ നടത്തിയ വിദഗ്ധനാണ് മരിച്ചത്.
◾ദൂരദര്‍ശനിലെ ആദ്യകാല ഇംഗ്ളീഷ് വാര്‍ത്താ അവതാരക ഗീതാഞ്ജലി അയ്യര്‍ അന്തരിച്ചു. 71 വയസ്സായിരുന്നു.
◾മുന്‍ കാമുകിയായ സിംബാബ് വേയിലെ വ്യവസായി ചെല്‍സി ഡേവിയുമായുള്ള തന്റെ പ്രണയം തകര്‍ത്തതു മാധ്യമങ്ങളാണെന്നു ഹാരി രാജകുമാരന്‍. താന്‍ ഒറ്റയ്ക്കു നില്‍ക്കുന്നതു കാണാനാണ് ടാബ്ലോയിഡുകള്‍ക്കു താല്‍പര്യം. മിറര്‍ ടാബ്ലോയിഡിനെതിരായ കേസില്‍ നല്‍കിയ സത്യവാങ്മൂലത്തിലാണ് ഹാരി ഇങ്ങനെ പറഞ്ഞത്.
◾ഇന്ത്യക്കെതിരായ ലോക ടെസ്റ്റ് ക്രിക്കറ്റ് ഫൈനലിന്റെ ആദ്യ ദിനം ഓസ്ട്രേലിയ 327 ന് 3 എന്ന ശക്തമായ നിലയില്‍. ടോസ് നഷ്ടപ്പെട്ട് ബാറ്റിംഗിനിറങ്ങിയ ഓസ്ട്രേലിയക്ക് ആദ്യ മൂന്ന് വിക്കറ്റുകള്‍ 76 റണ്‍സെടുക്കുന്നതിനിടയില്‍ നഷ്ടമായി. 146 റണ്‍സെടുത്ത ട്രാവിസ് ഹെഡിന്റേയും 95 റണ്‍സെടുത്ത സ്റ്റീവ് സ്മിത്തിന്റേയും അപരാജിത നാലാം വിക്കറ്റ് കൂട്ടുകെട്ടാണ് ഓസ്ട്രേലിയയെ ശക്തമായ നിലയില്‍ എത്തിച്ചത്.
◾അര്‍ജന്റീന സൂപ്പര്‍ താരം ലയണല്‍ മെസ്സി ഇനി മുതല്‍ യുഎസ്എയിലെ മേജര്‍ ലീഗ് സോക്കര്‍ ക്ലബ്ബായ ഇന്റര്‍ മയാമിയില്‍. മുന്‍ ഇംഗ്ലണ്ട് ഇതിഹാസ താരം ഡേവിഡ് ബെക്കാമിന്റെ ഉടമസ്ഥതയിലുള്ള ഫുട്ബോള്‍ ക്ലബ്ബായ ഇന്റര്‍ മയാമിയിലേക്ക് പോകുന്ന കാര്യം മെസി സ്ഥിരീകരിച്ചു. പ്രതിവര്‍ഷം 54 ദശലക്ഷം ഡോളര്‍, ഏകദേശം 445 കോടി രൂപയുടെ നാല് വര്‍ഷത്തേക്കുള്ള ഓഫറാണ് മിയാമി മെസ്സിക്ക് മുന്നില്‍ വെച്ചിരിക്കുന്നതെന്നാണ് റിപ്പോര്‍ട്ടുകള്‍.
