മാർച്ച് 30-ന് പുലർച്ചെയാണ് കടമ്പാട്ടുകോണം മത്സ്യമാർക്കറ്റിൽ മോഷണം നടന്നത്. മാർക്കറ്റിലെ ഓഫീസ് മുറിയിലെ മേശ കുത്തിത്തുറന്ന് 35,000 രൂപയാണ് മോഷ്ടാവ് കവർന്നത്. ഈ സംഭവത്തിൽ പോലീസ് നടത്തിയ അന്വേഷണത്തിലാണ് പാരിപ്പള്ളി സ്വദേശി നന്ദു ബി.നായർ പിടിയിലായത്. കസ്റ്റഡിയിലെടുത്തതിന് പിന്നാലെ ഇയാളിൽനിന്ന് അഞ്ച് ലക്ഷം രൂപയുടെ എം.ഡി.എം.എ. ലഹരിമരുന്നും കണ്ടെടുക്കുകയായിരുന്നു.
മാർക്കറ്റിലെ സിസിടിവി ദൃശ്യങ്ങൾ കേന്ദ്രീകരിച്ചാണ് കവർച്ചാക്കേസിൽ പോലീസ് സംഘം അന്വേഷണം ആരംഭിച്ചത്. സംഭവസമയം ഓവർകോട്ടും ഹെൽമെറ്റും ധരിച്ച യുവാവ് മാർക്കറ്റിൽ സംശയാസ്പദമായ രീതിയിൽ കറങ്ങിനടക്കുന്നത് ദൃശ്യങ്ങളിലുണ്ടായിരുന്നു. ഇയാളെ കേന്ദ്രീകരിച്ച് നടത്തിയ അന്വേഷണത്തിലാണ് ഇത് തീവെട്ടി ബാബുവിന്റെ മകൻ നന്ദുവാണെന്ന് തിരിച്ചറിഞ്ഞത്. തുടർന്ന് ചടയമംഗലത്ത് നിന്ന് നന്ദുവിനെ പിടികൂടുകയായിരുന്നു.
കസ്റ്റഡിയിലെടുത്തതിന് പിന്നാലെ നടത്തിയ പരിശോധനയിലാണ് നന്ദുവിന്റെ പക്കൽനിന്നും 7.5 ഗ്രാം എം.ഡി.എം.എ. ലഹരിമരുന്ന് കണ്ടെടുത്തത്. വിപണിയിൽ അഞ്ച് ലക്ഷത്തോളം രൂപ വിലവരുന്ന എം.ഡി.എം.എ. ചെറിയ പാക്കറ്റുകളിലാക്കിയാണ് പ്രതി സൂക്ഷിച്ചിരുന്നത്. ഓരോ പാക്കറ്റിനും 10000 മുതൽ 20000 രൂപ വരെയാണ് ഈടാക്കിയിരുന്നത്. യുവാക്കളും സ്കൂൾ-കോളേജ് വിദ്യാർഥികളുമാണ് ഇയാളിൽനിന്ന് ലഹരിമരുന്ന് വാങ്ങിയിരുന്നതെന്നും പോലീസ് പറഞ്ഞു.
മാർക്കറ്റിലെ മോഷണത്തിന് ഉപയോഗിച്ച ബൈക്കും മാരകായുധങ്ങളും മോഷ്ടിച്ച പണവും പ്രതിയിൽനിന്ന് കണ്ടെടുത്തിട്ടുണ്ട്. നന്ദുവിനെതിരേ വിവിധ പോലീസ് സ്റ്റേഷനുകളിലായി അറുപതോളം കേസുകൾ നിലവിലുണ്ടെന്നും പോലീസ് പറഞ്ഞു. മോഷണം, പിടിച്ചുപറി, കഞ്ചാവ് വില്പന, പോക്സോ, അടിപിടി കേസുകളാണ് ഇവയെല്ലാം.
പള്ളിക്കൽ പോലീസ് പിടികൂടിയതിന് പിന്നാലെ കല്ലമ്പലത്ത് മെഡിക്കൽ ഷോപ്പിൽ കവർച്ച നടത്തിയതും ചടയമംഗലത്ത് സ്കൂളുകളിൽനിന്ന് ലാപ്ടോപ്പുകൾ മോഷ്ടിച്ചതും താനാണെന്ന് പ്രതി സമ്മതിച്ചിട്ടുണ്ട്. കല്ലമ്പലത്തെ മെഡിക്കൽ ഷോപ്പിൽനിന്ന് സിറിഞ്ചുകൾ മോഷ്ടിച്ചത് ലഹരിമരുന്ന് ഉപയോഗിക്കാൻ വേണ്ടിയാണെന്നായിരുന്നു ഇയാളുടെ മൊഴി. ഈ കേസുകളിലും വൈകാതെ നന്ദുവിന്റെ അറസ്റ്റ് രേഖപ്പെടുത്തുമെന്ന് പോലീസ് അറിയിച്ചു. പള്ളിക്കൽ പോലീസ് ഇൻസ്പെക്ടർ പി. ശ്രീജിത്തിന്റെ നേതൃത്വത്തിലുള്ള അന്വേഷണസംഘമാണ് പ്രതിയെ പിടികൂടിയത്
