◾മാലിന്യം വലിച്ചെറിയുന്നവരെ പിടികൂടാന്‍ സഹായിക്കുന്നവര്‍ക്കു സര്‍ക്കാര്‍ വക പാരിതോഷികം. 2,500 രൂപ വരെയോ നിയമലംഘകര്‍ക്കു ചുമത്തുന്ന പിഴയുടെ 25 ശതമാനമോ പാരിതോഷികമായി നല്‍കുമെന്നു വ്യക്തമാക്കിക്കൊണ്ടു സര്‍ക്കാര്‍ ഉത്തരവു പുറത്തിറക്കി.
◾മഹാരാജാസ് കോളേജില്‍ എഴുതാത്ത പരീക്ഷ ജയിച്ച എസ്എഫ്ഐ സംസ്ഥാന സെക്രട്ടറി പി എം ആര്‍ഷോയുടെ മാര്‍ക്ക് ലിസ്റ്റ് വിവാദത്തില്‍ ക്രൈം ബ്രാഞ്ച് അഞ്ചു പേര്‍ക്കെതിരേ കേസെടുത്തു. മഹാരാജാസ് കോളജ് ആര്‍ക്കിയോളജി വകുപ്പ് അധ്യാപകന്‍ ഡോ. വിനോദ് കുമാര്‍, പ്രിന്‍സിപ്പല്‍ ഡോ. വി.എസ്. ജോയ്, വാര്‍ത്ത റിപ്പോര്‍ട്ടു ചെയ്ത ഏഷ്യാനെറ്റ് റിപ്പോര്‍ട്ടര്‍ അഖില നന്ദകുമാര്‍, കെഎസ് യു സംസ്ഥാന പ്രസിഡന്റ് അലോഷ്യസ് സേവ്യര്‍, മഹാരാജാസ് കോളജ് യൂണിറ്റ് പ്രസിഡന്റ് സി.എ. ഫാസില്‍ എന്നിവരെ പ്രതികളാക്കിയാണ് ക്രൈം ബ്രാഞ്ച് കേസെടുത്തത്. എസിപി പയസ് ജോര്‍ജിന്റെ നേതൃത്വത്തിലുള്ള സംഘം പ്രിന്‍സിപ്പല്‍ ഡോ വി എസ് ജോയിയുടെ മൊഴി എടുത്തു.
◾ചുറ്റും നില്‍ക്കുന്നവര്‍ എത്ര ലക്ഷം ചെലവാക്കിയെന്ന് അറിയില്ലെന്നു മുഖ്യമന്ത്രി പിണറായി വിജയന്‍. ലോക കേരള സഭ ന്യൂയോര്‍ക്ക് മേഖലാ സമ്മേളനം ഉദ്ഘാടനം ചെയ്യുന്നതിനിടെയാണ് മുഖ്യമന്ത്രി ഇങ്ങനെ പ്രതികരിച്ചത്. സ്പോണ്‍സര്‍ഷിപ്പിന്റെ പേരില്‍ ലോക കേരള സഭയെ വിവാദമാക്കാന്‍ ചിലര്‍ ശ്രമിച്ചെന്നും മുഖ്യമന്ത്രി പറഞ്ഞു.
◾കേരള സര്‍ക്കാരിന് സംസ്ഥാനത്തെ സര്‍വകലാശാലകളെ നിയന്ത്രിക്കണമെങ്കില്‍ പ്രത്യേക വകുപ്പ് സൃഷ്ടിക്കാത്തത് എന്തുകൊണ്ടാണെന്നു ഗവര്‍ണര്‍ ആരിഫ് മുഹമ്മദ് ഖാന്‍. വ്യാജരേഖ ചമച്ചു ജോലി തരപ്പെടുത്താന്‍ ശ്രമിച്ചതുമായി ബന്ധപ്പെട്ടു പരാതി ലഭിച്ചാല്‍ നടപടി സ്വീകരിക്കുമെന്നും അദ്ദേഹം പറഞ്ഞു.
◾വിദ്യയെ അറസ്റ്റ് ചെയ്യേണ്ടത് സിപിഎമ്മല്ലെന്നു സിപിഎം സംസ്ഥാന സെക്രട്ടറി എം.വി. ഗോവിന്ദന്‍. വ്യാജ സര്‍ട്ടിഫിക്കറ്റുണ്ടാക്കി ജോലി നേടിയ കെ വിദ്യക്കെതിരായ കേസില്‍ നടപടി സ്വീകരിക്കും. മാര്‍ക്ക് ലിസ്റ്റുമായി ബന്ധപ്പെട്ട് എസ് എഫ് ഐ നേതാവ് ആര്‍ഷോക്കെതിരെ വലിയ ഗൂഢാലോചന നടന്നു. അതിന് പിന്നില്‍ ആരാണെങ്കിലും പുറത്തു കൊണ്ട് വരുമെന്നും ഗോവിന്ദന്‍.
◾കേരള സര്‍വകലാശാലയിലെ 39 യൂണിവേഴ്സിറ്റി യൂണിയന്‍ കൗണ്‍സിലര്‍മാര്‍ പ്രായപരിധി കഴിഞ്ഞതായി കണ്ടെത്തി. ഇവരെ അയോഗ്യരാക്കും. കാട്ടാക്കട കോളജിലെ യുയുസി ആള്‍മാറാട്ടം വിവാദമായിരിക്കേയാണ് യുയുസിമാരുടെ പ്രായം പരിശോധിച്ചത്.
