എടിഎം ചില്ലുവാതിൽ തകർന്നു; പണമെടുക്കാൻ എത്തിയ അധ്യാപികയ്ക്ക് പരിക്ക്

നെടുമങ്ങാട്∙ എടിഎം കൗണ്ടറിന്റെ ചില്ലുവാതിൽ തകർന്ന് വീണ്, എടിഎമ്മിൽ നിന്ന് പണമെടുക്കാൻ എത്തിയ അധ്യാപികയ്ക്ക് പരുക്കേറ്റു. നെടുമങ്ങാട് ഹയർ സെക്കൻഡറി സ്കൂളിലെ അധ്യാപിക കരകുളം കെപി 8/617-എ ചിത്രാലയത്തിൽ ചിത്രാ നാരായണനാണ്(47) പരുക്കേറ്റത്. വലതുകാലിലെ ഒരു വിരൽ മുറിഞ്ഞു തൂങ്ങി. രണ്ടു വിരലുകൾക്ക് പൊട്ടലുണ്ട്. ഗുരുതരമായി പരുക്കേറ്റ ചിത്രയെ ആദ്യം മെഡിക്കൽ കോളജ് ആശുപത്രിയിലും തുടർന്ന് സ്വകാര്യ ആശുപത്രിയിലേക്കും മാറ്റി. വിരലുകൾ തുന്നിച്ചേർത്തു. 

ഇന്നലെ രാവിലെ പത്തേമുക്കാലോടെ തിരുവനന്തപുരം മെഡിക്കൽ കോളജിലെ സൂപ്പർ സ്പെഷൽറ്റി ബ്ലോക്കിനു മുന്നിലെ ഫെഡറൽ ബാങ്കിന്റെ എടിഎമ്മിൽ വച്ചാണ് അപകടം. മെഡിക്കൽ കോളജിൽ ചികിത്സയിലായിരുന്ന പിതാവിനെ ഡിസ്ചാർജ് ചെയ്യുന്നതിനു വേണ്ടി എത്തിയ ചിത്ര പണം എടുക്കുന്നതിന് എടിഎമ്മിന്റെ വാതിൽ തുറന്ന് അകത്തു കടക്കുന്നതിനിടയിലാണ് വാതിൽ തകർന്ന് വീണത്. ഉടൻ തന്നെ മെഡിക്കൽ കോളജ് ആശുപത്രിയിൽ പ്രവേശിപ്പിച്ചെങ്കിലും അടിയന്തര ചികിത്സ ലഭിക്കാൻ വൈകിയതിനാൽ ഒരു മണിക്കൂറിന് ശേഷം സ്വകാര്യ ആശുപത്രിയിലേക്ക് മാറ്റുകയായിരുന്നു.