◾ബ്രഹ്‌മപുരം മാലിന്യ പ്ലാന്റിലെ തീപിടിത്തവും കൊച്ചിയിലെ മാലിന്യപ്പുകയും സംബന്ധിച്ച വിഷയത്തില്‍ ഹൈക്കോടതി സ്വമേധയാ കേസെടുത്തു. വിഷയത്തില്‍ ഇടപെടണമെന്ന് ഹൈക്കോടതി ചീഫ് ജസ്റ്റിസിന് ജസ്റ്റിസ് ദേവന്‍ രാമചന്ദ്രന്‍ കത്തു നല്‍കിയിരുന്നു. ജനങ്ങളെ ഗുരുതരമായി ബാധിക്കുന്നതിനാല്‍ എത്രയും വേഗം ഇടപെടണമെന്ന് ആവശ്യപ്പെട്ടാണു കത്തു നല്‍കിയത്. സംസ്ഥാന മനുഷ്യാവകാശ കമ്മീഷനും കേസെടുത്തു.
◾വിഷപ്പുക അടങ്ങിയില്ല, കൊച്ചിയില്‍ ഏഴാം ക്ലാസ് വരെയുള്ള വിദ്യാര്‍ത്ഥികള്‍ക്ക് ഇന്നും ജില്ലാ കളക്ടര്‍ അവധി പ്രഖ്യാപിച്ചു. പൊതു പരീക്ഷകള്‍ക്ക് മാറ്റമില്ല.
◾ബ്രഹ്‌മപുരം മാലിന്യ പ്ലാന്റിലെ തീയണച്ചെന്ന് എറണാകുളം ജില്ലാ കളക്ടര്‍. പുക ശമിപ്പിക്കാന്‍ വ്യോമസേനയുടെ ഹെലികോപ്ടറുകള്‍ ഇന്നു വെള്ളമൊഴിക്കും. 30 ഫയര്‍ യൂണിറ്റുകളും, 125 അഗ്നി രക്ഷാ സേനാംഗങ്ങളും അഞ്ചു ദിവസം അധ്വാനിച്ചാണ് തീയണച്ചത്. മാലിന്യമലയുടെ അടിയില്‍ തീയെരിഞ്ഞ് പുക ഉയരുന്നതു തടയാനുള്ള ശ്രമം ഇന്നും തുടരും. നേവിയുടേയും എയര്‍ഫോഴ്സിന്റേയും സേവനവും തുടരും. ജില്ലാ കളക്ടര്‍ പറഞ്ഞു.
◾ഈ വര്‍ഷം നാല്‍പത്തി മൂവായിരത്തിലധികം വനിതകള്‍ പുതു സംരംഭങ്ങള്‍ ആരംഭിച്ചെന്ന അവകാശവാദവുമായി വ്യവസായ മന്ത്രി പി. രാജീവ്. വനിതാദിനമായ നാളെ വ്യവസായ വകുപ്പിന്റെ ആഭിമുഖ്യത്തില്‍ വനിതാ സംരംഭകരുടെ സംഗമം നടത്തുമെന്നും മന്ത്രി അറിയിച്ചു. അഞ്ഞൂറിലേറെ പേര്‍ പങ്കെടുക്കുന്ന സംഗമം മന്ത്രി വീണ ജോര്‍ജ് ഉദ്ഘാടനം ചെയ്യും.
◾കെഎസ്ആര്‍ടിസിയില്‍ ശമ്പളം ഗഡുക്കളാക്കുന്നതിനെതിരേ തത്കാലം സമരമില്ലെന്ന് സിഐടിയു. മന്ത്രിയുമായി നടത്തിയ ചര്‍ച്ച പ്രയോജനകരമെന്ന് സിഐടിയു നേതാക്കള്‍ പറഞ്ഞു. ഈ മാസം 18 ന് വിഷയത്തില്‍ വീണ്ടും ചര്‍ച്ച നടത്തും. ഈ മാസം 14, 15 തീയതികളില്‍ സിഐടിയു നേതാക്കള്‍ യോഗം ചേര്‍ന്നു നിലപാടെടുക്കും.
◾വൈക്കം സത്യഗ്രഹത്തിന്റെ നൂറാം വാര്‍ഷികം കേരളവും തമിഴ്നാടും ചേര്‍ന്ന് ആഘോഷിക്കണമെന്ന് തമിഴ്നാട് മുഖ്യമന്ത്രി എം കെ സ്റ്റാലിന്‍ ആവശ്യപ്പെട്ടു. മുഖ്യമന്ത്രി പിണറായി വിജയനോടാണ് അദ്ദേഹം ഈ ആവശ്യം ഉന്നയിച്ചത്. നാഗര്‍കോവിലില്‍ മാറു മറയ്ക്കല്‍ സമരത്തിന്റെ 200 ാം വാര്‍ഷിക സമ്മേളനത്തില്‍ പിണറായി വിജയനും എംകെ സ്റ്റാലിനും വേദി പങ്കിട്ടപ്പോഴാണ് ഈ ആവശ്യം ഉന്നയിച്ചത്.
