മെച്ചപ്പെട്ട ഹൃദയാരോഗ്യത്തിന് കൊളസ്ട്രോൾ റിപ്പോർട്ട് എങ്ങനെയാകണം?

ശരീരത്തിൽ കാണപ്പെടുന്ന മെഴുക് പോലുള്ള വസ്തുവാണ് കൊളസ്ട്രോൾ. കോശനിർമാണത്തിനും മറ്റുമായി ശരീരം ഇത് ഉപയോഗപ്പെടുത്തുന്നു. എന്നാൽ ഇതിന്റെ തോത് ക്രമാതീതമായി ഉയരുമ്പോൾ ഹൃദയാഘാതം, പക്ഷാഘാതം തുടങ്ങിയ സങ്കീർണതകൾ ഉണ്ടാകാം. പക്ഷേ ടോട്ടൽ കൊളസ്ട്രോൾ തോത് മാത്രമല്ല ഹൃദയാരോഗ്യത്തെ നിർണയിക്കുന്നതെന്ന് എൻഡിടിവിക്ക് നല്‍കിയ അഭിമുഖത്തിൽ ന്യൂട്രീഷനിസ്റ്റ് ഡോ. വിശാഖ പറയുന്നു. ടോട്ടൽ കൊളസ്ട്രോൾ തോത് 200 mg/dl ന് മുകളിൽ പോയി എന്ന് കരുതി ഉടനെ സ്റ്റാറ്റിൻ മരുന്ന് കഴിക്കേണ്ടതില്ലെന്നും ഡോ. വിശാഖ ചൂണ്ടിക്കാണിക്കുന്നു. നല്ല കൊളസ്ട്രോൾ എന്നറിയപ്പെടുന്ന എച്ച്ഡിഎൽ, ട്രൈഗ്ലിസറൈഡ് തോത്, ട്രൈഗ്ലിസറൈഡ്– എച്ച്ഡിഎൽ അനുപാതം എന്നിവയാണ് ഹൃദയാരോഗ്യത്തിന്റെ കാര്യത്തിൽ നിർണായകമാകുന്നത്.

1. എച്ച്ഡിഎൽ

നല്ല കൊളസ്ട്രോൾ ആയ ഹൈ ഡെൻസിറ്റി ലിപോ പ്രോട്ടീൻ (എച്ച്ഡിഎൽ) പുരുഷന്മാരിൽ 40 mg/dl നും സ്ത്രീകളിൽ 50 mg/dl നും മുകളിലായിരിക്കണം. പരിശോധനയിൽ ഇത് കുറഞ്ഞ് കാണപ്പെട്ടാൽ എച്ച്ഡിഎൽ വർധിപ്പിക്കാനുള്ള നടപടികൾ സ്വീകരിക്കണം. നിത്യവുമുള്ള വ്യായാമം, ഒമേഗ 3 ഫാറ്റി ആസിഡുകൾ സമൃദ്ധമായ മീൻ പോലുള്ള ഭക്ഷണവിഭവങ്ങളുടെ ഉപയോഗം എന്നിവ ഇക്കാര്യത്തിൽ സഹായകമാണ്.

2. ട്രൈഗ്ലിസറൈഡ്

ഹൃദയാരോഗ്യത്തിന്റെ കാര്യത്തിൽ ട്രൈഗ്ലിസറൈഡ് തോത് വളരെ പ്രധാനമാണ്. ഇത് 100 mg/dl ന് താഴെയാകാൻ ശ്രദ്ധിക്കണം.

3. ട്രൈഗ്ലിസറൈഡ്/ എച്ച് ഡിഎൽ അനുപാതം

1:2 എന്ന അനുപാതത്തിലായിരിക്കണം. ട്രൈഗ്ലിസറൈഡ് –എച്ച്ഡിഎൽ തോത് ടോട്ടൽ കൊളസ്ട്രോൾ ഉയർന്നതാണെങ്കിലും ഈ തോത് കൃത്യമാണെങ്കിൽ ഭയപ്പെടാനൊന്നുമില്ലെന്ന് ഡോ. വിശാഖ കൂട്ടിച്ചേർക്കുന്നു.

കുടുംബത്തിൽ ഹൃദ്രോഗ ചരിത്രമുള്ളവർ കൊളസ്ട്രോളിന്റെ കാര്യത്തിൽ കൂടുതൽ ജാഗ്രത പുലർത്തണം. വെറുതെ സ്റ്റാറ്റിൻ മരുന്ന് വാങ്ങി കഴിക്കുന്നതിന് പകരം ആവശ്യമായ പരിശോധനകളുടെ അടിസ്ഥാനത്തിൽ ഭക്ഷണക്രമത്തിലും ജീവിതശൈലിയിലും മാറ്റങ്ങൾ വരുത്താനാണ് ശ്രമിക്കേണ്ടതെന്നും ഡോ. വിശാഖ ഓർമിപ്പിക്കുന്നു.