◾യുയുസി ആള്‍മാറാട്ടം നടന്ന കാട്ടാക്കട ക്രിസ്ത്യന്‍ കോളേജ് ഒന്നര ലക്ഷം രൂപ പിഴയടയ്ക്കണമെന്നു കേരള യൂണിവേഴ്സിറ്റി. 1,55,938 രൂപ കോളേജിനോട് അടയ്ക്കാനാണ് സിന്റിക്കേറ്റ് ആവശ്യപ്പെട്ടത്.
◾കാലവര്‍ഷം കേരളം മുഴുവന്‍ വ്യാപിച്ചെന്ന് കേന്ദ്ര കാലാവസ്ഥ വകുപ്പ്. അടുത്ത അഞ്ചു ദിവസം വ്യാപകമായി ഇടി മിന്നലും കാറ്റോടു കൂടിയ മഴക്കു സാധ്യത.
◾കോണ്‍ഗ്രസിലെ ചേരിപ്പോരു പരിഹരിക്കാന്‍ എഐസിസി ജനറല്‍ സെക്രട്ടറി താരിഖ് അന്‍വര്‍ തിങ്കളാഴ്ച കേരളത്തിലെത്തും. കെപിസിസി പ്രസിഡന്റ്, ഗ്രൂപ്പു നേതാക്കള്‍, പ്രതിപക്ഷ നേതാവ് എന്നിവരുമായി ചര്‍ച്ച നടത്തും.
◾മുഖ്യമന്ത്രി പിണറായി വിജയന്റെ അഴിമതികള്‍ പുറത്തുകൊണ്ടുവന്നതിനു പ്രതികാരമായാണ് പ്രതിപക്ഷ നേതാവ് വി.ഡി. സതീശനെതിരെ വിജിലന്‍സ് കേസെടുത്തതെന്ന് കെപിസിസി പ്രസിഡന്റ് കെ സുധാകരനും മുന്‍ പ്രതിപക്ഷ നേതാവ് രമേശ് ചെന്നിത്തലയും. പുനര്‍ജനി പദ്ധതിക്കു വിദേശ സാമ്പത്തിക സഹായം സ്വീകരിച്ചതിനാണു കേസെടുത്തത്. അന്തംവിട്ട പിണറായി എന്തും ചെയ്യുമെന്ന മാനസികാവസ്ഥയിലാണെന്ന് സുധാകരന്‍ പറഞ്ഞു. സതീശന് എതിരായ ഈ ആരോപണം കോടതി തള്ളിയതാണെന്ന് ചെന്നിത്തല പറഞ്ഞു.
◾കോണ്‍ഗ്രസ് രാജ്യത്ത് നാമാവശേഷമാവുകയാണെന്ന വിവാദ പരാമര്‍ശവുമായി ഐഎന്‍ടിയുസി സംസ്ഥാന പ്രസിഡന്റ് ആര്‍. ചന്ദ്രശേഖരന്‍. പാര്‍ട്ടി നാമാവശേഷമാകുമ്പോള്‍ നമ്മള്‍ കൂടി ചവിട്ടിതാഴ്ത്താന്‍ ശ്രമിക്കുകയാണ്. ചന്ദ്രശേഖരന്‍ പറഞ്ഞു. കോണ്‍ഗ്രസ് ഗ്രൂപ്പ് പോരിന്റെ പശ്ചാത്തലത്തിലാണ് പരാമര്‍ശം. അംഗന്‍വാടി ആന്‍ഡ് ക്രഷ് വര്‍ക്കേഴ്സ് യൂണിയന്‍ കണ്ണൂര്‍ ജില്ലാ സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു ചന്ദ്രശേഖരന്‍.
◾കോഴിക്കോട് കൂടരഞ്ഞിയില്‍ ഓട്ടോയും ബൈക്കും കൂട്ടിയിടിച്ച് രണ്ടു പേര്‍ മരിച്ചു. ബൈക്ക് യാത്രക്കാരായ കാരശ്ശേരി പാറത്തോട് സ്വദേശി അമേസ് സെബാസ്റ്റ്യന്‍, കക്കാടംപൊയില്‍ തോട്ടപ്പള്ളി കുന്നത്ത് ജിബിന്‍ എന്നിവരാണു മരിച്ചത്.
https://chat.whatsapp.com/KUcwmZu73tp8N1SqpgHIyV
◾ആലുവ യുസി കോളജിനു സമീപം ഫുട്ബോള്‍ കളിക്കുന്നതിനിടെ ആല്‍മരം ഒടിഞ്ഞ് വീണ് ഏഴു വയസുകാരന്‍ മരിച്ചു. കരോട്ടുപറമ്പില്‍ രാജേഷിന്റെ് മകന്‍ അഭിനവ് കൃഷ്ണയാണ് മരിച്ചത്. വെള്ളാം ഭഗവതി ക്ഷേത്രത്തിലെ ആല്‍മരത്തിന്റെ കൊമ്പാണ് ഒടിഞ്ഞ് വീണത്.
◾വടക്കഞ്ചേരി ആയക്കാട് എഐ ക്യാമറ തകര്‍ത്ത കേസില്‍ ഒരാളെ പോലീസ് അറസ്റ്റ് ചെയ്തു. പുതുക്കോട് സ്വദേശി മുഹമ്മദ് എം.എസ് ആണ് പിടിയിലായത്. രണ്ടു പേര്‍ ഒളിവിലാണ്.