◾മൈക്ക് ഓപ്പറേറ്ററെ ശകാരിച്ചതല്ല, മൈക്കിന്റെ പ്രവര്‍ത്തനത്തെക്കുറിച്ചു ക്ലാസെടുത്തതാണെന്ന് സിപി എം സംസ്ഥാന സെക്രട്ടറി എം വി ഗോവിന്ദന്‍. മാളയില്‍ പ്രസംഗത്തിനിടെ മൈക്കിന് അരികിലേക്കു ചേര്‍ന്നു നിന്നു പ്രസംഗിക്കാന്‍ ഉപദേശിച്ച മൈക്ക് ഓപറേറ്ററോട 'പോയേ, നല്ല മൈക്കു കൊണ്ടുവരാത്തതിനു ഞാനല്ല ഉത്തരവാദി'യെന്നു തുടങ്ങി സംസാരിച്ചത് ശകാരമല്ലെന്നാണു വിശദീകരണം.
◾ശശി തരൂരിന്റെ ട്വിറ്റര്‍ ഫോളോവേഴ്സ് കുറയുന്നു. അദ്ദേഹംതന്നെയാണ് ഇക്കാര്യം ട്വിറ്റു ചെയ്തത്. ഒരാഴ്ച മുന്‍പ് 84.96 ലക്ഷം ഫോളോവേഴ്സ് ഉണ്ടായിരുന്നു. ഇപ്പോള്‍ 84.91 ലക്ഷം പേരായി കുറഞ്ഞു. അയ്യായിരം പേര്‍ കുറഞ്ഞത് എന്തോ കാര്യത്തിന്റെ പ്രതിഫലനമാണ്. അത് എന്താണെന്ന് എനിക്ക് അറിയില്ല. തന്റെ കാഴ്ചപ്പാടുകള്‍ ഭാഗികമായി മനസിലാക്കുന്നവരാകാം വിട്ടുപോയത്. എന്റെ പുസ്തകങ്ങള്‍ വായിക്കണമെന്നാണ് അവരോട് എന്റെ അഭ്യര്‍ത്ഥന - ട്വിറ്ററില്‍ ശശി തരൂര്‍ കുറിച്ചു.
◾മുഖ്യമന്ത്രിക്കെതിരേ യൂത്ത് കോണ്‍ഗ്രസുകാരുടെ കരിങ്കൊടി പ്രതിഷേധം തുടര്‍ന്നാല്‍ പ്രതിപക്ഷ നേതാവ് വി.ഡി. സതീശന്‍ വീട്ടിലിരിക്കേണ്ടിവരുമെന്ന് എല്‍ഡിഎഫ് കണ്‍വീനര്‍ ഇ.പി. ജയരാജന്‍. സതീശനെ പുറത്തിറങ്ങാന്‍ എല്‍ഡിഎഫ് പ്രവര്‍ത്തകര്‍ അനുവദിക്കില്ലെന്ന് ജയരാജന്‍ പറഞ്ഞു.
◾കഷായത്തില്‍ വിഷം ചേര്‍ത്ത് കാമുകന്‍ ഷാരോണിനെ ഗ്രീഷ്മ കൊലപ്പെടുത്തിയെന്ന കേസില്‍ ക്രൈംബ്രാഞ്ച് നെയ്യാറ്റിന്‍കര കോടതിയില്‍ കുറ്റപത്രം സമര്‍പ്പിച്ചു. കഷായത്തില്‍ വിഷം കലര്‍ത്തി തന്നെന്നു ഷാരോണ്‍ ബന്ധുവിനോടു പറഞ്ഞെന്നും ഇരുവരും തമ്മില്‍ പലവതവണ ലൈംഗിക ബന്ധത്തില്‍ ഏര്‍പ്പെട്ടിട്ടുണ്ടെന്നും കുറ്റപത്രത്തില്‍ ആരോപിക്കുന്നു.
◾വാളയാറില്‍ 130 ഗ്രാം എംഡിഎംഎയുമായി രണ്ടുപേര്‍ അറസ്റ്റില്‍. ചാവക്കാട് സ്വദേശികളായ ഉമര്‍ ഹാരിസ്, കൃഷ്ണ പ്രസാദ് എന്നിവരാണ് പിടിയിലായത്.
