ഇലന്തൂർ നരബലിയുടെ പശ്ചാത്തലത്തിൽ കാണാതാകൽ കേസുകൾ പുനരന്വേഷിക്കണമെന്ന ഡിജ‍ിപിയുടെ നിർദ്ദേശത്തിന്റെ അടിസ്ഥാനത്തിലാണ് കേസിൽ പുനരന്വേഷണമുണ്ടായത്. ഡിവൈഎസ്പി കെ.െജ.ജോൺസണിന്റെ നേതൃത്വത്തിൽ എഎസ്ഐ ആർ.കെ.ജ്യോതിഷ്, സീനിയർ സിപിഒമാരായ പി.എസ്.പ്രതീഷ്, എ.സജു, സിപിഒ കെ.എസ്.നിഖിൽ എന്നിവരടങ്ങുന്ന സംഘം നടത്തിയ അന്വേഷണത്തിൽ ജോസിന് കർണ്ണാടകയിലെ കുടക് സ്വദേശിനിയായ ടിടിസി വിദ്യാർത്ഥിനി സൗജിത്തുമായി പ്രണയ ബന്ധമുണ്ടായിരുന്നെന്നു കണ്ടെത്തി. കർണ്ണാടകയിൽ അന്വേഷിച്ചപ്പോൾ ജോസിനെ കാണാതായ ദിവസം തന്നെ സൗജിത്തിനെയും കാണാതായെന്നു വിവരം ലഭിച്ചു. ഇവരുടെ അടുപ്പത്തെക്കുറിച്ചു വീട്ടുകാർക്കും വിവരമുണ്ടായിരുന്നു.തുടർന്ന്, ബാങ്ക് അക്കൗണ്ട് വിവരങ്ങൾ ശേഖരിച്ച് ക്രൈംബ്രാഞ്ച് സംഘം നടത്തിയ അന്വേഷണത്തിലാണ് കോയമ്പത്തൂരിൽ ജോസ് ഉണ്ടെന്നു വ്യക്തമായത്. അവിടെ സൗജിത്തിനും രണ്ടു കുട്ടികൾക്കുമൊപ്പമാണ് ജോസ് കഴിഞ്ഞിരുന്നത്. അവിടെയെത്തിയ അന്വേഷണ സംഘം ജോസിനെ കസ്റ്റഡിയിലെടുത്ത് നെയ്യാറ്റിൻകര കോടതിയിൽ ഹാജരാക്കി. കുടക് സ്വദേശിനിയോടൊപ്പം ജീവിക്കാനാണ് താൽപര്യമെന്ന് ജോസ് അറിയിച്ചതിനെത്തുടർന്ന് വ്യവസ്ഥകൾക്കു വിധേയമായി കോയമ്പത്തൂരിലേക്കു തിരികെ അയച്ചതായി പൊലീസ് പറഞ്ഞു. സൗജിത്തിനെ കാണാതായ കേസിൽ കർണ്ണാടകയിൽ റജിസ്റ്റർ ചെയ്ത കേസിൽ സ്റ്റേഷനിൽ ഹാജരാകാൻ നിർദ്ദേശം നൽകിയിട്ടുണ്ട്. ജോസിന് നാട്ടിൽ ഒരു മകനുണ്ട്.