◾വൈദികനെന്നു വിശ്വസിപ്പിച്ച് തിരുവനന്തപുരത്തെ ഹോട്ടല്‍ വ്യവസായിയില്‍ നിന്ന് 35 ലക്ഷം രൂപ തട്ടിയെടുത്തെന്ന കേസില്‍ മുഖ്യ സൂത്രാധാരന്‍ അറസ്റ്റില്‍. പാലാ സ്വദേശി ജിഷാദ് (27) ആണ് അറസ്റ്റിലായത്. ഇതോടെ കേസുമായി ബന്ധപ്പെട്ട് അറസ്റ്റില്‍ ആയവരുടെ എണ്ണം ഏഴായി.
◾അതിരപ്പിള്ളി വെറ്റിലപ്പാറ അരൂര്‍ മുഴിയിലെ പുഴയില്‍ കാണാതായ യുവാവിന്റെ മൃതദേഹം കണ്ടെത്തി. കോയമ്പത്തൂര്‍ സ്വദേശിയായ അശോക് (35) ആണു മരിച്ചത്.
◾കോഴിക്കോട് കൊടിയത്തൂരില്‍ രണ്ടു കുട്ടികള്‍ക്കു നീര്‍നായയുടെ കടിയേറ്റു. കൊടിയത്തൂര്‍ കാരാട്ട് കുളിക്കടവില്‍ കുളിക്കുകയായിരുന്ന റാബിന്‍ (13), അദ്ഹം (13) എന്നീ വിദ്യാര്‍ത്ഥികള്‍ക്കാണ് കടിയേറ്റത്.
◾കണ്ണൂര്‍ എരഞ്ഞോളി കുടക്കളത്ത് കിണറ്റില്‍ വീണ ആറു കാട്ടുപന്നികളെ വെടിവെച്ചുകൊന്നു. വനം വകുപ്പ് ഉദ്യോഗസ്ഥരെത്തി പന്നികളെ പുറത്തെടുത്ത ശേഷം വെടിവച്ചു കൊല്ലുകയായിരുന്നു.
◾കര്‍ണാടകയില്‍ ബസുകളില്‍ സ്ത്രീകള്‍ക്കു സൗജന്യയാത്ര പദ്ധതിയുടെ ഉദ്ഘാടനം മുഖ്യമന്ത്രി സിദ്ധരാമയ്യ നാളെ നിര്‍വഹിക്കും. സിദ്ധരാമയ്യ ബസ് കണ്ടക്ടറുടെ വേഷത്തിലെത്തി സ്ത്രീകള്‍ക്ക് ടിക്കറ്റ് നല്‍കിയാണ് ഉദ്ഘാടനം ചെയ്യുന്നത്. നിയമസഭാ തെരഞ്ഞെടുപ്പിന് മുന്നോടിയായി കോണ്‍ഗ്രസ് വാഗ്ദാനം ചെയ്ത അഞ്ച് വാഗ്ദാനങ്ങളിലൊന്നാണ് ശക്തി പദ്ധതി.
◾ഉത്തര്‍പ്രദേശിലെ കാസ്ഗഞ്ച് ജില്ലയില്‍ സര്‍ക്കാരിന്റെ ഗോശാലയില്‍ പശുക്കള്‍ ചത്തനിലയില്‍. സംഭവത്തിന്റെ വീഡിയോ വൈറലായതിനെ തുടര്‍ന്ന് നാട്ടുകാര്‍ പ്രതിഷേധവുമായി രംഗത്തെത്തി. പശുക്കള്‍ക്ക് ദിവസങ്ങളായി തീറ്റ നല്‍കിയിട്ടില്ലെന്നും ചികിത്സ നല്‍കിയില്ലെന്നും നാട്ടുകാര്‍ ആരോപിച്ചു.
◾ഡല്‍ഹി കലാപക്കേസ് കെട്ടിച്ചമച്ചതെന്നു കോടതി. തെളിവില്ലാത്തതിനാല്‍ പ്രതിയായ നൂര്‍ മുഹമ്മദിനെ വെറുതെവിട്ട കോടതി പോലീസിനെ നിശിതമായി വിര്‍മശിക്കുകയും ചെയ്തു. കര്‍ക്കദ്ദൂമ കോടതിയാണ് വിധി പ്രസ്താവിച്ചത്.
◾മുസ്ലിം സംവരണം ഭരണഘനാ വിരുദ്ധമാണെന്ന നിലപാടാണു ബിജെപിക്കുള്ളതെന്ന് കേന്ദ്ര ആഭ്യന്തര മന്ത്രി അമിത് ഷാ. മതം അടിസ്ഥാനമാക്കിയുള്ള സംവരണം ആവശ്യമില്ലെന്നും അമിത്ഷാ മുംബൈയില്‍ പറഞ്ഞു.
◾ഒമ്പതു വര്‍ഷത്തിനകം പ്രധാനമന്ത്രി നരേന്ദ്രമോദിയുടെ നേതൃത്വത്തില്‍ ഇന്ത്യയുടെ പൊതുകടം മൂന്നു മടങ്ങു വര്‍ധിച്ച് 155 ലക്ഷം കോടി രൂപയായെന്ന് കോണ്‍ഗ്രസ്. 2014 ല്‍ 55 ലക്ഷം കോടി രൂപയായിരുന്നു പൊതുകടം. സാമ്പത്തിക സ്ഥിതി സംബന്ധിച്ച് കേന്ദ്ര സര്‍ക്കാര്‍ ധവളപത്രം ഇറക്കണമെന്നു കോണ്‍ഗ്രസ് വക്താവ് സുപ്രിയ ശ്രീനേറ്റ് ആവശ്യപ്പെട്ടു.