◾തിരുവല്ലയില്‍ പ്രാണിയുടെ കുത്തേറ്റ് ചികിത്സയിലായിരുന്ന പതിമൂന്നുകാരി മരിച്ചു. കോച്ചാരിമുക്കം പാണാറയില്‍ അനീഷിന്റെയും ശാന്തികൃഷ്ണയുടെയും മകള്‍ അംജിത പി. അനീഷാണ് മരിച്ചത്. കുത്തേറ്റ് അധികം വൈകാതെ ദേഹം മുഴുവന്‍ ചൊറിഞ്ഞ് തടിച്ചു. തിരുവല്ല താലൂക്ക് ആശുപത്രിയിലും പിന്നീട് സ്വകാര്യ ആശുപത്രിയിലും എത്തിച്ചു. ചികില്‍സ തുടങ്ങിയപ്പോഴേക്കും അംജിത കുഴഞ്ഞു വീണിരുന്നു.
◾മുഖ്യമന്ത്രി പിണറായി വിജയന്റെ നാഗര്‍കോവില്‍ യാത്രക്കു മുന്നോടിയായി യൂത്ത് കോണ്‍ഗ്രസ് പ്രവര്‍ത്തകരെ കരുതല്‍ തടങ്കലിലാക്കി. നെയ്യാറ്റിന്‍കരയിലും പാറശാലയിലുമുള്ള യൂത്ത് കോണ്‍ഗ്രസ് നേതാക്കളെയാണു പോലീസ് പിടികൂടിയത്.
◾മുഖ്യമന്ത്രി പിണറായി വിജയന്‍ നാടിന്റെ ഐശ്വര്യമല്ല, മഹാദുരന്തമാണെന്ന് കെപിസിസി പ്രസിഡന്റ് കെ സുധാകരന്‍ എംപി. എല്‍ഡിഎഫ് കണ്‍വീനര്‍ ഇപി ജയരാജന്‍ പിണറായി വിജയനെ സ്തുതിച്ചു പാടിയാലും കേരളം വിശ്വസിക്കില്ലെന്ന് കെ സുധാകരന്‍ പറഞ്ഞു.
◾അബുദാബിയില്‍നിന്ന് കണ്ണൂര്‍ വിമാനത്താവളത്തില്‍ എത്തിയ ഗോ ഫസ്റ്റ് വിമാനത്തിന്റെ ശുചിമുറിയില്‍നിന്ന് 1.42 കോടി രൂപ വിലവരുന്ന സ്വര്‍ണം പിടികൂടി. 2,536 ഗ്രാം സ്വര്‍ണമാണു പിടിച്ചത്. കടത്താന്‍ ശ്രമിച്ചയാളെ കണ്ടെത്താന്‍ അന്വേഷണം നടക്കുന്നുണ്ട്.
◾തൊടുപുഴയില്‍ സ്വകാര്യ പണമിടപാട് സ്ഥാപനത്തില്‍ മുക്കുപണ്ടം പണയംവച്ച് ഏഴര ലക്ഷം രൂപ തട്ടിയയാള്‍ അറസ്റ്റില്‍. ഇടവെട്ടി കോയിക്കല്‍ വീട്ടില്‍ റെജിമോനാണ് തൊടുപുഴ പൊലീസിന്റെ പിടിയിലായത്.
◾മാളയിലെ ബിലീവേഴ്സ് ആശുപത്രിയുടെ പിന്നിലുള്ള പാടത്ത് തീപിടിത്തം. 35 ഏക്കറോളം പാടം കത്തിനശിച്ചു
◾ത്രിപുരയില്‍ മുഖ്യമന്ത്രിയായി മണിക് സാഹ തുടരും. ബിജെപി നിയമസഭ കക്ഷി യോഗത്തിലാണ് തീരുമാനം. ബിപ്ലബ് ദേബ് കുമാറിന് പകരം കഴിഞ്ഞ വര്‍ഷമാണ് മണിക് സാഹ മുഖ്യമന്ത്രിയായത്. ബുധനാഴ്ചയാണ് സത്യപ്രതിജ്ഞ.
◾മദ്യനയ കേസില്‍ അറസ്റ്റിലായ ഡല്‍ഹി മുന്‍ ഉപമുഖ്യമന്ത്രി മനീഷ് സിസോദിയ മാര്‍ച്ച് 20 വരെ തിഹാര്‍ ജയിലില്‍. ഡയറി, ഭഗവത് ഗീത, പേന, കണ്ണട എന്നിവ ജയില്‍ സെല്ലില്‍ കൈവശംവയ്ക്കാന്‍ കോടതി അനുമതി നല്‍കി.