◾രാജ്യത്തെ പ്രമുഖ ബഹുരാഷ്ട്ര കമ്പനിയായ ആദിത്യ ബിര്‍ള ഗ്രൂപ്പ് ബ്രാന്‍ഡഡ് ആഭരണ മേഖലയിലേക്കും കടക്കുന്നു. ഇതിനായി 5,000 കോടി രൂപ നിക്ഷേപിക്കുമെന്ന് കമ്പനി അറിയിച്ചു. കഴിഞ്ഞ രണ്ട് വര്‍ഷത്തിനുള്ളില്‍ ഗ്രൂപ്പ് പുതുതായി പ്രവേശനം നടത്തുന്ന മൂന്നാമത്തെ ബിസനസാണിത്. പെയ്ന്റ് ബിസനസ്, ഗൃഹനിര്‍മാണ സാമഗ്രികള്‍ക്കുള്ള ബി ടു ബി ഇ കൊമേഴ്‌സ് എന്നിവയാണ് ഇതിനു മുന്‍പ് ആരംഭിച്ചത്. നോവെല്‍ ജ്യുവല്‍സ് ലിമിറ്റഡ് എന്ന ബ്രാന്‍ഡില്‍ സ്വര്‍ണാഭരണങ്ങള്‍ അവതരിപ്പിച്ചുകൊണ്ട് വമ്പന്‍ ജ്യുവലറി റീറ്റെയ്ല്‍ ശൃംഖല അവതരിപ്പിക്കാനാണ് ഗ്രൂപ്പിന്റെ ലക്ഷ്യം. ടാറ്റ ഗ്രൂപ്പിന്റെ ആഭരണ ശൃംഖലയായ തനിഷ്‌കിന് എതിരാളിയായിരിക്കും പുതിയ കമ്പനി. ഗ്രാസിം ഇന്‍ഡസ്ട്രീസ്, ഹിന്‍ഡാല്‍കോ, ആദിത്യ ബിര്‍ള ഫാഷന്‍ ആന്‍ഡ് റീറ്റെയ്ല്‍, ആദിത്യ ബിര്‍ള ക്യാപിറ്റല്‍ എന്നിവയാണ് ഗ്രൂപ്പിനു കീഴിലുള്ള മറ്റ് കമ്പനികള്‍. 1,40,000 ജീവനക്കാരാണ് വിവിധ കമ്പനികളിലായി ഗ്രൂപ്പിനു കീഴിലുള്ളത്.
◾ആക്ഷന്‍ കിംങ്ങ് അര്‍ജുന്‍ സര്‍ജയും നിക്കി ഗല്‍റാണിയും പ്രധാന വേഷത്തില്‍ എത്തുന്ന ഏറ്റവും പുതിയ ചിത്രമാണ് 'വിരുന്ന്'. വരാല്‍ എന്ന ചിത്രത്തിനുശേഷം കണ്ണന്‍ താമരക്കുളം സംവിധാനം ചെയ്യുന്ന ഈ ബിഗ് ബജറ്റ് ചിത്രം മലയാളത്തിലും തമിഴിലുമായിട്ടാണ് ഒരുങ്ങുന്നത്. ചിത്രത്തിന്റെ പോസ്റ്റ് പ്രൊഡക്ഷന്‍ ജോലികള്‍ അന്തിമഘട്ടത്തിലാണെന്ന് അണിയറ പ്രവര്‍ത്തകര്‍ അറിയിച്ചു. നെയ്യാര്‍ ഫിലിംസിന്റെ ബാനറില്‍ ഗിരീഷ് നെയ്യാര്‍ നിര്‍മ്മിക്കുന്ന ചിത്രത്തില്‍ അര്‍ജുന്‍, നിക്കി ഗല്‍റാണി എന്നിവരെ കൂടാതെ മുകേഷ്, ഗിരീഷ് നെയ്യാര്‍, അജു വര്‍ഗീസ്, ബൈജു സന്തോഷ്, ഹരീഷ് പേരടി, ധര്‍മജന്‍ ബോള്‍ഗാട്ടി, സോനാ നായര്‍, മന്‍രാജ്, സുധീര്‍, കൊച്ചുപ്രേമന്‍, പൂജപ്പുര രാധാകൃഷ്ണന്‍, വി കെ ബൈജു, അജയ് വാസുദേവ്, കൊല്ലം ഷാ, ജിബിന്‍ സാബ്, പോള്‍ തടിക്കാരന്‍, എല്‍ദോ, അഡ്വ. ശാസ്തമംഗലം അജിത് കുമാര്‍, രാജ്കുമാര്‍, സനല്‍ കുമാര്‍, അനില്‍ പത്തനംതിട്ട, അരുന്ധതി, ശൈലജ, നാന്‍സി, ജീജാ സുരേന്ദ്രന്‍ തുടങ്ങിയവരും അഭിനയിക്കുന്നു. ഇന്‍വെസ്റ്റിഗേറ്റീവ് സസ്പെന്‍സ് ത്രില്ലര്‍ സ്വഭാവത്തിലുള്ള സിനിമയുടെ കഥ, തിരക്കഥ, സംഭാഷണം ദിനേശ് പള്ളത്ത് ആണ്.
