സ്‌കൂള്‍- കോളജ് വിദ്യാര്‍ഥികള്‍ക്ക് എംഡിഎംഎയും കഞ്ചാവും വില്‍ക്കുന്ന ആളാണ് പ്രതിയെന്ന് എക്സൈസ് സംഘം പറഞ്ഞു. എംഡിഎംഎ അര ഗ്രാമിന്റെ ചെറിയ പൊതികളില്‍ ആക്കി ഒരു പൊതിക്ക് 2000 രൂപ വച്ചാണ് വില്‍പന നടത്തുക. കഞ്ചാവ് ഒരു പൊതിക്ക് 500 രൂപയും 1000 രൂപയുമാണ് വില.
പ്രത്യേക കോഡ് ഉപയോഗിച്ച് ഫോണ്‍ വഴിയാണ് വില്‍പന. പേക്ക്-എം, ജോയിന്റ് എന്നിവയാണ് കോഡ് ഭാഷ. ഇയാള്‍ താമസിച്ചിരുന്ന വീടിന്റെ കിടപ്പ് മുറിയില്‍ നിന്നും 17.21 ഗ്രാം എംഡിഎംഎ, കഞ്ചാവ്, ഒരു എയര്‍ ഗണ്‍, വടിവാള്‍, 6000 രൂപ എന്നിവയാണ് പിടിച്ചെടുത്തത്. വട്ടപ്പാറ പോലീസ് സ്റ്റേഷനില്‍ മാത്രം ഇയാളുടെ പേരില്‍ 4 കേസുകള്‍ ഉണ്ട്.
ശത്രുക്കള്‍ ഉള്ളതിനാലാണ് വടിവാള്‍ സൂക്ഷിക്കുന്നതെന്നാണ് ഇയാള്‍ ഉദ്യോഗസ്ഥരോട് പറഞ്ഞത്. 6 മാസമായി ഇയാള്‍ ഇവിടെ വാടകയ്ക്ക് താമസിച്ചു വരികയാണ്. പ്രതിയെ ഇന്ന് കോടതിയില്‍ ഹാജരാക്കുമെന്ന് ഉദ്യോഗസ്ഥര്‍ പറഞ്ഞു. നെടുമങ്ങാട് എക്സൈസ് സിഐ ബി ആര്‍ സ്വരൂപ്, പ്രിവന്റീവ് ഓഫിസര്‍മാരായ രഞ്ജിത്ത്, സിവില്‍ എക്സൈസ് ഓഫിസര്‍മാരായ ഷജീം, സജി, രാജേഷ് കുമാര്‍, മുനീര്‍, വനിത സിവില്‍ എക്സൈസ് ഓഫിസര്‍ രജിത എന്നിവര്‍ അടങ്ങുന്ന സംഘമാണ് പ്രതിയെ പിടികൂടിയത്.