◾കര്‍ണാടക മുന്‍ മുഖ്യമന്ത്രി ബി.എസ്. യെദിയൂരപ്പ ഹെലികോപ്റ്റര്‍ അപകടത്തില്‍നിന്ന് അദ്ഭുതകരമായി രക്ഷപ്പെട്ടു. കല്‍ബൂര്‍ഗിയിലെ ഹെലിപാഡില്‍ ഇറക്കാന്‍ ശ്രമിച്ചപ്പോഴേക്കും ഹെലികോപ്റ്ററിന്റെ ശക്തമായ കാറ്റില്‍ കടലാസുകളും പ്ലാസ്റ്റിക് കവറുകളും പൊടിപടലങ്ങളും പറന്നുയര്‍ന്ന് പൈലറ്റിനു ഒന്നും കാണാനാവാത്ത അവസ്ഥയായി. ഏറെ നേരത്തെ ശ്രമത്തിനൊടുവിലാണ് നിലത്തിറക്കാന്‍ കഴിഞ്ഞത്.
◾തെറ്റിദ്ധാരണാ ജനകമായ പരസ്യങ്ങള്‍ അവതരിപ്പിക്കരുതെന്ന് സെലിബ്രിറ്റികള്‍ക്കും സോഷ്യല്‍ മീഡിയ ഇന്‍ഫ്ളുവന്‍സര്‍മാര്‍ക്കും കേന്ദ്ര ഉപഭോക്തൃ മന്ത്രാലയത്തിന്റെ മാര്‍ഗനിര്‍ദേശം. പരസ്യമാണോ സ്പോണ്‍സേഡ് പ്രോഗ്രാമാണോ പാര്‍ടണര്‍ഷിപ്പാണോയെന്നു വ്യക്തമാക്കണം. പരസ്യദാതാവിന്റെ നിലവാരം പരസ്യത്തിലെ അവകാശവാദങ്ങള്‍ എന്നിവയെക്കുറിച്ച് അവബോധം ഉണ്ടായിരിക്കണമെന്നും നിര്‍ദേശം.
◾പാകിസ്ഥാനിലെ ബലൂചിസ്ഥാനിലെ സൈബി മേഖലയില്‍ ചാവേര്‍ സ്ഫോടനത്തില്‍ ഒമ്പതു പൊലീസ് ഉദ്യോഗസ്ഥര്‍ കൊല്ലപ്പെട്ടു. ചാവേര്‍ ബോംബര്‍ ബൈക്ക് പൊലീസ് ട്രക്കിലേക്ക് ഓടിച്ചുകയറ്റിയാണ് സ്‌ഫോടനം നടത്തിയത്.
◾അനധികൃത മാര്‍ഗങ്ങളിലൂടെ എത്തുന്ന അഭയാര്‍ത്ഥികള്‍ക്കെതിരെ ഇംഗ്ലണ്ട്. ചെറുബോട്ടുകളില്‍ രാജ്യത്ത് എത്തിയ ശേഷം പൗരത്വം സ്വന്തമാക്കുന്ന രീതി അവസാനിപ്പിക്കാന്‍ പുതിയ നിയമം. ചെറുബോട്ടുകളില്‍ എത്തുന്നവര്‍ക്കു നിരോധനം ഏര്‍പ്പെടുത്തും.
◾ജനസംഖ്യാ നിരക്കു വര്‍ധിപ്പിച്ചില്ലെങ്കില്‍ ജപ്പാന്‍ എന്ന രാജ്യം ഇല്ലാതാകുമെന്ന് പ്രധാനമന്ത്രി ഫുമിയോ കിഷിഡയുടെ ഉപദേശകനും മുന്‍ മന്ത്രിയുമായ മസാകോ മോറി. കഴിഞ്ഞ വര്‍ഷം എട്ടു ലക്ഷം കുഞ്ഞുങ്ങളാണു ജനിച്ചത്. 16 ലക്ഷത്തോളം പേര്‍ മരിച്ചു. ജനന നിരക്ക് അതിവേഗം കുറയുകയാണ്. 2008 ല്‍ ജനസംഖ്യ 12.8 കോടിയായിരുന്നു. ഇപ്പോള്‍ 12.46 കോടിയായി കുറഞ്ഞു. അദ്ദേഹം ചൂണ്ടിക്കാട്ടി.