◾മണിരത്നം ചിത്രം 'പൊന്നിയിന്‍ സെല്‍വന്‍ന്റ' രണ്ടാം ഭാഗത്തിന്റെ തിയറ്റര്‍ റണ്‍ അവസാനിച്ചതോടെ ക്ലോസിംഗ് കളക്ഷന്‍ റിപ്പോര്‍ട്ട് പുറത്തുവിട്ട് ടോളിവുഡ് ഡോട് കോം. 'പൊന്നിയിന്‍ സെല്‍വന്‍' ചിത്രത്തിന്റെ രണ്ടാം ഭാഗം തമിഴ്നാട്ടില്‍ നിന്ന് 136.40 കോടിയാണ് നേടിയിരിക്കുന്നത്. കേരളത്തില്‍ നിന്ന് ചിത്രം 16.80 കോടിയാണ് നേടിയത്. കര്‍ണാടകയില്‍ നിന്ന് ചിത്രം 21.10 കോടി രൂപയാണ് നേടിയിരിക്കുന്നത്. മണിരത്നത്തിന്റെ ഇതിഹാസ ചിത്രം 338.85 കോടി രൂപയാണ് ആകെ നേടിയിരിക്കുന്നത്. വിക്രം, കാര്‍ത്തി, ജയം രവി, ഐശ്വര്യ റായ് ബച്ചന്‍, തൃഷ കൃഷ്ണന്‍, റഹ്‌മാന്‍, പ്രഭു, ജയറാം, ശരത് കുമാര്‍, വിക്രം പ്രഭു, ബാബു ആന്റണി, റിയാസ് ഖാന്‍, ലാല്‍, അശ്വിന്‍ കാകുമാനു, റിയാസ് ഖാന്‍, ശോഭിത ധൂലിപാല, ഐശ്വര്യ ലക്ഷ്മി, ജയചിത്ര, ബാലാജി ശക്തിവേല്‍, റിയാസ് ഖാന്‍, അര്‍ജുന്‍ ചിദംബരം, സാറാ അര്‍ജുന്‍, കിഷോര്‍ തുടങ്ങി ഇന്ത്യന്‍ സിനിമയിലെ നിരവധി പ്രമുഖ താരങ്ങള്‍ ഒരുമിച്ച് അണിനിരന്ന ചിത്രമാണ് 'പൊന്നിയിന്‍ സെല്‍വന്‍'. തമിഴ്, മലയാളം, തെലുങ്ക്, കന്നഡ, ഹിന്ദി ഭാഷകളിലാണ് റിലീസ്. ബി ജയമോഹനും ഇളങ്കോ കുമാരവേലുമാണ് ചിത്രത്തിന്റെ തിരക്കഥ എഴുതിയിരിക്കുന്നത്.