◾മണിപ്പൂരില്‍ ഇന്റര്‍നെറ്റ് നിരോധനം ഈ മാസം 15 വരെ നീട്ടി. കലാപമുണ്ടായ മെയ് മൂന്നിന് ആരംഭിച്ചതാണു നിരോധനം.
◾എന്‍സിപിയില്‍ ശരത് പവാറിന്റെ മകള്‍ സുപ്രിയ സുലെ, സീനിയര്‍ നേതാവ് പ്രഫുല്‍ പട്ടേല്‍ എന്നിവരെ വര്‍ക്കിംഗ് പ്രസിഡന്റുമാരായി നിയമിച്ചു. പാര്‍ട്ടി അധ്യക്ഷന്‍ ശരത് പവാറാണ് നിയമിച്ചത്. ഇരുവരേയും അഭിനന്ദിച്ച് അജിത് പവാര്‍ ട്വിറ്റു ചെയ്തിട്ടുണ്ട്.
◾ഗുസ്തി ഫെഡറേഷന്‍ പ്രസിഡന്റ് ബ്രിജ് ഭൂഷണെ അറസ്റ്റു ചെയ്തില്ലെങ്കില്‍ ഏഷ്യന്‍ ഗെയിംസില്‍ പങ്കെടുക്കില്ലെന്നു ഗുസ്തി താരങ്ങള്‍. തങ്ങള്‍ നേരിടുന്ന സമ്മര്‍ദം എത്ര വലുതാണെന്ന് ചില അധികാരികള്‍ക്കു മനസിലാകുന്നില്ലെന്ന് സാക്ഷി മാലിക്.
◾മുംബൈയില്‍ നിര്‍മാണം പൂര്‍ത്തിയാകാത്ത കെട്ടിടത്തിനു മുകളില്‍ കയറി ആരുമറിയാതെ നടത്തിയ ബിയര്‍ പാര്‍ട്ടിയില്‍ പങ്കെടുത്ത 19 കാരി ഏഴാം നിലയില്‍നിന്നു വീണു മരിച്ചു. പെണ്‍കുട്ടിയുടെ ആണ്‍സുഹൃത്തും മറ്റൊരു സുഹൃത്തും ചേര്‍ന്നാണു ബിയര്‍ പാര്‍ട്ടി നടത്തിയത്. പോലീസ് രണ്ടു യുവാക്കളേയും കസ്റ്റഡിയിലെടുത്തു ചോദ്യംചെയ്യുന്നു.
◾കമിതാക്കളുടെ കലഹത്തിനിടെ കാമുകന്‍ കാമുകിയുടെ തലക്കു വെട്ടി പരിക്കേല്‍പ്പിച്ച ശേഷം ട്രെയിനിനു മുന്നില്‍ ചാടി ആത്മഹത്യ ചെയ്തു. കന്യകുമാരിയിലാണ് ഡാന്‍ നിഷ എന്ന പെണ്‍കുട്ടിയെ വെട്ടിയ ശേഷം ബര്‍ജിന്‍ ജോഷ്വ എന്ന വിദ്യാര്‍ഥി ട്രെയിനിനു മുന്നില്‍ ചാടി ആത്മഹത്യ ചെയ്തത്.
◾കൊളംബിയയില്‍ ആമസോണ്‍ വനത്തില്‍ വിമാനം തകര്‍ന്നു കാണാതായ നാലു കുട്ടികളെ 40 ദിവസത്തിനുശേഷം ജീവനോടെ കണ്ടെത്തി. 11 മാസം പ്രായമുള്ള കുഞ്ഞ് അടക്കമുള്ള കുട്ടികളെയാണു കൊടുംവനത്തില്‍ സൈന്യം കണ്ടെത്തിയത്. വന്യജീവികളുടെ ആക്രമണത്തിന് ഇരയാകാതെ രക്ഷപ്പെട്ട ഇവര്‍ക്കു പ്രാണികള്‍ കടിച്ചതിന്റെ അസ്വസ്ഥതകള്‍ മാത്രമാണുള്ളത്. മേയ് ഒന്നിനു തകര്‍ന്നുവീണ ചെറുവിമാനത്തില്‍ ഉണ്ടായിരുന്ന കുട്ടികളുടെ അമ്മ അടക്കം മൂന്നു പേരുടെ മൃതദേഹങ്ങള്‍ വനത്തില്‍നിന്നു കണ്ടെടുത്തിരുന്നു.
◾ഫ്രാന്‍സിസ് മാര്‍പ്പാപ്പയ്ക്ക് ഉദര ശസ്ത്രക്രിയ വിജയകരമായി പൂര്‍ത്തിയാക്കി. എല്ലാവരുടേയും പ്രാര്‍ത്ഥനാ സഹായം വേണമെന്ന് മാര്‍പാപ്പ ആവശ്യപ്പെട്ടു.
◾ഓസ്ട്രേലിയക്കെതിരായ ലോക ടെസ്റ്റ് ക്രിക്കറ്റ് ചാമ്പ്യന്‍ഷിന്റെ ഫൈനലില്‍ ഇന്ത്യ പൊരുതുന്നു. 444 റണ്‍സ് വിജയലക്ഷ്യവുമായ് രണ്ടാമിന്നിംഗ്സിനിറങ്ങിയ ഇന്ത്യ നാലാം ദിനമായ ഇന്നലെ കളി അവസാനിക്കുമ്പോള്‍ 164 ന് 3 എന്ന നിലയിലാണ്. 44 റണ്‍സെടുത്ത വിരാട് കോലിയും 20 റണ്‍സെടുത്ത അജിങ്ക്യാ രഹാനെയുമാണ് ക്രീസില്‍. ഒരു ദിവസവും ഏഴ് വിക്കറ്റുകളും ശേഷിക്കുന്ന ഇന്ത്യക്ക് ചാമ്പ്യന്‍ഷിപ്പ് വിജയത്തിനായ് 280 റണ്‍സകലെമേയുള്ളൂ. നേരത്തേ എട്ട് വിക്കറ്റ് നഷ്ടത്തില്‍ 270-റണ്‍സെന്ന നിലയില്‍ ഓസ്‌ട്രേലിയ രണ്ടാം ഇന്നിങ്‌സ് ഡിക്ലയര്‍ ചെയ്യുകയായിരുന്നു.