◾വനിതാ പ്രീമിയര്‍ ലീഗില്‍ റോയല്‍ ചലഞ്ചേഴ്‌സ് ബാംഗ്ലൂരിനെ ഒമ്പത് വിക്കറ്റിന് തകര്‍ത്ത് മുംബൈ ഇന്ത്യന്‍സ്. ലീഗില്‍ മുംബൈയുടെ തുടര്‍ച്ചയായ രണ്ടാം ജയവും ബാംഗ്ലൂരിന്റെ തുടര്‍ച്ചയായ രണ്ടാം തോല്‍വിയുമാണിത്. ബാഗ്ലൂര്‍ ഉയര്‍ത്തിയ 156 റണ്‍സ് വിജയലക്ഷ്യം വെറും 14.2 ഓവറില്‍ തന്നെ മുംബൈ മറികടന്നു. 3 വിക്കറ്റും പുറത്താകാതെ 77 റണ്‍സും നേടിയ ഹയ്‌ലി മാത്യൂസിന്റെ പ്രകടനമാണ് മുംബൈക്ക് ആധികാരിക ജയമൊരുക്കിയത്.
◾രാജ്യത്ത് 2000 രൂപയുടെ നോട്ടുകള്‍ അച്ചടിക്കുന്നത് നിര്‍ത്തലാക്കി റിസര്‍വ് ബാങ്ക് ഓഫ് ഇന്ത്യ. 2018- 19 സാമ്പത്തിക വര്‍ഷത്തിലാണ് 2000 രൂപ നോട്ടുകള്‍ അച്ചടിക്കുന്നത് റിസര്‍വ് ബാങ്ക് അവസാനിപ്പിച്ചത്. റിപ്പോര്‍ട്ടുകള്‍ പ്രകാരം, റിസര്‍വ് ബാങ്ക് ഇതുവരെ 37 ലക്ഷത്തിലധികം 2000 രൂപ നോട്ടുകള്‍ മാത്രമാണ് അച്ചടിച്ചിട്ടുള്ളത്. വിവരാവകാശ രേഖയിലാണ് ആര്‍ബിഐ ഇക്കാര്യം വ്യക്തമാക്കിയത്. 2000 രൂപയുമായി താരതമ്യം ചെയ്യുമ്പോള്‍ 100 രൂപ, 200 രൂപ, 500 രൂപ നോട്ടുകള്‍ അച്ചടിക്കാനുളള ചെലവ് കുറവാണ്. 2021- 22 കാലയളവില്‍ ആയിരം 100 രൂപ നോട്ട് അച്ചടിക്കാന്‍ ആകെ ചെലവായ തുക 1,770 മാത്രമാണ്. ഇക്കാലയളവില്‍ ആയിരം 200 രൂപ നോട്ടുകള്‍ അച്ചടിക്കാന്‍ 2,370 രൂപയും, ആയിരം 500 രൂപ നോട്ടുകള്‍ അച്ചടിക്കാന്‍ 2,290 രൂപയും ചെലവായിട്ടുണ്ട്. 2000 രൂപ നോട്ടുകള്‍ അച്ചടിക്കാന്‍ ചെലവഴിച്ച തുക 3,530 രൂപയാണ്.
◾മാസ് മഹാരാജ എന്ന് തെലുങ്ക് പ്രേക്ഷകര്‍ വിളിക്കുന്ന രവി തേജയുടെ പുതിയ ചിത്രത്തിന്റെ ടീസര്‍ ഇറങ്ങി. രാവണാസുര എന്ന ചിത്രം സംവിധാനം ചെയ്തിരിക്കുന്നത് സുധീര്‍ വര്‍മ്മയാണ്. ഒരു ക്രൈം ത്രില്ലര്‍ എന്ന നിലയിലാണ് ചിത്രം ഒരുക്കിയിരിക്കുന്നത്. മലയാള താരം ജയറാം ചിത്രത്തിലെ സുപ്രധാന റോള്‍ ചെയ്യുന്നുണ്ട്. അന്വേഷണ ഉദ്യോഗസ്ഥന്റെ റോളിലാണ് ജയറാം അഭിനയിക്കുന്നത്. ജയറാം അവതരിപ്പിക്കുന്ന ഒരു പോലീസ് ഉദ്യോഗസ്ഥന്‍ അന്വേഷിക്കുന്ന ഒരു പെണ്‍കുട്ടിയുടെ മരണത്തിന്റെ ക്രൈം സീനില്‍ നിന്നാണ് ടീസര്‍ ആരംഭിക്കുന്നതായി കാണിക്കുന്നു. രവി തേജ ഒരു അഭിഭാഷകനായാണ് എന്നാണ് ടീസര്‍ നല്‍കുന്ന സൂചന. എന്നാല്‍ ഈ കഥാപാത്രത്തില്‍ വ്യത്യസ്ഥ മുഹൂര്‍ത്തങ്ങള്‍ ടീസറില്‍ കാണിക്കുന്നുണ്ട്. രവിതേജയുടെ ക്യാരക്ടര്‍ വില്ലനാണോ നായകനാണോ എന്ന് തീര്‍ച്ചപ്പെടുത്താന്‍ കഴിയാത്ത രീതിയിലാണ് ടീസര്‍ എന്ന് പറയാം. ചിത്രത്തില്‍ മേഘാ ആകാശ്, ഫാരിയ അബ്ദുള്ള, ദക്ഷ നഗര്‍കര്‍, പൂജിത പൊന്നാട എന്നിവര്‍ പ്രധാന കഥാപാത്രങ്ങളെ അവതരിപ്പിക്കും. രാവണാസുര 2023 ഏപ്രില്‍ 8 നാണ് തിയേറ്ററുകളില്‍ എത്തുന്നത്.
