കടയ്ക്കാവൂര്‍ തെക്കുംഭാഗം തെറ്റിമൂല സ്‌ക്കൈലാന്‍ഡില്‍ താമസിക്കുന്ന അലക്‌സാണ്ടറെ(55)യാണു രണ്ടംഗ അക്രമിസംഘം ഇക്കഴിഞ്ഞ 27നു രാവിലെ 11മണിയോടെ വീട്ടില്‍ അതിക്രമിച്ചു കയറി ഇരുമ്പുപൈപ്പും വെട്ടുകത്തിയുമുപയോഗിച്ചു മാരകമായി വെട്ടിയും അടിച്ചും പരുക്കേല്‍പ്പിച്ചുകടന്നത്. അക്രമികളെത്തുമ്പോള്‍ അലക്‌സാണ്ടര്‍ വീട്ടിലെ ഹാളില്‍ ഇരിക്കുകയായിരുന്നു. വീട്ടിലുണ്ടായിരുന്ന ഭാര്യ,മകള്‍ മറ്റുബന്ധുക്കള്‍ എന്നിവരെ ആയുധങ്ങള്‍കാട്ടി ഭീഷണിപ്പെടുത്തുകയും ഭീതിപരത്തിയശേഷം അക്രമം അഴിച്ചുവിടുകയുമായിരുന്നു. പേടിച്ചവശരായ വീട്ടുകാര്‍ അക്രമികള്‍ വീട്ടില്‍ നിന്നുപോയെന്നുറപ്പാക്കിയശേഷമാണു മുറിക്കുപുറത്തിറങ്ങിയത്. രക്തത്തില്‍കുളിച്ചു അവശനിലയില്‍ ഹാളില്‍ കിടന്ന ഗൃഹനാഥനെ ബന്ധുക്കളുടെ കൂട്ടനിലവിളിയെത്തുടര്‍ന്നു സ്ഥലത്തെത്തിയ പരിസരവാസികളാണു ആശുപത്രിയിലെത്തിച്ചത്.
തിരുവനന്തപുരം മെഡിക്കല്‍ കോളജ് ആശുപത്രിയില്‍ ചികില്‍സയില്‍ കഴിയുന്ന അലക്‌സാണ്ടറുടെ സ്ഥിതി സാധാരണനിലയിലായിട്ടില്ല. കടയ്ക്കാവൂര്‍അഞ്ചുതെങ്ങ് ബീച്ച്‌റോഡില്‍ മദ്യപിച്ചശേഷം പരസ്യമായി നാട്ടുകാര്‍ക്കുനേരെ അസഭ്യവര്‍ഷം നടത്തുകയായിരുന്ന പ്രതികളെ വിലക്കിയതാണു വീടുകയറിയുള്ള അക്രമത്തില്‍ കലാശിച്ചതെന്നു പൊലീസ് അറിയിച്ചു. വര്‍ക്കല കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.