◾പോളിഷ് താരം ഇഗ സ്വിയാടെകിന് ഫ്രഞ്ച് ഓപ്പണ്‍ വനിതാ കിരീടം. നിലവിലെ ചാമ്പ്യന്‍ കൂടിയായ ഇഗ ചെക്ക് റിപ്പബ്ലിക് താരം കരോളിന മുക്കോവോയെ പരാജയപ്പെടുത്തിയാണ് കിരീടം സ്വന്തമാക്കിയത്. ഇഗ സ്വിയാടെക്കിന്റെ മൂന്നാം ഫ്രഞ്ച് ഓപ്പണ്‍ കിരീടമാണിത്. നേരത്തേ 2020,2022 വര്‍ഷങ്ങളില്‍ ഇഗ ഫ്രഞ്ച് ഓപ്പണില്‍ ജേതാവായിരുന്നു.
◾ഫ്രഞ്ച് ഓപ്പണ്‍ പുരുഷകിരീടത്തിനായ് സെര്‍ബിയന്‍ സൂപ്പര്‍താരം ജോക്കോവിച്ചും നോര്‍വീജിയന്‍ താരം കാസ്പര്‍ റൂഡും ഇന്ന് ഏറ്റുമുട്ടും. വൈകീട്ട് 6 മണിക്കാണ് മത്സരം. കിരീടം നേടാനായാല്‍ ഏറ്റവും കൂടുതല്‍ ഗ്രാന്‍ഡ്സ്ലാം നേടുന്ന പുരുഷതാരമെന്ന ചരിത്രനേട്ടം ജോക്കോവിച്ചിന് സ്വന്തമാക്കാം. നിലവില്‍ ജോക്കോവിച്ചിനും നദാലിനും 22-ഗ്രാന്‍ഡസ്ലാം കിരീടങ്ങളാണുള്ളത്.
◾ഡിജിറ്റല്‍ പണമിടപാടുകളില്‍ ലോകത്തെ പ്രമുഖ രാജ്യങ്ങളെ പിന്നിലാക്കി ഒന്നാമതെത്തി ഇന്ത്യ. സര്‍ക്കാരിന്റെ സിറ്റിസണ്‍ എന്‍ഗേജ്മെന്റ് പ്ലാറ്റ്ഫോമായ 'മൈഗവ്ഇന്ത്യ'യില്‍ നിന്നുള്ള 2022-ലെ കണക്കുകള്‍ പ്രകാരം 8.95 കോടി ഡിജിറ്റല്‍ ഇടപാടുകളാണ് രാജ്യത്ത് നടന്നത്. ഈ കാലയളവിലെ ആഗോള ഡിജിറ്റല്‍ പണമിടപാടുകളുടെ 46 ശതമാനവും ഇന്ത്യയിലാണ് നടന്നത്. 2.92 കോടി ഡിജിറ്റല്‍ ഇടപാടുകളോടെ ബ്രസീല്‍ ആണ് രണ്ടാം സ്ഥാനത്തെത്തിയത്. 1.76 കോടി ഇടപാടുകളുമായി ചൈന മൂന്നാം സ്ഥാനത്തും 1.65 കോടി ഇടപാടുകളുമായി തായ്ലന്‍ഡ് നാലാം സ്ഥാനത്തുമെത്തി. 80 ലക്ഷം ഡിജിറ്റല്‍ ഇടപാടുകളോടെ പിന്നാലെ ദക്ഷിണ കൊറിയയും ഉണ്ട്. നേട്ടം ഒറ്റ ദശാബ്ദത്തിനകം നോട്ട് അസാധുവാക്കലിന് മുമ്പ് ഇന്ത്യയില്‍ നാമമാത്രമായിരുന്ന ഡിജിറ്റല്‍ പണമിടപാടുകള്‍ കഴിഞ്ഞ ഒറ്റ ദശാബ്ദത്തിനകമാണ് ഈ നേട്ടം കൈവരിച്ചതെന്നത് ശ്രദ്ധേയമാണ്. ഇത് ഇന്ത്യയുടെ പണമിടപാട് സംവിധാനത്തിന്റെയും അതിന്റെ സ്വീകാര്യതയുടെയും കരുത്തിനെ സൂചിപ്പിക്കുന്നുവെന്ന് ആര്‍.ബി.ഐയിലെ വിദഗ്ധര്‍ പറയുന്നു.