◾കൊരടാല ശിവ സംവിധാനം ചെയ്യുന്ന ചിത്രത്തില്‍ ജൂനിയര്‍ എന്‍ടിആര്‍ ആണ് നായകനാകുന്നത്. 'എന്‍ടിആര്‍ 30' എന്ന് വിളിപ്പേരുള്ള ചിത്രത്തില്‍ ജാന്‍വി കപൂറായിരിക്കും നായിക എന്ന് ഔദ്യോഗികമായി പ്രഖ്യാപിച്ചിരിക്കുകയാണ്. റെക്കോര്‍ഡ് പ്രതിഫലമായിരിക്കും ജാന്‍വി കപൂര്‍ ചിത്രത്തിനായി വാങ്ങിക്കുക എന്നാണ് റിപ്പോര്‍ട്ട്. 3.5 കോടി രൂപയായിരിക്കും പ്രതിഫലം എന്നും ചിത്രവുമായി ബന്ധപ്പെട്ട വൃത്തങ്ങള്‍ പറയുന്നു. എന്തായിരിക്കും ജൂനിയര്‍ എന്‍ടിആറിന്റെയും ജാന്‍വിയുടെയും കഥാപാത്രങ്ങള്‍ എന്നതടക്കമുള്ള വിവരങ്ങള്‍ പുറത്തുവിട്ടിട്ടില്ല. ജാന്‍വി കപൂറിനെ സ്വാഗതം ചെയ്ത് ഫോട്ടോ പുറത്തുവിട്ടിട്ടുണ്ട് 'എന്‍ടിആര്‍ 30'ന്റെ പ്രവര്‍ത്തകര്‍. 'എന്‍ടിആര്‍ 30' 2024 ഏപ്രില്‍ അഞ്ചിനാണ് റിലീസ് ചെയ്യുക. അനിരുദ്ധ് രവിചന്ദര്‍ ചിത്രത്തിന്റെ സംഗീത സംവിധാനം നിര്‍വഹിക്കുന്നു. രത്നവേലു ആണ് ഛായാഗ്രാഹണം നിര്‍വഹിക്കുന്നത്. സാബു സിറിലാണ് പ്രൊഡക്ഷന്‍ ഡിസൈന്‍.
◾ഇന്നോവ ഹൈ ക്രോസിന്റെ വില കൂട്ടിയതിനൊപ്പം പുതിയ ഒരു വേരിയന്റും കൂടി അവതരിപ്പിച്ച് ടൊയോട്ട. ലോഞ്ച് ചെയ്ത് രണ്ടുമാസത്തിനുള്ളില്‍ തന്നെ വിപണിയില്‍ സൂപ്പര്‍സ്റ്റാറായ ഹൈ ക്രോസിന് വില കൂട്ടിയിരിക്കുകയാണ് ടൊയോട്ട. 25000 മുതല്‍ 75000 വരെയാണ് വില കൂട്ടിയിരിക്കുന്നത്. കഴിഞ്ഞ വര്‍ഷം ഡിസംബറിലാണ് ടൊയോട്ട ഇന്നോവ ഹൈ ക്രോസ്സിനെ വിപണിയില്‍ അവതരിപ്പിച്ചത്. പുതുക്കിയ വിലയനുസരിച്ച് 18.5 ലക്ഷം മുതല്‍ 29.72 ലക്ഷം രൂപ വരെയാണ് ഇന്നോവ ഹൈ ക്രോസ് മോഡലിന്റെ വില. ജി, ജി എക്സ്, വി എക്സ്, സെഡ് എക്സ് എന്നീഓപ്ഷന്‍ എന്നീ ട്രിമ്മുകളില്‍ ഹൈക്രോസ് ലഭ്യമാകും. ജി, ജി എക്സ് ട്രിമ്മുകളില്‍ നാച്ചുറല്‍ ആസ്പിരേറ്റഡ് എന്‍ജിനാണ്. 7-8 സീറ്റര്‍ വകഭേദങ്ങള്‍ ഇവയ്ക്കുണ്ട്. വി എക്സ് (ഒ) എന്നൊരു പുതിയ വേരിയന്റ് ഹൈക്രോസിനു ടൊയോട്ട നല്‍കിയിട്ടുണ്ട്. വി എക്സ്, സെസ് എക്സ് എന്നിവയ്ക്കിടയിലാണ് ഈ വേരിയന്റിന്റെ സ്ഥാനം. ഹൈബ്രിഡ് മോഡലില്‍ മാത്രമേ ഈ വേരിയന്റ് ലഭ്യമാകൂ. ഏഴ് സീറ്ററിനു 26.73 ലക്ഷവും 8 സീറ്ററിനു 26.78 ലക്ഷവുമാണ് എക്സ് ഷോറൂം വില.