◾ഹോണ്ട കാര്‍സ് ഇന്ത്യ തങ്ങളുടെ ഏറ്റവും പുതിയ എസ്യുവിയായ ഹോണ്ട എലിവേറ്റിനെ ഇന്ത്യന്‍ കാര്‍ വിപണിയില്‍ അവതരിപ്പിച്ചു. ഈ പുതിയ എസ്യുവി മോഡല്‍ ഹ്യുണ്ടായ് ക്രെറ്റ, കിയ സെല്‍റ്റോസ്, മാരുതി സുസുക്കി ഗ്രാന്‍ഡ് വിറ്റാര, സ്‌കോഡ കുഷാക്ക്, ഫോക്‌സ്വാഗണ്‍ ടൈഗണ്‍, എംജി ആസ്റ്റര്‍ എന്നിവയ്ക്ക് എതിരാളിയാവും. നിലവില്‍ ഹോണ്ടയ്ക്ക് രാജ്യത്ത് എസ്യുവി മോഡലുകളൊന്നുമില്ല. ആദ്യം ഇന്ത്യയില്‍ വില്‍പ്പനയ്‌ക്കെത്തും. ഹോണ്ട എലിവേറ്റ് ബുക്കിംഗ് 2023 ജൂലൈ മാസം മുതലാണ് ആരംഭിക്കുക. ഹോണ്ട സിറ്റി സെഡാനുമായി പങ്കിടുന്ന 1.5 ലിറ്റര്‍ DOHC i-VTEC പെട്രോള്‍ എഞ്ചിനാണ് ഹോണ്ട എലിവേറ്റിന് കരുത്തേകുന്നത്. ഈ എഞ്ചിന്‍ 121 പിഎസ് പവറും 145.1 എന്‍എം ടോര്‍ക്കും സൃഷ്ടിക്കുന്നു. 6 സ്പീഡ് മാനുവല്‍ ഗിയര്‍ബോക്‌സിലും വിപുലമായ സിവിടി ഓപ്ഷനിലും ഇത് ലഭ്യമാണ്. ഹോണ്ട സിറ്റിയില്‍ കണ്ടതിന് സമാനമായ ഹൈബ്രിഡ് വേരിയന്റിന്റെ സാധ്യതയും ഭാവിയില്‍ ഉണ്ടാകും. എലിവേറ്റിന് 10.25 ഇഞ്ച് ടച്ച്‌സ്‌ക്രീന്‍ ഇന്‍ഫോടെയ്ന്‍മെന്റ് സിസ്റ്റം, ഏഴ് ഇഞ്ച് എച്ച്ഡി കളര്‍ ടിഎഫ്ടി ഇന്‍സ്ട്രുമെന്റ് ക്ലസ്റ്റര്‍, വയര്‍ലെസ് സ്മാര്‍ട്ട്‌ഫോണ്‍ ഇന്റഗ്രേഷന്‍ ടെക്‌നോളജി എന്നിവ ലഭിക്കും. ജിയോ ഫെന്‍സിങ്, എമര്‍ജന്‍സി അസിസ്റ്റന്‍സ് തുടങ്ങിയ കണക്റ്റുചെയ്ത സവിശേഷതകള്‍ക്കായി ഇത് ഹോണ്ട കണക്റ്റിനൊപ്പം വരുന്നു.
◾കൂത്തുപറമ്പ് നിര്‍മ്മലഗിരി കോളേ ജില്‍ കായികാദ്ധ്യാപികയായിരുന്ന പ്രൊഫ. ഫിലോമിന ജോസഫിനെ സര്‍വ്വീസില്‍നിന്നു പിരിച്ചു വിട്ട മാനേജ്മെന്റിന്റെ നടപടിക്കെതിരെ വര്‍ഷങ്ങള്‍ നീണ്ട നിയമപോരാട്ടത്തിലൂടെ ജോലി തിരിച്ചു കിട്ടിയതിന്റെ കഥ പറയുകയാണ് ഒരു കായി കാദ്ധ്യാപികയുടെ തുറന്നെഴുത്ത് എന്ന കൃതി. കേരള ചരിത്രത്തിലെ സമാനതകളില്ലാത്ത ഈ നിയമപോരാട്ടം നമ്മുടെ നിയമസംവിധാനത്തിന്റെയും മാനേജ്മെന്റ് നിയമനങ്ങളുടെയും ഉള്ളറകളിലേക്ക് വെളിച്ചം വീശുന്നു. ഒരു സ്ത്രീയുടെ അതിജീ വനത്തിന്റെ ഒറ്റയാള്‍ പോരാട്ടമാണ് ഈ പുസ്തകത്തിലൂടെ പ്രൊഫ. ഫിലോമിന ജോസഫ് പറയുന്നത്. ഒരു കായികാധ്യാപിക നിയമയുദ്ധം ജയിച്ച കഥ. 'ഒരു കായികാധ്യാപികയുടെ തുറന്നെഴുത്ത്'. പ്രൊഫ ഫിലോമിന ജോസഫ്. കറന്റ് ബുക്സ് തൃശൂര്‍. വില 190 രൂപ.