◾അനാര്‍ക്കലി മരിയ്ക്കാറും ശരത് അപ്പാനിയും ശ്രീകാന്തും മുഖ്യ വേഷത്തിലെത്തുന്ന പാന്‍ ഇന്ത്യന്‍ ചിത്രമായ 'അമലയിലെ 'ഒഫീഷ്യല്‍ ട്രെയിലര്‍ പുറത്തിറങ്ങി. നവാഗതനായ നിഷാദ് ഇബ്രാഹിം സംവിധാനം ചെയ്യുന്ന ചിത്രം മസ്‌കോട്ട് പ്രൊഡക്ഷന്‍സിന്റെയും ടോമ്മന്‍ എന്റര്‍ടെയ്ന്‍മെന്‍സിന്റെയും ബാനറില്‍ മുഹ്സിന നിഷാദ് ഇബ്രാഹിം ആണ് നിര്‍മ്മിക്കുന്നത്. മലയാളത്തിലും തമിഴിലും തെലുങ്കിലും ഒരുങ്ങുന്ന ഈ ചിത്രം ഒരു സസ്‌പെന്‍സ് സൈക്കോ ത്രില്ലര്‍ ആണ്. അമല എന്ന കേന്ദ്ര കഥാപാത്രമായി അനാര്‍ക്കലി മരിയ്ക്കാര്‍ ആണ് ഈ ചിത്രത്തില്‍ എത്തുന്നത്. ബേസില്‍ എന്ന കഥാപാത്രം ആയി ശരത് അപ്പാനിയും അലി അക്ബര്‍ എന്ന അന്വേഷണ ഉദ്യോഗസ്ഥന്‍ ആയി ശ്രീകാന്തും എത്തുന്നു. അനാര്‍ക്കലി മരിയ്ക്കാര്‍ ,ശരത് അപ്പാനി ശ്രീകാന്ത് എന്നിവര്‍ക്ക് ഒപ്പം രജീഷാ വിജയന്‍,സജിത മഠത്തില്‍,ചേലാമറ്റം ഖാദര്‍,ഷുഹൈബ് എംബിച്ചി, നന്ദിനി, നൈഫ്, നൗഷാദ്, വൈഷ്ണവ്, ആന്‍മരിയ ബിട്ടോ ഡേവിഡ്സ്, എന്നീ താരങ്ങളും ഈ ചിത്രത്തില്‍ പ്രധാന വേഷങ്ങളില്‍ എത്തുന്നു. ചിത്രം ജൂണ്‍ 16 ന് പാന്‍ ഇന്ത്യന്‍ റിലീസായി തിയ്യേറ്ററുകളില്‍ എത്തും.
◾ബോക്‌സ് ഓഫീസില്‍ വലിയ വിജയം നേടിയ 'ദി കേരള സ്റ്റോറി'ക്ക് ശേഷം സംവിധായകന്‍ സുദീപ്തോ സെന്‍ പുതിയ സിനിമ പ്രഖ്യാപിച്ചു. സഹാറ ഇന്ത്യ പരിവാര്‍ സ്ഥാപകനും വ്യവസായിയുമായ സുബ്രതാ റോയിയുടെ ജീവിതത്തെ ആസ്പദമാക്കിയുള്ള 'സഹാറശ്രീ' എന്ന ചിത്രമാണ് ഇദ്ദേഹം ഒരുക്കുന്നത്. ചിത്രം പെന്‍ സ്റ്റുഡിയോ നിര്‍മ്മിക്കും എആര്‍ റഹ്‌മാനാണ് സംഗീതം. ചിത്രത്തിന്റെ ടൈറ്റില്‍ ടീസര്‍ പുറത്തുവിട്ടു. ജൂണ്‍ 10-ന് സുബ്രത റോയിയുടെ 75-ാത്തെ ജന്മദിനത്തിലാണ് നിര്‍മ്മാതാക്കളായ സന്ദീപ് സിംഗ്, ഡോ. ജയന്തിലാല്‍ ഗഡ എന്നിവര്‍ ചിത്രം പ്രഖ്യാപിച്ചത്. വളരെ ചെറിയ നിലയില്‍ നിന്നും ഇന്ത്യയിലെ അറിയപ്പെടുന്ന കമ്പനിയായി സഹാറ മാറിയതും. അതിനുണ്ടായ തിരിച്ചടികളും എല്ലാം ചിത്രത്തിലുണ്ടാകും എന്നാണ് സൂചന. ഇന്ത്യന്‍ സിനിമയിലെ ഒരു സൂപ്പര്‍താരം തന്നെ സുബ്രത റോയിയെ അവതരിപ്പിക്കും എന്നാണ് വിവരം. എ ആര്‍ റഹ്‌മാന്‍ സംഗീതവും ഗുല്‍സാറിന്റെ വരികളും ഒരുക്കുന്നു. ഋഷി വിര്‍മാണി, സുദീപ്തോ സെന്‍, സന്ദീപ് സിംഗ് എന്നിവരാണ് തിരക്കഥ എഴുതിയിരിക്കുന്നത്. അടുത്ത വര്‍ഷം ആദ്യം ചിത്രം തിയറ്ററുകളിലെത്തും, മഹാരാഷ്ട്ര, ഉത്തര്‍പര്‍ദേശ്, ഡല്‍ഹി, ബിഹാര്‍, കൊല്‍ക്കത്ത, ലണ്ടന്‍ എന്നിവിടങ്ങളില്‍ വിപുലമായി ചിത്രത്തിന്റെ ഷൂട്ടിംഗ് നടക്കും.