◾ഉടല്‍ ഒരു കളിയും കളിസ്ഥലവുമാണ്. വെള്ളിത്തിരയിലെ കാമരൂപങ്ങള്‍. തിരയടങ്ങാത്ത തൃഷ്ണകളിലും കാമനകളിലും അത് അഭിരമിക്കുന്നു. കാണക്കാണെ ഉറപ്പില്ലായ്മയിലും അത്യന്തം അപകടങ്ങളിലും ചെന്നു പതിയ്ക്കും. അനുകമ്പയുടെയും ഹിംസയുടെയും അരുകുകളില്‍, അപ്രതീക്ഷിത സംഭവങ്ങളില്‍, സംഭ്രമങ്ങളില്‍ ഉടല്‍നിലകള്‍ മാറിമറിയും. സിനിമ ശരീരങ്ങളുടെ ദൃശ്യസമാഹാരമാണ്. ഭാഷയ്ക്കും ദൃശ്യത്തിനും ദൃശ്യപരിചരണത്തിനും പൂര്‍ണ്ണമായി വിശദീകരിക്കാനാവാത്ത അനുഭവസ്ഥലങ്ങള്‍ ഉടലുകളില്‍ ആണ്ടുകിടക്കുന്നുണ്ട്. അതില്‍ മലയാളിയുടെ സാംസ്‌കാരിക ചരിത്രം ആലേഖനം ചെയ്തിട്ടുണ്ട്. നാമത് എങ്ങനെ വായിക്കും? 'തിരയടങ്ങാത്ത ഉടല്‍'. കെ. പി. ജയകുമാര്‍. ലോഗോസ് ബുക്സ്. വില 220 രൂപ.
◾ഭക്ഷണത്തിന് രുചി കൂട്ടുന്ന ഒന്നാണ് കറുവയില എന്ന ബേലീഫ്. രുചി കൂട്ടുക മാത്രമല്ല നിരവധി ആരോഗ്യഗുണങ്ങളും കറുവയിലയ്ക്കുണ്ട്. ആയുര്‍വേദ ചികിത്സയില്‍ നിരവധി രോഗങ്ങള്‍ക്ക് കറുവയില ഔഷധമാണ്. കറുവയില ഉണക്കിയാണ് ഉപയോഗിക്കുന്നത്. ദഹനപ്രശ്നങ്ങള്‍ക്കും ചര്‍മസംരക്ഷണത്തിനും എല്ലാം കറുവയില പരിഹാരമേകും. എന്നാല്‍ ഒരു ദിവസം ഒരു ഗ്രാമിലധികം ഉപയോഗിച്ചാല്‍ വിയര്‍ക്കാനും അമിതമായി മൂത്രം പോകാനും കാരണമാകുമെന്ന് ആരോഗ്യവിദഗ്ധര്‍, അതുകൊണ്ടുതന്നെ അമിതമായ അളവില്‍ കറുവയില ഉപയോഗിക്കാതെ ശ്രദ്ധിക്കണമെന്നു മാത്രം. ഉണങ്ങിയ കറുവയില കത്തിച്ച പുക ശ്വസിക്കുന്നത് നാഡീ സംവിധാനത്തെ ശാന്തമാക്കുന്നു. മാനസിക പ്രവര്‍ത്തനങ്ങള്‍ മെച്ചപ്പെടുത്തുന്നു. കൂടാതെ ഉത്കണ്ഠയും സമ്മര്‍ദവും അകറ്റുന്നു. ഇവ പാന്‍ക്രിയാറ്റിക് ബീറ്റാകോശങ്ങളുടെ നാശം തടയുകയും ഇന്‍സുലിന്റെ ഉല്‍പാദനം വര്‍ധിപ്പിക്കുകയും ഇതുവഴി രക്തത്തിലെ പഞ്ചസാരയുടെ അളവ് കുറയ്ക്കുകയും ചെയ്യുന്നു. ശരീരത്തിലെ പ്രധാന അവയവങ്ങള്‍ക്ക്, ദീര്‍ഘകാലമായുള്ള പ്രമേഹം മൂലമുണ്ടാകുന്ന കേടുപാടുകള്‍ തടയാനും കറുവയിലയ്ക്ക് കഴിവുണ്ടെന്ന് പഠനങ്ങള്‍ പറയുന്നു. എല്‍ഡിഎല്‍ കൊളസ്ട്രോള്‍ അഥവാ ചീത്ത കൊളസ്ട്രോളിന്റെ അളവ് കുറയ്ക്കാനും നല്ല കൊളസ്ട്രോളിന്റെ അളവ് കൂട്ടാനും കറുവയില സഹായിക്കുന്നു. ഇത് ഹൃദ്രോഗസാധ്യതയും കുറയ്ക്കുന്നു. ഇതില്‍ ധാരാളം വൈറ്റമിന്‍ എ ഉണ്ട്. ഇത് കാഴ്ചശക്തി മെച്ചപ്പെടുത്തുന്നു.