◾സുരക്ഷിതമല്ലാത്ത ഭക്ഷണം 200ലധികം രോഗങ്ങള്‍ക്ക് കാരണമാകുമെന്നാണ് ലോകാരോഗ്യ സംഘടന പറയുന്നത്. ഡബ്യൂഎച്ച്ഒയുടെ കണക്കനുസരിച്ച് പത്തില്‍ ഒരാള്‍ മോശം ഭക്ഷണം കഴിക്കുന്നതുമൂലം രോഗബാധിതരാകുന്നുണ്ട്. ഇതിന്റെ ഫലമായി പ്രതിവര്‍ഷം 4,20,000 പേരാണ് മരണത്തിന് കീഴടങ്ങുന്നത്. കഴിക്കുന്ന ഭക്ഷണം സുരക്ഷിതമാണെന്ന് ഉറപ്പാക്കാന്‍ അഞ്ച് കാര്യങ്ങള്‍ ശ്രദ്ധിക്കാനാണ് ഡബ്യൂഎച്ച്ഒ ഓര്‍മ്മിപ്പിക്കുന്നത്. അടുക്കളയില്‍ കയറുന്നതിന് മുമ്പ് കൈകള്‍ വൃത്തിയായി കഴുകി ശുചിത്വം ഉറപ്പാക്കണം. പാചകത്തിലുടനീളം വൃത്തിക്ക് പ്രാധാന്യം നല്‍കാന്‍ ശ്രദ്ധിക്കണം. പാകം ചെയ്ത ഭക്ഷണപദാര്‍ത്ഥങ്ങളെയും പാകം ചെയ്യാത്തവയെയും ഒന്നിച്ച് വയ്ക്കരുത്. ഇവ പ്രത്യേകം പാത്രങ്ങളില്‍ വേണം സൂക്ഷിക്കാന്‍. ഭക്ഷണം നന്നായി പാകം ചെയുതുമാത്രം കഴിക്കാന്‍ ശ്രദ്ധിക്കണം. അണുക്കളെ നശിപ്പിക്കാനും പോഷകങ്ങള്‍ ഉറപ്പാക്കാനും നന്നായി പാകം ചെയ്യുന്നത് സഹായിക്കും. എല്ലാ ഭക്ഷണവും ഫ്രിഡ്ജില്‍ സൂക്ഷിക്കേണ്ടവയല്ല. ഓരോന്നും അതിന് അനുയോജ്യമായ അന്തരീക്ഷത്തില്‍ സൂക്ഷിക്കാന്‍ ശ്രദ്ധിക്കണം. ഭക്ഷണത്തിന്റെ ഗുണനിലവാരം ഉറപ്പാക്കാന്‍ ഇത് പ്രധാനമാണ്. പാചകത്തിന് ശുദ്ധമായ വെള്ളവും അസംസ്‌കൃതവസ്തുക്കളും ഉപയോഗിക്കാന്‍ പ്രത്യേക ശ്രദ്ധ നല്‍കണം.