◾എന്‍ട്രി ലെവല്‍ ഇലക്ട്രിക് എസ്യുവി ഇഎക്‌സ്30യുടെ ചിത്രങ്ങള്‍ പുറത്തുവിട്ട് വോള്‍വോ. 474 കിലോമീറ്റര്‍ റേഞ്ചും 427 എച്ച്പി കരുത്ത് പുറത്തെടുക്കുന്ന ഇരട്ട മോട്ടോറുമുള്ള ചെറു എസ്യുവിയാണ് ഇഎക്‌സ്30. ജീപ്പ് അവഞ്ചര്‍ ഇവി, സ്മാര്‍ട്ട് #1 എന്നിവരായിരിക്കും ഇഎക്‌സ്30യുടെ പ്രധാന എതിരാളികള്‍. യൂറോപ്പിനു പുറമേ ഓസ്‌ട്രേലിയയിലും ജപ്പാനിലും തായ്‌ലാന്‍ഡിലും ആദ്യഘട്ടത്തില്‍ ഇഎക്‌സ് 30 വില്‍പനക്കെത്തും. വോള്‍വോ പുറത്തിറക്കുന്ന ഏറ്റവും കുറഞ്ഞ കാര്‍ബണ്‍ ഫൂട്ട്പ്രിന്റുള്ള കാറെന്നാണ് ഇഎക്‌സ്30യെ കമ്പനി വിശേഷിപ്പിക്കുന്നത്. വെറും 3.6 സെക്കന്‍ഡില്‍ മണിക്കൂറില്‍ 100 കിലോമീറ്റര്‍ വേഗതയിലേക്ക് കുതിക്കാന്‍ ഇഎക്‌സ്30ക്ക് സാധിക്കും. രണ്ടു ബാറ്ററി ടൈപ്പുകളിലാണ് ഇഎക്‌സ് 30 വരുന്നത്. എന്‍ട്രി ലെവല്‍ സിംഗിള്‍ മോട്ടോറുമായി 271എച്പി കരുത്ത് പുറത്തെടുക്കുന്ന 51കിലോവാട്ട്അവര്‍ ലിഥിയം അയേണ്‍ ഫോസ്‌ഫേറ്റ് ബാറ്ററിയാണ് ചേര്‍ത്തിരിക്കുന്നത്. ഈ ബാറ്ററി ഉപയോഗിച്ച് ഒറ്റ ചാര്‍ജില്‍ 342 കിലോമീറ്റര്‍ സഞ്ചരിക്കാന്‍ സാധിക്കും. ഏറ്റവും ഉയര്‍ന്ന മോഡലില്‍ 158എച്പിയുടെ മറ്റൊരു ഇലക്ട്രിക് മോട്ടോര്‍ കൂടി മുന്നില്‍ പിടിപ്പിച്ചിട്ടുണ്ട്. ഇതോടെ ട്വിന്‍ മോട്ടോര്‍ മോഡലിന്റെ കരുത്ത് 427എച്പി ആയി വര്‍ധിക്കും.
◾പത്രപംക്തിയുടെ ആനുകാലികത അതിജീവിച്ച് ജനാധിപത്യത്തെയും അധികാരരാഷ്ട്രീയത്തെയും രാഷ്ട്രവ്യവഹാരത്തെയും ദേശീയതാവാദത്തെയും കുറിച്ചുള്ള തീക്ഷ്ണവും ധാര്‍മ്മികവുമായ ചോദ്യങ്ങള്‍ ഉയര്‍ത്തിയതുകൊണ്ടാണ് വിജയന്റെ പംക്തിലേഖനങ്ങള്‍ക്ക് തുടര്‍വായനകളും പുസ്തകരൂപത്തിലുള്ള പ്രസാധനങ്ങളും ഉണ്ടായത്. ഈ പുസ്തകത്തിന്റെ പ്രസിദ്ധീകരണവും അങ്ങനെയാണ്. ഒ.വി. വിജയന്‍ മലയാളത്തിലും ഇംഗ്ലിഷിലുമായി എഴുതിയ സാഹിത്യവും സാഹിത്യേതരവുമായ മുഴുവന്‍ രചനകളും കാര്‍ട്ടൂണുകളും രേഖാചിത്രങ്ങളും മുദ്രിതരൂപത്തില്‍ അവതരിപ്പിക്കുന്നതിനുവേണ്ടി കുറച്ചു വര്‍ഷങ്ങളായി നടത്തിക്കൊണ്ടിരിക്കുന്ന ശ്രമത്തിന്റെ ഫലംകൂടിയാണ് ഈ പുസ്തകം. 'ഇന്ദ്രപ്രസ്ഥം'. ഒ വി വിജയന്‍. ഡിസി ബുക്സ്. വില 480 രൂപ.