*ശുഭദിനം*
ചിത്രം വരച്ച് പട്ടണത്തില്‍ കൊണ്ടുപോയി വില്‍ക്കുകയാണ് അയാളുടെ ജോലി. പക്ഷേ, കുറെ നാളുകളായി അയാളുടെ ചിത്രങ്ങളൊന്നും വിറ്റുപോവുന്നുണ്ടായിരുന്നില്ല. അതില്‍ നിരാശനായി ഒരു റോഡരുകില്‍ ഇരിക്കുമ്പോഴാണ് കൂട്ടുകാരന് ബൈക്കില്‍ വന്ന് അയാളുടെ മുന്നില്‍ നിന്നത്. അയാളുടെ മുഖം കണ്ടപ്പോള്‍ തന്നെ കൂട്ടുകാരന് എന്തോ പ്രശ്‌നമുണ്ടെന്ന് മനസ്സിലായി. കൂട്ടുകാരന് അയാളെ തന്റെ ബൈക്കില്‍ കയറ്റി യാത്ര തുടര്‍ന്നു. യാത്രയ്ക്കിടയില്‍ അയാള്‍ തന്റെ അവസ്ഥ കൂട്ടുകാരനോട് പറഞ്ഞു: ഒരാഴ്ചയായി എന്റെ ഒരു ചിത്രം പോലും വില്‍ക്കുവാനായില്ല. ഞാന്‍ എന്റെ ചിത്രം വര തന്നെ നിര്‍ത്തുകയാണ്. ഇത് കേട്ട കൂട്ടുകാരന് ബൈക്ക് നിര്‍ത്തി. എന്നിട്ട് കാല് നിലത്തുകുത്താതെ ബൈക്ക് ബാലന്‍സ് ചെയ്യാനുളള ശ്രമം തുടങ്ങി. ഇത് കണ്ട് അയാള്‍ ചോദിച്ചു: എന്ത് മണ്ടത്തരമാണ് നീ ഈ കാണിക്കുന്നത്. ബൈക്ക് മറിയും... ഇതു കേട്ട് കൂട്ടുകാരന് പറഞ്ഞു: അതെ, ബൈക്ക് ഓടുമ്പോള്‍ നമുക്ക് ബാലന്‍സ് കിട്ടുന്നത് പോലെ നിര്‍ത്തുമ്പോള്‍ കിട്ടണമെന്നില്ല. ഇതുപോലെയാണ് നമ്മള്‍ ചെയ്യുന്ന കാര്യങ്ങളും. നിരാശപ്പെട്ട് ഇടയ്ക്ക് വെച്ച് നിര്‍ത്തിയാല്‍ വീണുപോകും. വീഴാതിരിക്കാന്‍ ഏറ്റവും നല്ല വഴി മുന്നോട്ട് ഓടിക്കൊണ്ടേയിരിക്കുക എന്നതാണ് യാത്രകളില്‍ തടസ്സങ്ങള്‍ ഉണ്ടാകും. എല്ലാ യാത്രയും തടസ്സരഹിതമായി മുന്നോട്ട് പോകണമെന്നില്ല. അതുപോലെ തന്നെയാണ് നമ്മുടെ തൊഴിലും. തടസ്സങ്ങള്‍ സ്വതസിദ്ധമാണ്. അതിനെ തരണം ചെയ്ത് മുന്നോട്ട് പോയാല്‍ മാത്രമേ വിചാരിക്കുന്നിടത്ത് നമുക്ക് എത്തിച്ചേരാന്‍ സാധിക്കൂ.. ആഗ്രഹിക്കുന്നത് കൈവരിക്കാന്‍ സാധിക്കൂ... വീഴാതിരിക്കാന്‍ നമുക്കും മുന്നോട്ട് ഓടിക്കൊണ്ടേയിരിക്കാം - *ശുഭദിനം.*
