🔴ആരോഗ്യ ഇൻഷുറൻസ് നിർബന്ധം
സന്ദീവിനെ പോലെ സന്ദർശക വീസയിലെത്തി ഗുരുതരമായ ആരോഗ്യപ്രശ്നമുണ്ടാവുകയും ചികിത്സാ ചെലവ് ബാധ്യതയായിത്തീരുകയും ചെയ്യുന്നവർ മലയാളികളടക്കം ഒട്ടേറെ ഇന്ത്യക്കാരുണ്ട്. ഇതിന് ഏക പരിഹാരം വീസ എടുക്കുമ്പോൾ ആരോഗ്യ ഇൻഷുറൻസ് എടുക്കുക എന്നതു മാത്രമാണെന്ന് നസീർ വാടാനപ്പള്ളി, പ്രവീൺ എന്നിവർ പറയുന്നു.ഇക്കാര്യങ്ങൾ ഒട്ടേറെ പ്രാവശ്യം ഉണർത്തിച്ചെങ്കിലും ആരും ചെവിക്കൊള്ളുന്നില്ല. നിലവിൽ കോവിഡ്19 ഇൻഷുറൻസ് മാത്രമേ നിർബന്ധമുള്ളൂ എന്നതിനാൽ ആളുകൾ അതുമാത്രമേ എടുക്കുന്നുള്ളൂ. ഒരു മാസത്തെ സന്ദർശക വീസയ്ക്ക് കോവിഡ് ഇൻഷുറൻസ് ഉൾപ്പെടെ 340 ദിർഹം വരെയും മൂന്നു മാസത്തെ വീസയ്ക്ക് 700 മുതൽ 750 ദിർഹം വരെയും മാത്രമേ ട്രാവൽ ഏജൻസി ഇൗടാക്കുള്ളൂ. അതേസമയം, കോവിഡ്, ആരോഗ്യ ഇൻഷുറൻസ് ഒന്നിച്ചെടുക്കുമ്പോൾ ആകെ 120 ദിർഹത്തോളം
(2500 രൂപയോളം) മാത്രമേ ചെലവാകൂ എന്ന് അൽ വിസാം ട്രാവൽ ഏജൻസിയിലെ ഇ.കെ. ബഷീർ പറഞ്ഞു. എങ്കിലും ആരും ഇക്കാര്യം ഗൗരവമായി പരിഗണിക്കുന്നില്ല.
🔴രോഗം രംഗബോധമില്ലാത്ത കോമാളി
രോഗം രംഗബോധമില്ലാത്ത കോമാളിയെപ്പോലെയാണ്. എപ്പോൾ വേണമെങ്കിലും ആരോഗ്യത്തെ ആക്രമിക്കാം. ഇന്ത്യയുമായി താരതമ്യപ്പെടുത്തുമ്പോൾ യുഎഇ അടക്കം ഗൾഫിൽ ചികിത്സാ ചെലവ് കൂടുതലാണ്. സർക്കാർ ആശുപത്രികളായ റാഷിദ്, ദുബായ് ആശുപത്രികളിൽപ്പോലും ചികിത്സയ്ക്ക് പണം നൽകേണ്ടതുണ്ട്. സന്ദർശക വീസയിൽ മാത്രമല്ല, തൊഴിൽ വീസയിൽ വരുന്നവരും ട്രാവൽ ഇൻഷുറൻസ് നിർബന്ധമായും എടുക്കണം. വീസാ ഏജൻസിയോട് അതു പ്രത്യേകം ആവശ്യപ്പെടണം. നിങ്ങൾ ചെലവഴിക്കേണ്ടതു കേവലം 2,500 രൂപയാണ്. അതു നഷ്ടപ്പെട്ടതായി കാണേണ്ടതില്ല. കാരണം, ആരോഗ്യത്തോടെ ഇരിക്കുന്നത് ഇക്കാലത്ത് മഹാഭാഗ്യമായി കാണേണ്ടിയിരിക്കുന്നു. സന്ദർശക വീസയിലോ മറ്റോ എത്തി രോഗബാധിതരായാൽ തുടർ ചികിത്സ വലിയൊരു ബാധ്യതയാണെന്ന് എല്ലാവരും തിരിച്ചറിയണം.