◾തലയ്ക്കുള്ളില്‍ ഉണ്ടാകുന്ന ചിന്തകള്‍ക്ക് ശരീരത്തില്‍ വേദനയുണ്ടാക്കാന്‍ സാധിക്കുമെന്ന് ഈ പഠനങ്ങള്‍ ചൂണ്ടിക്കാട്ടുന്നു. ഒഹിയോ സ്റ്റേറ്റ് സര്‍വകലാശാലയിലെയും യൂണിവേഴ്സിറ്ററി ഓഫ് മിഷിഗണിലെയും ഗവേഷകര്‍ ചേര്‍ന്നാണ് പഠനം നടത്തിയത്. ഗവേഷണത്തില്‍ പങ്കെടുത്തവരെ ദുരിതപൂര്‍വവും അസഹ്യവുമായ ചില ദൃശ്യങ്ങള്‍ കാണിക്കുകയും നെഗറ്റീറ്റ് ചിന്തകളും വികാരങ്ങളും ഉണര്‍ത്തുന്ന ചില ടാസ്‌കുകളില്‍ അവരെ ഏര്‍പ്പെടുത്തിക്കുകയും ചെയ്തു. ഈ നെഗറ്റീവ് മാനസിക നില ഇവരുടെ വേദനയെ കുറിച്ചുള്ള കാഴ്ചപ്പാടില്‍ കാര്യമായ സ്വാധീനം ചെലുത്തിയതായും വേദനയുടെ തീവ്രതയും സംവേദനത്വവും കൂട്ടിയതായും ഗവേഷകര്‍ നിരീക്ഷിച്ചു. തലച്ചോറിനെയും വികാരങ്ങളെയും വേദന വിശകലനം ചെയ്യുന്ന കേന്ദ്രങ്ങളെയും കൂട്ടിയിണക്കുന്ന നാഡീവ്യൂഹപരമായ ശൃംഖലയാണ് ഈ പ്രതിഭാസത്തിന് പിന്നിലെന്ന് ഗവേഷകര്‍ കരുതുന്നു. നെഗറ്റീവ് ചിന്തകളും വികാരങ്ങളും സമ്മര്‍ദ ഹോര്‍മോണുകളുടെയും ന്യൂറോട്രാന്‍സ്മിറ്ററുകളുടെയും ഉല്‍പാദനത്തെ ഉത്തേജിപ്പിക്കുന്നതും വേദനയുടെ സംവേദനത്വത്തെ അധികരിപ്പിക്കും. മാനസിക കാരണങ്ങളായ ഉത്കണ്ഠയും വിഷാദവും വേദനയെ കുറിച്ചുള്ള തോന്നല്‍ വര്‍ധിപ്പിക്കാമെന്നും ഗവേഷണ റിപ്പോര്‍ട്ട് പറയുന്നു. വൈദ്യശാസ്ത്ര, മനഃശാസ്ത്ര മേഖലകളില്‍ കാര്യമായ ചലനം ഉണ്ടാക്കാന്‍ പഠനത്തിലെ കണ്ടെത്തലുകള്‍ക്ക് സാധിക്കും. വിട്ടുമാറാത്ത വേദന അനുഭവിക്കുന്ന രോഗികളുടെ ചികിത്സയില്‍ കോഗ്നിറ്റീവ് ബിഹേവിയര്‍ തെറാപ്പി, റിലാക്സേഷന്‍ ടെക്നിക്കുകള്‍ എന്നിവ പ്രയോജനപ്പെടാമെന്നും ഗവേഷകര്‍ കരുതുന്നു. വൈദ്യശാസ്ത്ര പ്രഫഷണലുകള്‍ ശാരീരികമായ ലക്ഷണങ്ങളെ മാത്രം പരിഗണിക്കാതെ മാനസികവും വൈകാരികവുമായ ഘടകങ്ങളെ കൂടി പരിഗണിച്ച് ചികിത്സ പദ്ധതി തയാറാക്കണമെന്നും റിപ്പോര്‍ട്ട് കൂട്ടിച്ചേര്‍ക്കുന്നു.
*ശുഭദിനം*
*കവിത കണ്ണന്‍*
1845 ല്‍ ഭാര്യ വീട്ടിലില്ലാതിരുന്ന സമയത്ത് ഷോണ്‍ബീന്‍ ഒരു പരീക്ഷണം നടത്താനായി അടുക്കളിയിലെത്തി. തിരക്കിട്ട് കാര്യങ്ങള്‍ ചെയ്യന്നതിനിടയില്‍ ഒരു ബീക്കറില്‍ സൂക്ഷിച്ചിരുന്ന നൈട്രിക് ആസിഡ് - സള്‍ഫ്യൂറിക് ആസിഡ് മിശ്രിതം കൈതട്ടി നിലത്ത് വീണു. ഭാര്യ തിരിച്ചുവരുന്നതിന് മുമ്പ് അവിടം വൃത്തിയാക്കായി കൈയില്‍ കിട്ടിയ തുണിയെടുത്ത് നിലത്ത് വീണ ആസിഡ് തുടച്ചു. തുടച്ചതിന് ശേഷമാണ് അത് ഭാര്യയുടെ വസ്ത്രമാണെന്ന് മനസ്സിലായത്. എളുപ്പത്തില്‍ ഉണക്കാനായി അത് സ്‌ററൗവിന് മുകളില്‍ ഉണക്കാനിട്ടു. തൂക്കിയിട്ടതും ചെറുസ്‌ഫോടനത്തോടെ വസ്ത്രത്തിന് തീപിടിച്ചു. പുക ലേശം പോലും വരാതെയാണ് ആ പരുത്തിതുണി കത്തിതീര്‍ന്നത്. അടുക്കളയിലെ സംഭവങ്ങള്‍ അദ്ദേഹം ഒരിക്കല്‍ കൂടി തന്റെ ലബോറട്ടിയില്‍ ആവര്‍ത്തിച്ചു. ചൂടാക്കുമ്പോള്‍ സെല്ലുലോസ് നൈട്രേറ്റ് സ്‌ഫോടനത്തോടെ, പുക ഒട്ടും ഇല്ലാതെ കത്തുന്നതായി അദ്ദേഹം കണ്ടു. സിവിലിലും മില്‍ട്ടറിയിലും ആവശ്യങ്ങള്‍ക്ക് ഉപയോഗിക്കുന്ന ഗണ്‍കോട്ടണ്‍ എന്ന സ്‌ഫോടകവസ്തു അവിടെ ജനിക്കുകയായിരുന്നു അറിവിന്റെ ഉറവിടമാണ് പ്രകൃതി. അന്വേഷണം പ്രകൃതിയിലേക്കാണെങ്കില്‍ അറിവ് ഉത്പാദിക്കപ്പെടുകതന്നെചെയ്യും. അന്വേഷണമാണ് അറിവിന്റെ ഉറവിടം. - ശുഭദിനം.
