കിളിമാനൂരിൽ ഇന്ന് (21.12.2021) പകൽ ഒരു മണിയോടെയാണ് സംഭവം. കിളിമാനൂർ പൊരുന്തമൺ ജിഷസിൽ ശാരദ മകൾ ലാലി (60) എന്ന വീട്ടമ്മയുടെ അഞ്ചര പവൻ മാലയാണ് നഷ്ടപ്പെട്ടത്. കിളിമാനൂർ ജംഗ്ഷനിൽ തിരുവനന്തപുരം ഭാഗത്തേക്ക് പോകുന്ന ബസ് സ്റ്റോപ്പിൽ നിൽക്കുകയായിരുന്ന വീട്ടമ്മ കാരേറ്റ് ഭാഗത്തേയ്ക്ക് പോവുകയായിരുന്ന ഓട്ടോറിക്ഷയിൽ കയറുകയായിരുന്നു. വീട്ടമ്മ പൊരുന്തമണിൽ ഇറങ്ങിയശേഷം നോക്കുമ്പോഴാണ് മാല നഷ്ടപ്പെട്ട വിവരം അറിയുന്നത്. ഓട്ടോയിൽ ഡ്രൈവറെ കൂടാതെ മറ്റ് മൂന്നു സ്ത്രീകളുമുണ്ടായിരുന്നതായി വീട്ടമ്മ പറയുന്നു. ബസ്റ്റോപ്പിൽ മുന്നിൽ ഓട്ടോ നിർത്തി കാരേറ്റേക്ക് യാത്രക്കാരെ ക്ഷണിക്കുകയായിരുന്നു. പൊരുന്തമണിൽ ഇറക്കുമോ എന്ന് ലാലി ചോദിച്ചപ്പോൾ ഇറക്കാം എന്ന് പറയുകയും ഓട്ടോയിൽ ഉണ്ടായിരുന്ന മറ്റു സ്ത്രീകൾ ഒതുങ്ങിയിരുന്നു കൊടുക്കുകയും ചെയ്തുവത്രെ. മാല നഷ്ടപ്പെട്ട വിവരം വീട്ടമ്മ കിളിമാനൂർ പോലീസിൽ എത്തി പരാതി നൽകി. തുടർന്ന് പോലീസ് സി.സി.ടി.വി ദൃശ്യങ്ങൾ പരിശോധിച്ചെങ്കിലും വീട്ടമ്മയ്ക്ക് സഞ്ചരിച്ചിരുന്ന ഒട്ടോ തിരിച്ചറിയാൻ കഴിഞ്ഞില്ലെന്ന് പോലീസ് അറിയിച്ചു.
