നിരക്ഷരതയുടെ ഒരു തുരുത്തു പോലും അവശേഷിക്കരുതെന്ന ലക്ഷ്യത്തോടെ സർക്കാർ സാക്ഷരതാ മിഷനിലൂടെ നടപ്പിലാക്കുന്ന പദ്ധതിയാണ് പഠ്ന ലിഖ്ന അഭിയാൻ. ക്ലാസുകളുടെ നഗരസഭാതല പ്രവേശനോത്സവം ചെയർപേഴ്സൺ അഡ്വ.എസ്. കുമാരി നിർവ്വഹിച്ചു. ചിറ്റാറ്റിൻകര മേവറത്തുവിളയിൽ റിസോഴ്സ് പേഴ്സൺ കെ.എസ്.സുജയുടെ അധ്യക്ഷതയിൽ ചേർന്ന പരിപാടിയിൽ പഠിതാക്കൾക്കുള്ള പഠനോപകരണങ്ങൾ വിതരണം ചെയ്തു. കൂടാതെ നഗരമാതാവ് എഴുതിയ അക്ഷരങ്ങൾ പഠിതാക്കൾ തിരിച്ചറിഞ്ഞ് ഏറ്റുചൊല്ലി. നോഡൽ പ്രേരക് ജി.ആർ.മിനിരേഖ, വോളന്റിയർ ടീച്ചർമാരായ മല്ലിക, ഷീന തുടങ്ങിയവർ സംസാരിച്ചു. റിസോഴ്സ് പേഴ്സൺ കെ.എസ്.സുജ നാടൻ പാട്ടിലും കഥയിലൂടെയും പാഠ്യ വിഷയത്തെ കുറിച്ച് ലഘു വിവരണം നൽകി.
