ഇവരെ കോടതിയിൽ ഹാജരാക്കി റിമാൻഡ് ചെയ്തു. ഇന്നലെ രാവിലെ 7 മണിയോടെ ഇളമ്പള്ളൂർ ക്ഷേത്രത്തിനു മുന്നിലായിരുന്നു സംഭവം. ഇളമ്പള്ളൂർ– ചവറ റൂട്ടിലോടുന്ന ഫെയർ, അന്നൂർ എന്നീ ബസുകളിലെ ജീവനക്കാരാണു യാത്രക്കാരുടെ ജീവനു തരിമ്പും വില കൽപ്പിക്കാതെ ബസുകൾ കൂട്ടിയിടിപ്പിച്ചു പോരടിച്ചത്. ബസുകൾ കൂട്ടിയിടിപ്പിക്കുന്നതിന്റെ ദൃശ്യം ജീവനക്കാർ തന്നെ പകർത്തി. ഇതു സമൂഹ മാധ്യമങ്ങളിൽ പ്രചരിച്ചതോടെ കുണ്ടറ പൊലീസ് സ്വമേധയാ കേസെടുത്തു.
പൊലീസ് പറയുന്നത്: സമയം തെറ്റിച്ച് നേരത്തേ യാത്രക്കാരെ കയറ്റാൻ വന്ന ഫെയർ ബസിനെ ഇളമ്പള്ളൂർ പഞ്ചായത്ത് ഓഫിസിനു മുന്നിൽ വച്ച് അഭിമുഖമായി ബസ് നിർത്തി അന്നൂർ ബസിലെ ജീവനക്കാർ തടഞ്ഞു. ഫെയർ ബസ് മുന്നോട്ടു കയറി അന്നൂർ ബസിൽ ഇടിക്കുകയും ചെയ്തു. തുടർന്ന് ഇളമ്പള്ളൂർ ക്ഷേത്രത്തിനു മുന്നിൽ യാത്രക്കാരെ കയറ്റാൻ നിർത്തിയിട്ട ഫെയർ ബസിനെ മറികടന്നു മുന്നിൽ കയറ്റിയിട്ട അന്നൂർ ബസ് പിന്നോട്ടെടുത്തു ഫെയർ ബസിൽ ഇടിപ്പിക്കുകയായിരുന്നു.ഇടിയുടെ ആഘാതത്തിൽ ഫെയർ ബസിന്റെ മുന്നിലെ ഗ്ലാസ് പൊട്ടി. ബസുകളുടെ പെർമിറ്റ്, ഡ്രൈവർമാരുടെ ലൈസൻസ് എന്നിവ റദ്ദാക്കുന്നതിനുള്ള നടപടി സ്വീകരിച്ചു വരികയാണെന്ന് ആർടിഒ ഡി. മഹേഷ് അറിയിച്ചു. യാത്രക്കാരുള്ള ബസ് അപകടകരമായി ഓടിച്ചതിന് മനഃപ്പൂർവമല്ലാത്ത നരഹത്യ, അപകടകരമായ ഡ്രൈവിങ് എന്നീ വകുപ്പുകൾ ചുമത്തിയാണു ഡ്രൈവർമാർക്കെതിരെ കേസെടുത്തതെന്നു കുണ്ടറ ഇൻസ്പെക്ടർ എസ്. മഞ്ജുലാൽ അറിയിച്ചു. കണ്ടക്ടർമാർക്കെതിരെ പ്രേരണാക്കുറ്റവും ചുമത്തി.
