നെടുമങ്ങാട്∙ മദ്യലഹരിയിൽ ലോട്ടറി വിൽപനശാലയിൽ എത്തി ഉടമയായ വനിതയെ കത്തി കാട്ടി ഭീഷണിപ്പെടുത്തിയ പത്താംകല്ല് സ്വദേശി ഷാഫി (45) പൊലീസ് കസ്റ്റഡിയിൽ. ഭീഷണിപ്പെടുത്തിയ ആളെ പിടികൂടുന്നതിനിടെ കത്തി കൊണ്ട് എസ്ഐ സുനിൽ ഗോപിയുടെ കൈവിരലിൽ പരുക്കേറ്റു. വൈകിട്ട് ആറോടെ കല്ലിങ്ങലിൽ ആണ് സംഭവം. ലോട്ടറി വിൽപന ശാലയിൽ എത്തിയ ഷാഫി ഉടമ രാജലക്ഷ്മിയോട് മാസ്ക് ആവശ്യപ്പെട്ട ശേഷം കയ്യിൽ പിടിച്ച് അപമര്യാദയായി സംസാരിച്ചു. ഭയന്ന് നിലവിളിച്ച രാജലക്ഷ്മിയെ കത്തി കാട്ടി ഭീഷണിപ്പെടുത്തി.
സമീപകടയിലെ ജീവനക്കാരൻ വേലപ്പൻ തടയാൻ ശ്രമിച്ചപ്പോൾ അയാളെയും ഭീഷണിപ്പെടുത്തി. പൊലീസ് എത്തുമെന്ന് അറിഞ്ഞ് ഷാഫി രക്ഷപ്പെടാൻ ശ്രമിക്കുന്നതിനിടെ എസ്ഐ സുനിൽ ഗോപിയും സംഘവും എത്തി. പിടികൂടാൻ ശ്രമിക്കുന്നതിനിടെ ഷാഫിയുടെ കത്തി കൊണ്ട് എസ്ഐയുടെ വലതു ചൂണ്ടുവിരലിൽ മുറിവേൽക്കുകയായിരുന്നു. തുടർന്ന് സ്റ്റേഷനിൽ എത്തിച്ച ഷാഫി അവിടെയും ബഹളം തുടർന്നു. കൈയ്ക്ക് പരുക്കേറ്റ എസ്ഐ നെടുമങ്ങാട് ജില്ലാ ആശുപത്രിയിൽ ചികിത്സ തേടി. രാജലക്ഷ്മിയുടെ പരാതിയിൽ പൊലീസ് കേസെടുത്തു.
