ബർലിൻ:ആഡംബരക്കാറുകളുമായിപ്പോയ കപ്പലിനു തീ പിടിച്ചു. ജർമനിയിൽനിന്ന് യുഎസിലേക്ക് പോയ കപ്പലിനാണ് തീ പിടിച്ചത്. 1100 പോർഷെ, 189 ബെന്റ്ലി കാറുകൾ ഇതിലുൾപ്പെടുന്നു. ലംബോർഗിനി, ഔ‍‍ഡി കാറുകളുടെ എണ്ണം പുറത്തുവിട്ടിട്ടില്ല. ജർമനിയിലെ അംഡണിൽനിന്ന് ഫോക്സ്‌വാഗൻ കാർ ഫാക്ടറിയിൽനിന്ന് യുഎസിലെ ഡേവിസ്‌വില്ലിലേക്കുള്ള യാത്രയ്ക്കിടെ അറ്റ്‌ലാന്റിക് സമുദ്രത്തിൽ പോർച്ചുഗൽ തീരത്ത് അസോർസ് ദ്വീപിനടുത്തുവച്ചാണു തീ പടർന്നത്. കപ്പലിലുണ്ടായിരുന്ന 22 ജീവനക്കാരെയും രക്ഷിച്ചു. തീ നിയന്ത്രണവിധേയമായിട്ടുണ്ടെന്നു അസോർസ് തുറമുഖ ക്യാപ്റ്റൻ അറിയിച്ചു. വൈദ്യുത തകരാറാകും അപകടകാരണമെന്നു പറയുന്നു.