🔴സൗദിയിൽ പ്രസവ ചെലവ് ലഭിക്കും
സന്ദർശക വീസയിൽ എത്തുന്നവർക്കു പ്രസവ ചെലവും അടിയന്തര ഘട്ടങ്ങളിൽ പരമാവധി 1,00,000 റിയാൽ വരെ ഇൻഷുറൻസ് പരിരക്ഷയും ലഭിക്കുമെന്നു സൗദി കൗൺസിൽ ഓഫ് ഹെൽത്ത് ഇൻഷുറൻസ് കഴിഞ്ഞ ദിവസം അറിയിച്ചിരുന്നു. എന്നാൽ, മറ്റ് ആരോഗ്യപ്രശ്നങ്ങളുണ്ടായാൽ സഹായം ലഭിക്കില്ല.ഗർഭധാരണം, എമർജൻസി പ്രസവം തുടങ്ങിയവക്കു പോളിസി കാലയളവിൽ പരമാവധി 5,000 റിയാൽ വരെയുള്ള പരിരക്ഷയാണു ലഭിക്കുക. സന്ദർശന ആവശ്യത്തിനായി സൗദിയിലേക്കു വരുന്നവർക്കു വിദേശകാര്യ മന്ത്രാലയത്തിന്റെ വെബ്‌സൈറ്റിലെ ഇൻജാസ് പ്ലാറ്റ്‌ഫോം സന്ദർശിച്ചു വിസിറ്റ് വീസയ്ക്ക് ഇൻഷുറൻസ് നേടാനാകും. വീസയുടെ കാലാവധി കഴിഞ്ഞതിനു ശേഷം പുതുക്കുമ്പോൾ പുതിയ ഇൻഷുറൻസ് എടുക്കാൻ ഇവർ ബാധ്യസ്ഥരാണ്. കാലാവധി കഴിയാത്ത മെഡിക്കൽ ഇൻഷുറൻസ് ഉണ്ടെങ്കിൽ സന്ദർശന വീസയിൽ രാജ്യത്തേയ്ക്കു വരുമ്പോൾ തവക്കൽനയിൽ അവരുടെ ആരോഗ്യ നില “ഇൻഷുർ ചെയ്ത സന്ദർശകൻ” എന്ന് ആയിരിക്കുമെന്നു തവക്കൽന ആപ്പ് അധികൃതർ പറയുന്നു.
🔴കുവൈത്തിൽ സന്ദർശക വീസക്കാർക്ക് ആരോഗ്യ ഇൻഷുറൻസ്
കുവൈത്തിൽ സന്ദർശക വീസയിലെത്തുന്ന വിദേശികൾക്കും ആരോഗ്യ ഇൻഷുറൻസ് ഏർപ്പെടുത്തണമെന്ന ബിൽ 2019ൽ പാർലമെന്റ് അംഗീകരിച്ചിരുന്നു. അന്നുവരെ തൊഴിൽ വീസയിലെത്തുന്ന വിദേശികൾക്കു മാത്രമാണ് ആരോഗ്യ ഇൻഷുറൻസ് ഏർപ്പെടുത്തിയിരുന്നത്. ഇതിനായി പ്രതിവർഷം 50 കുവൈത്ത് ദിനാർ ഫീസ് അടയ്ക്കണം.
ഇൗ ഭേദഗതി പ്രകാരം സന്ദർശക വീസയിൽ വരുന്നവരും താൽക്കാലിക ഇഖാമയിൽ ഉള്ളവരും ആരോഗ്യ ഇൻഷുറൻസ് ഫീസ് അടക്കുന്നു. അവർ കുവൈത്തിൽ കഴിയുന്ന കാലത്തേക്കു ഇൻഷുറൻസ് പരിരക്ഷയും ലഭിക്കും. സന്ദർശക വീസയ്ക്കും താത്കാലിക ഇഖാമയ്ക്കുമുള്ള അപേക്ഷ സ്വീകരിക്കണമെങ്കിൽ ആരോഗ്യ ഇൻഷുറൻസ് ഫീസ് അടച്ചതായുള്ള രേഖ ഹാജരാക്കണമെന്നും ബിൽ വ്യവസ്ഥ ചെയ്യുന്നു. അപേക്ഷ ആരോഗ്യസമിതി രണ്ടു വർഷം മുൻപു അംഗീകാരം നൽകിയ ബില്ലാണു ഭൂരിപക്ഷ വോട്ടോടെ പാസാക്കിയത്. പാർലമെന്റ് അംഗീകരിച്ച ബിൽ മന്ത്രിസഭയുടെ പരിഗണനയ്ക്ക് അയക്കും. മന്ത്രിസഭയും ബില്ലിനു അംഗീകാരം നൽകിയാൽ നിയമം പ്രാബല്യത്തിൽ വരും. അതേസമയം, ഒമാൻ, ബഹ്റൈൻ, ഖത്തർ എന്നീ രാജ്യങ്ങളിലും ആരോഗ്യ ഇൻഷുറൻസ് നിർബന്ധമാക്കിയിട്ടില്ല.
