കൊല്ലത്ത് യാതൊരു കേടുമില്ലാത്ത വീട് പുനർനിർമിക്കാൻ നാല് ലക്ഷം രൂപയാണ് ദുരിതാശ്വാസ നിധിയിലൂടെ നൽകിയതെന്ന് വിജിലൻസ് കണ്ടെത്തി. വർക്കലയിൽ ഉദരരോഗത്തിന് ചികിത്സ തേടിയ രോഗിക്ക് ഹൃദ്‍രോഗത്തിന് പണം നൽകി. കരുനാഗപ്പള്ളി താലൂക്കിൽ 13 പേർക്ക് മെഡിക്കൽ സർട്ടിഫിക്കറ്റ് നൽകിയത് ഒരു ഡോക്ടറാണ്. ഒരു കുടുംബത്തിലെ ആറ് പേർക്കും സർട്ടിഫിക്കറ്റ് നൽകി.
പാലക്കാട് ആലത്തൂരിൽ 78 അപേക്ഷയിൽ 54 സർട്ടിഫിക്കറ്റും നൽകിയത് ഒരു ആയുർവേദ ഡോക്ടറാണ്. സഹായം ലഭിക്കാനായി നൽകിയ 78 ൽ 28 അപേക്ഷയിലും കാണുന്നത് ഒരേ ഫോൺ നമ്പറാണെന്നും കണ്ടെത്തിയിട്ടുണ്ട്. കോഴിക്കോട് സർക്കാർ ഉദ്യോഗസ്ഥന്റെ അമ്മയ്ക്കും ധനസഹായം നൽകി. കോഴിക്കോട് ഒരു പ്രവാസിയുടെ മകന് മൂന്നു ലക്ഷം ചികിത്സസഹായം ലഭിച്ചുവെന്നും വിജിലൻസ് വ്യക്തമാക്കി.
