മെഡിക്കല്‍കോളജ്: ഉള്ളൂര്‍ തുറുവിക്കല്‍ ക്ഷേത്രത്തിനു മുന്‍വശത്ത് പാര്‍ക്ക് ചെയ്തിരുന്ന സ്‌കൂട്ടര്‍ മോഷ്ടിച്ച സംഭവത്തില്‍ യുവാവ് മെഡിക്കല്‍കോളജ് പോലീസിന്റെ പിടിയിലായി. ഇരിഞ്ചയം താന്നിമൂട് തോപ്പുവിള പുത്തന്‍ വീട്ടില്‍ ജ്യോതിഷ് (23) ആണ് പിടിയിലായത്. ഓഗസ്റ്റ് 28-നായിരുന്നു കേസിന്നാസ്പദമായ സംഭവം. ഉള്ളൂര്‍ സ്വദേശിനിയായ വീട്ടമ്മയുടെ ആക്ടീവ സ്‌കൂട്ടറാണ് ഇയാള്‍ മോഷ്ടിച്ചു കടത്തിയത്. പരാതിയുടെ അടിസ്ഥാനത്തില്‍ സി.സി.ടി.വി ദൃശ്യങ്ങളുടെ സഹായത്തോടുകൂടിയാണ് പ്രതിയെ കണ്ടെത്തിയത്. മോഷ്ടിച്ച ബൈക്ക് പ്രതിയില്‍ നിന്നു കണ്ടെത്തി. നെടുമങ്ങാട്ട് കുറച്ചുനാള്‍ മുമ്പ് കട കുത്തിത്തുറന്ന് മോഷണം നടത്തിയതും കമ്പിപ്പാര ഉപയോഗിച്ച് മണ്‍വിള ഭാഗത്തുള്ള എ.ടി.എമ്മില്‍ നിന്നു പണം കവരാന്‍ ശ്രമിച്ചതും താനാണെന്നു ചോദ്യം ചെയ്യലില്‍ പ്രതി സമ്മതിച്ചു. മെഡിക്കല്‍ കോളജ് സി.ഐ പി. ഹരിലാല്‍, എസ്.ഐ സി.പി പ്രശാന്ത്, രതീഷ്, എസ്.സി.പി.ഒമാരായ ജവാദ്, നാരായണന്‍, സി.പി.ഒമാരായ അഭിലാഷ്, ഷൈനു, വിപിന്‍ എന്നിവര്‍ ഉള്‍പ്പെട്ട സംഘം പിടികൂടിയ പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.
