കിളിമാനൂർ: കേരളത്തിന്റെ ഇന്നത്തെ സാമൂഹിക പുരോഗതിക്കും, സാംസ്കാരിക വളർച്ചക്കും വായനശാലകൾ കേന്ദ്രീകരിച്ച് നടന്ന ചർച്ചകൾക്ക് വലിയ പങ്കുണ്ടെന്ന് ഉന്നതവിദ്യാഭ്യാസമന്ത്രി ഡോ ആർ ബിന്ദു അഭിപ്രായപ്പെട്ടു. പുല്ലൂർമുക്ക് ദേശീയവായനശാലയുടെ ഒരുവർഷം നീണ്ടുനിൽക്കുന്ന പ്ലാറ്റിനം ജൂബിലി ആഘോഷപരിപാടികളുടെ സമാപനം കല്ലമ്പലം ജെജെ ആഡിറ്റോറിയത്തിൽ ഉദ്ഘാടനം ചെയ്തു സംസാരിക്കുകയായിരുന്നു മന്ത്രി. ഗ്രന്ഥശാലകൾ സമത്വബോധത്തിന്റെ കൊളുത്തിവെച്ചവിളക്കുകളായിരുന്നു.ഉച്ചനീചത്വത്തിൽ നിന്നും ഇന്ന് കാണുന്ന അവസ്ഥയിലേക്ക് കേരളത്തെ നയിച്ചതിലും ഗ്രന്ഥശാലകൾക്ക് വലിയപങ്കുണ്ടെന്നും മന്ത്രി പറഞ്ഞു. ചടങ്ങിൽ ഒ എസ് അംബിക എംഎൽഎ അധ്യക്ഷയായി. കേരളാ ബാങ്ക് ഡയറക്ടർ ബോർഡംഗം എസ് ഷാജഹാൻ, ജില്ലാപഞ്ചായത്തംഗം വി പ്രിയദർശിനി,താലൂക്ക് ലൈബ്രറി കൗൺസിൽ സെക്രട്ടറി ജി എസ് സുനിൽ,എസ് ഉല്ലാസ് കുമാർ , നിസാ നിസാർ തുടങ്ങിയവർ സംസാരിച്ചു.ലൈബ്രറി സെക്രട്ടറി ഇ ഷാജഹാൻ റിപ്പോർട്ട് അവതരിപ്പിച്ചു.ഗ്ലോബൽ ബിസിനസ് എക്സലന്റ് അവാർഡ് ജേതാവ് സിനിമോൾ,ഗ്രന്ഥശാല പ്രവർത്തകരായ ആർ വിജയരാജൻ, ആർ മണിരാജൻ, ഉബൈദ് കല്ലമ്പലം, എസ് രവീന്ദ്രൻ, വി സജീവ് എന്നിവരെ ചടങ്ങിൽ ആദരിച്ചു. ലൈബ്രറി പ്രസിഡന്റ് കെ സുധാകരൻ സ്വാഗതവും എം കെ രാധാകൃഷ്ണൻ നന്ദിയും പറഞ്ഞു.
ചിത്രം
പുല്ലൂർമുക്ക് ദേശീയഗ്രന്ഥശാലയുടെ പ്ലാറ്റിനംജൂബിലി ആഘോഷങ്ങളുടെ ഉദ്ഘാടനം ഉന്നതവിദ്യാഭ്യാസ മന്ത്രി ഡോ ആർ ബിന്ദു ഉദ്ഘാടനം ചെയ്യുന്നു
