കിളിമാനൂർ:കേരളാ പൊലീസിന്റെ ഓപ്പറേഷൻ ട്രോജന്റെ ഭാഗമായി കിളിമാനൂർ പോലീസിന്റെ നേതൃത്വത്തിൽ പരിശോധന ശക്തമാക്കി. സ്റ്റേഷനിൽ രജിസ്റ്റർ ചെയ്ത ഗുണ്ടാ ആക്രമണ, അബ്കാരി , നാർക്കോട്ടിക് കേസുകളിലടക്കം പ്രതിയായി ഒളിവിൽ കഴിയുന്നവരെ കണ്ടെത്തുകയാണ് പരിശോധനയുടെ ലക്ഷ്യം. വിവിധ കേന്ദ്രങ്ങൾ കേന്ദ്രീകരിച്ച് ഗുണ്ടാ ആക്രമണങ്ങൾ നടത്തിവരുന്ന പ്രതികളെ ഓപ്പറേഷൻ ട്രോജന്റെ ഭാഗമായി വലയിലാക്കും. കിളിമാനൂർ എസ്എച്ച്ഒ എസ് സനൂജ്, സബ് ഇൻസ്പെക്ടർ വിജിത്ത് കെ നായർ എന്നിവരുടെ നേതൃത്വത്തിൽ രണ്ട് സംഘങ്ങളായി തിരിഞ്ഞാണ് പരിശോധന നടത്തുന്നത്. ഓപ്പറേഷന്റെ ഭാഗമായി ഇതിനകം രണ്ട് പേർ പിടിയിലായി. കിളിമാനൂർ മാവിൻമൂട്ടിൽ സ്ഥിതിചെയ്യുന്ന പലചരിക്ക് കടയലിൽ നിന്നും 200 പാക്കറ്റിലധികം നിരോധിത പുകയില ഉത്പന്നങ്ങൾ പിടികൂടുകയും കടയുടമ സമീർ (35)നെ അറസ്റ്റ് ചെയ്യുകയും ചെയ്തു. നിരവധി ഗുണ്ടാ അടിപിടികേസുകളിൽ പ്രതിയായി കോടതി വാറണ്ട് നിലനിൽക്കെ ഒളിവിൽ കഴിയുകയായിരുന്ന കരവാരം പുല്ലൂർമുക്ക് സുനിൽനിവാസിൽ റീബു (39)നെയും പൊലീസ് സംഘം പിടികൂടി. ഇയാളെ ആറ്റിങ്ങൽ കോടതിയിൽ ഹാജരാക്കി. വരും ദിവസങ്ങളിലും പരിശോധന കർശനമാക്കാനാണ് പൊലീസിന്റെ തീരുമാനം.
