മലപ്പുറം: 75-ാമത് സന്തോഷ് ട്രോഫി ഫുട്‌ബോളിന് ശനിയാഴ്ച മലപ്പുറത്ത് തുടക്കം. മഞ്ചേരി പയ്യനാട്, മലപ്പുറം കോട്ടപ്പടി സ്റ്റേഡിയങ്ങളിലാണ് മത്സരങ്ങൾ. കേരളത്തിന്റെ കളികളും സെമിഫൈനൽ, ഫൈനൽ പോരാട്ടങ്ങളും പയ്യനാട് സ്റ്റേഡിയത്തിലാണ്. ശനിയാഴ്ച ആദ്യമത്സരത്തില്‍ രാവിലെ 9.30-ന് പശ്ചിമബംഗാള്‍ പഞ്ചാബിനെയും രണ്ടാം മത്സരത്തില്‍ രാത്രി എട്ടിന് ആതിഥേയരായ കേരളം രാജസ്ഥാനെയും നേരിടും.
ടൂർണമെന്റിൽ ആറുവട്ടം ജേതാക്കളായ കേരളം എ ഗ്രൂപ്പിൽ പശ്ചിമബംഗാള്‍, പഞ്ചാബ്, മേഘാലയ, രാജസ്ഥാൻ എന്നീ ടീമുകൾക്കെതിരേ മത്സരിക്കും. നിലവിലെ ചാമ്പ്യന്മാരായ സര്‍വീസസ്, കര്‍ണാടക, മണിപ്പുർ, ഒഡിഷ, ഗുജറാത്ത് എന്നീ ടീമുകളാണ് ബി ഗ്രൂപ്പിൽ. ഫൈനൽ മേയ് രണ്ടിന്.
