വർക്കല: തച്ചൻകോണത്ത് നിയന്ത്രണംവിട്ട കാർ കടയുടെ മുന്നിലേക്ക് ഇടിച്ചുകയറി. കടയുടെ മുന്നിലെ ഗേറ്റും മതിലും തകർന്നു. ഫർണിച്ചറുകൾക്കും കേടുപാടുണ്ടായി. ആർക്കും പരിക്കില്ല. തിങ്കളാഴ്ച ഉച്ചയ്ക്ക് 2.30-ഓടെയായിരുന്നു അപകടം.
തച്ചൻകോണം വലിയവിളാകം ലക്ഷ്മിയിൽ രാജേന്ദ്രപ്രസാദിന്റെ ഉടമസ്ഥതയിലുള്ള രാജാ സ്റ്റോറിലേക്കാണ് കാർ ഇടിച്ചുകയറിയത്. വർക്കല നിന്നും താഴെവെട്ടൂർ ഭാഗത്തേക്ക് പോകുകയായിരുന്നു കാർ.
തച്ചൻകോണം വളവ് തിരിയുമ്പോഴാണ് നിയന്ത്രണംതെറ്റി റോഡിന്റെ എതിർവശത്തുള്ള കടയുടെ മുന്നിലേക്ക് ഇടിച്ചുകയറിയത്. ഡ്രൈവർ മാത്രമാണ് കാറിലുണ്ടായിരുന്നത്. ഇയാൾ പരിക്കേൽക്കാതെ രക്ഷപ്പെട്ടു.
ഉടമ കടയുടെ ഉള്ളിലായതിനാൽ അപകടത്തിൽപ്പെട്ടില്ല. കാറിന്റെ മുൻഭാഗം തകർന്നിട്ടുണ്ട്. സംഭവം നടക്കുന്നസമയം റോഡിലും കടയുടെ മുന്നിലും ആരുമില്ലാതിരുന്നതിനാൽ വലിയ അപകടമൊഴിവായി.
