പള്ളിക്കൽ :പള്ളിക്കലില്‍ ആടുകളെ അജ്ഞാത ജീവി കടിച്ചുകൊന്നു. മൂതല പൊയ്കവിള വീട്ടില്‍ ഉദയകുമാറിന്റെ വീട്ടിലെ ആടിനെയും കുട്ടികളെയുമാണ് കഴിഞ്ഞദിവസം രാത്രി അജ്ഞാത ജീവി ആക്രമിച്ചത്.രണ്ട് ആട്ടിന്‍കുട്ടികള്‍ ചത്തെങ്കിലും തള്ളയാട് ഗുരുതര പരിക്കുകളോടെ അവശതയിലാണ്. പാലോട് റെയ്ഞ്ച് ഫോറസ്റ്റ് ഓഫീസറുമായി ബന്ധപ്പെട്ടതിനെ തുടര്‍ന്ന് ഇളമ്ബ്രക്കോട് ബീറ്റ് ഫോറസ്റ്റ് ഓഫീസറുടെ നിര്‍ദ്ദേശാനുസരണം പള്ളിക്കല്‍ മൃഗാശുപത്രിയിലെ ഡോക്ടര്‍ സ്ഥലത്തെത്തി പരിക്കേറ്റ തള്ളയാടിന് ചികിത്സ നല്‍കുകയും ചത്ത ആട്ടിന്‍കുട്ടികളുടെ പോസ്റ്റുമോര്‍ട്ടം നടത്തുകയും ചെയ്തു. അജ്ഞാത ജീവിയുടെ കാല്‍പ്പാടുകള്‍ സമീപത്ത് ദൃശ്യമാണെങ്കിലും ജീവി ഏതാണെന്ന് സ്ഥിരീകരിച്ചിട്ടില്ല. രണ്ടുദിവസം മുന്‍പ് സമീപത്തുള്ള മറ്റൊരു വീട്ടിലും സമാന രീതിയില്‍ ആടിനെയും കോഴിയെയും ആക്രമിച്ചിരുന്നു. പള്ളിക്കല്‍ ഗ്രാമ പഞ്ചായത്ത് പ്രസിഡന്റ് സ്ഥലം സന്ദര്‍ശിക്കുകയും വനം വകുപ്പ് ഉദ്യോഗസ്ഥരുമായും വെറ്റിനറി ഡോക്ടറുമായും ആശയവിനിമയം നടത്തുകയും ചെയ്തു.
