പ്രായമായ സ്ത്രീകളെ അക്രമിച്ച് മാല പൊട്ടിക്കുന്ന കേസ്സിലെ പ്രതിയെ കിളിമാനൂർ പോലീസും , തിരു: റൂറൽ ഡാൻസാഫ് ടീമും ചേർന്ന് അറസ്റ്റ് ചെയ്തു . എറണാകുളം ജില്ലയിൽ തൃപ്പൂണിത്തുറ , എരൂർ കൊച്ചേരിയിൽ വീട്ടിൽ മനോഹരൻപിള്ള മകൻ സുജിത്ത് (വയസ്സ് 39) ആണ് പോലീസിന്റെ പിടിയിൽ ആയത്. വീട്ടിലും പരിസര പ്രദേശങ്ങളിലും നിൽക്കുന്ന പ്രായമായ സ്ത്രീകളുടെയടുത്ത് പരിചയക്കാരനെ പോലെ എത്തി അക്രമിച്ച് മാല പൊട്ടിക്കുന്നതാണ് ഇയാളുടെ രീതി. കഴിഞ്ഞ ആഴ്ച പഴയകുന്നുമ്മേൽ വില്ലേജിൽ മേലേ പുതിയ കാവ് കലാഭവനിൽ വീടിന്റെ മുറ്റത്ത് നിന്ന എഴുപത് വയസ്സ് പ്രായമുള്ള ചന്ദ്രികയുടെ മാല പൊട്ടിക്കാനുള്ള ശ്രമത്തിനിടയിൽ വീണ് ചന്ദ്രികയുടെ കൈ ഒടിഞ്ഞ് ഗുരുതരമായി പരുക്ക് ഏറ്റിരുന്നു. പുറത്ത് സ്റ്റാർട്ട് ചെയ്ത് നിർത്തിയിരുന്ന ഇരുചക്ര വാഹനത്തിൽ ഇയാൾ രക്ഷപ്പെട്ടു. തുടർന്ന് തിരുവനന്തപുരം റൂറൽ ജില്ലാ പോലീസ് മേധാവി ഡോ: ദിവ്യാ വി ഗോപിനാഥിന്റെ നിർദ്ദേശപ്രകാരം പ്രത്യേക അന്വേഷണ സംഘത്തെ രൂപീകരിച്ച് നടത്തിയ അന്വേഷണത്തിലാണ് പ്രതി പിടിയിൽ ആയത്. ഇയാൾ പിടിയിലായതോടെ കഴിഞ്ഞ ഒക്ടോബർ മാസത്തിൽ കിളിമാനൂർ വില്ലേജിൽ അയ്യപ്പൻകാവ് നഗർ കുന്നുവിളവീട്ടിൽ എൺപത്തിയഞ്ച് വയസ്സുള്ള പൊന്നമ്മയെ അക്രമിച്ച് മാലപൊട്ടിച്ചതും ഇയാളാണെന്ന് തെളിഞ്ഞു. മാലപൊട്ടിക്കാനായി ഇയാൾ ഉപയോഗിച്ച ടു വീലർ പരവൂർ റെയിൽവേ സ്റ്റേഷൻ പരിസരത്ത് ഉപേക്ഷിച്ച് എറണാകുളത്തേക്കും അവിടെ നിന്നും തൃശൂരിലേയ്ക്കും ഇയാൾ രക്ഷപ്പെട്ടിരുന്നു .ചാലക്കുടിക്ക് സമീപം മുരിങ്ങൂർ ധ്യന കേന്ദ്രത്തിൽ നിന്നാണ് അന്വേഷണ സംഘം ഇയാളെ പിടികൂടിയത്.
മാല പിടിച്ചുപറി , വാഹനമോഷണം , പോക്സോ , കൊലപാതക ശ്രമം ഉൾപ്പെടെ നിരവധി കേസ്സുകൾ തിരുവനന്തപുരം , കൊല്ലം , പത്തനംതിട്ട , കോട്ടയം , എറണാകുളം ജില്ലകളിലെ വിവിധ പോലീസ് സ്റ്റേഷനുകളിലായി ഇയാൾക്കെതിരെ നിലവിലുണ്ട്. അടൂർ പോലീസ് രെജിസ്ട്രർ ചെയ്ത മാലപൊട്ടിക്കൽ കേസ്സിൽ ജയിലിൽ ആയിരുന്ന സുജിത് മാസങ്ങൾക്ക് മുമ്പാണ് പുറത്തിറങ്ങിയത്. നേരത്തെ കിളിമാനൂർ ചൂട്ടയിൽ ഭാഗത്ത് ടു വീലർ വർക്ക്ഷോപ്പ് നടത്തിയിരുന്ന ഇയാൾ ഇരുചക്ര വാഹനമോഷണത്തിലും വിദഗ്ദനാണ്. ഇയാളെ കസ്റ്റഡിയിൽ വാങ്ങി നടത്തുന്ന അന്വേഷണത്തിലൂടെ പരിസര പ്രദേശങ്ങളിൽ നടന്ന മറ്റ് മാലപൊട്ടിക്കൽ കേസ്സുകൾ തെളിയിക്കാനാകുമെന്ന പ്രതീക്ഷയിലാണ് പോലീസ്.
ആറ്റിങ്ങൽ ഡി.വൈ.എസ്.പി സുനീഷ് ബാബുവിന്റെ നേതൃത്വത്തിൽ കിളിമാനൂർ പോലീസ് ഇൻസ്പെക്ടർ എസ്സ്.സനൂജ് , സബ്ബ് ഇൻസ്പെക്ടർ വിജിത് കെ നായർ ,റ്റി.കെ ഷാജി, എ.എസ്.ഐ ഷജീം സി.പി.ഒ മാരായ റിയാസ്സ് ദിനേശ് ,കിരൺ ,ഷിജു ഡാൻസാഥ് ടീമിലെ സബ്ബ് ഇൻസ്പെക്ടർ എം.ഫിറോസ് ഖാൻ , എ.എസ്.ഐ ബി.ദിലീപ് , സി.പി.ഒ ഷിജു ,വിനീഷ് എന്നിവരുടെ സംഘമാണ് പ്രതിയെ പിടികൂടിയത്.