*ശുഭദിനം*
ബാന്ദ്ര ബാന്റ്സ്റ്റാന്‍ഡിലെ അവസാനത്തെ ചേരിയിലെ ഒരു ചായ്പിലാണ് അവള്‍ ജനിച്ചത്. അച്ഛനും അനിയനും ആയിരുന്നു അവള്‍ക്ക് ഉണ്ടായിരുന്നത്.നിറം മങ്ങിയ കുറച്ച് പാവക്കുട്ടികളായിരുന്നു അവളുടെ ആകെ കൂട്ട്. ആ പാവക്കുട്ടികളെ ഒരുക്കുന്നതും മനോഹരമായി മുടി ചീകി ഒതുക്കുന്നതുമായിരുന്നു അവളുടെ സന്തോഷം. ഒരിക്കല്‍ താനും ആ പാവക്കുട്ടികളെ പോലെ മനോഹരിയായി മാറുമെന്ന് അവള്‍ സ്വപ്നം കണ്ടു. കുറച്ചുകൂടി വലുതായപ്പോള്‍ പ്രിയങ്കാ ചോപ്രയെപ്പോലെ ഒരു മോഡലാകാന്‍ അവള്‍ ആഗ്രഹിച്ചു. പക്ഷേ അതത്ര എളുപ്പമല്ലെന്ന് അവള്‍ക്ക് അറിയാമായിരുന്നു. മുഷിഞ്ഞ് കീറിയ ബനിയനും കീറിത്തുടങ്ങിയ ഒരു ട്രാക് സ്യൂട്ടുമിട്ട് അവള്‍ തന്റെ സ്വപ്നങ്ങളെ താലോലിച്ചു. കുറച്ചു കൂടി വലുതായപ്പോള്‍ അവള്‍ക്ക് സ്‌കൂളില്‍ ചേര്‍ന്ന് പഠിക്കാന്‍ സാധിച്ചു. 2020 ല്‍ മുംബൈ സന്ദര്‍ശനത്തിന് വന്ന ഹോളിവുഡ് നടനായ റോബര്‍ട്ട് ഹോഫ്മാന്‍ അവളുടെ ജീവിതത്തിന്റെ വഴിത്തിരിവായി മാറി. മോഡല്‍ ആകാനുളള ആഗ്രഹം അവള്‍ അദ്ദേഹത്തോട് പങ്കുവെച്ചു. അദ്ദേഹം അവള്‍ക്കൊരു ഇന്‍സ്റ്റ അക്കൗണ്ട് തുറന്നുകൊടുത്തു. ദിവസങ്ങള്‍ക്കുളളില്‍ ആ അക്കൗണ്ട് ചര്‍ച്ചാവിഷയമായി മാറി. അവളെയും കുടുംബത്തേയും ആളുകള്‍ സ്വീകരിച്ചു. 'ചേരിയില്‍ നിന്നുളള രാജകുമാരി ' എന്ന വിശേഷണം അവര്‍ അവള്‍ക്ക് ചാര്‍ത്തിക്കൊടുത്തു. കോസ്‌മോപൊളിറ്റന്‍ എന്ന മാഗസിന്റെ കവര്‍ ഗേള്‍ ആയി വന്നതോടെ ആ പതിനഞ്ചുകാരി ഫാഷന്‍ ലോകത്ത് ചര്‍ച്ചാവിഷയമായി. ഇത് മലീഷ ഖര്‍വ.. ആഡംബര സൗന്ദര്യം ബ്രാന്റായ ഫോറസ്റ്റ് എസന്‍ഷ്യല്‍സിന്റെ മുഖമാണ് ഇന്ന് മലീഷ. പ്രതിസന്ധികള്‍ ജീവിതത്തില്‍ ചോദ്യചിഹ്നമായി നില്‍ക്കുമ്പോള്‍ അതിനുള്ള ഉത്തരങ്ങള്‍ താന്‍ തന്നെ കണ്ടെത്തും എന്ന ആത്മവിശ്വാസത്തിന്റെ ആകെത്തുകയാണ് മലീഷ. അതെ, നമ്മളെ നമ്മുടെ സ്വപ്നങ്ങളിലേക്കെത്തിക്കുന്നതും ഈ ആത്മവിശ്വാസം തന്നെയാണ്.. ഈ ആത്മവിശ്വാസമാകട്ടെ നമ്മുടെയും കൈമുതല്‍ - *ശുഭദിനം.*
