മുംബൈ: ശ്രീലങ്കയ്ക്കെതിരായ ടെസ്റ്റ്, ട്വന്റി20 പരമ്പരകൾക്കുള്ള ഇന്ത്യൻ ക്രിക്കറ്റ് ടീമിനെ പ്രഖ്യാപിച്ചു. മലയാളി താരം സഞ്ജു സാംസൺ ട്വന്റി20 ടീമിൽ തിരിച്ചെത്തി. രോഹിത് ശർമയുടെ നേതൃത്വത്തിലുള്ള 18 അംഗ ടെസ്റ്റ് ടീമിനെയും 18 അംഗ ട്വന്റി ടീമിനെയുമാണ് പ്രഖ്യാപിച്ചത്. ഇതോടെ, ട്വന്റി20ക്കും ഏകദിനത്തിനും പിന്നാലെ ടെസ്റ്റിലും രോഹിത് തന്നെ വിരാട് കോലിയുടെ പിൻഗാമിയായി. ചേതൻ ശർമയുടെ നേതൃത്വത്തിലുള്ള സിലക്ഷൻ കമ്മിറ്റിയാണ് ടീമിനെ പ്രഖ്യാപിച്ചത്.
