പാര്‍ട്‍ണര്‍മാരെ വെച്ച് ബിസിനസ് തുടങ്ങി നിരവധി പേര്‍ വിജയിച്ചിട്ടുണ്ടെങ്കിൽ, തല്ലിപ്പിരിഞ്ഞ് പാര്‍ട്ണര്‍ഷിപ്പ് മാത്രമല്ല ബിസിനസ് തന്നെ വേണ്ടെന്ന് വച്ചവരുമുണ്ട്. മറ്റ് ചിലര്‍ക്ക് ഒരിക്കലും ഉണങ്ങാത്ത മുറിവായിരിക്കും പാര്‍ടണര്‍ഷിപ്പിൽ നിന്ന് സംഭവിച്ച നഷ്ടം.
ബിസിനസിലെ മൊത്തം ലാഭവുമായി പങ്കാളി മുങ്ങിയാലോ? അതും കടുത്ത നിരാശയിലേക്കും നഷ്ടങ്ങളുടെ മാത്രം കണക്കെടുപ്പിലേക്കും തള്ളി വിടും. എന്നാൽ ഈ ചതിയെയും വളരാനുള്ള മികച്ച അവസരമാക്കി മാറ്റി പുതിയ ബിസിനസ് തുടങ്ങുന്നവരുണ്ട്.
നേരത്തെ നടത്തിയ ബിസിനസിൽ നിന്നുള്ള ഓരോ പാഠങ്ങളും ഉപയോഗിച്ച് ലക്ഷങ്ങളുടെയും പിന്നീട് കോടികളുടെയും ബിസിനസ് സാമ്രാജ്യം പടുത്തുയര്‍ത്തിയവര്‍. ഒരു പാര്‍ട്ണറുമില്ലാതെ പിന്നീട് ബിസിനസ് വിജയിപ്പിച്ച എത്രയോ പേര്‍.
തുടക്കത്തിൽ സംഭവിച്ച നഷ്ടത്തിൽ നിന്ന് ശതകോടികളുട ബിസിനസ് പടുത്തുയര്‍ത്തിയ ഒരു സംരംഭകനെ അറിയാം.
ചതിയിൽ നിന്ന് തുടക്കം
സ്വന്തമായി എന്തെങ്കിലും ഒരു ബിസിനസ് തുടങ്ങണമെന്ന ആഗ്രഹവുമായി നടക്കുന്ന ശശാങ്ക് പരാഞ്ജ്പെ എന്ന സംരംഭകനോട് ഒരു സുഹൃത്താണ് കെമിക്കൽ ബിസിനസിൻെറ സാധ്യതകളെ കുറിച്ച് പറയുന്നത്. 1984-ൽ ആയിരുന്നു അത്. വ്യാവസായിക രാസവസ്തുക്കൾക്ക് വലിയ ഡിമാൻഡ് ഉള്ളതിനാൽ ഈ രംഗത്ത് ബിസിനസ് വിജയിക്കുമെന്നും വൻ ലാഭം കൊയ്യാമെന്നുമായിരുന്നു വാഗ്ദാനം.
ബിസിനസ് ആശയം കൊള്ളാമെന്ന് തോന്നിയപ്പോൾ സിഎ പഠനം തന്നെ ഉപേക്ഷിച്ചു. ബിസിനസ് തുടങ്ങാൻ പണം ഇല്ലെന്നതായിരുന്നു സുഹൃത്തിൻെറ പ്രശ്നം. ഒരു പൊതുേമഖലാ ബാങ്കിൽ നിന്ന് ശശാങ്ക് കുറച്ച് തുക ലോൺ എടുത്തു. ഈ തുകക്ക് ഭൂമിയും അസംസ്കൃത വസ്തുക്കളും വാങ്ങി.
പരാഞ്ജ്പെ കെമിക്കൽ എന്ന പേരിലെ സംരംഭം ഇരുവരും ലാഭകരമായി നോക്കി നടത്തി. ഓര്‍ഡറുകളും പെയ്മൻറ് ഇടപാടുകളും കൈകാര്യം ചെയ്യുന്നത് സുഹൃത്ത് തന്നെ. കൃത്യമായി തന്നെ പെയ്മൻറുകൾ ലഭിക്കുന്നതിനാൽ സംശയവും തോന്നിയില്ല. അങ്ങനെയിരിക്കുമ്പോഴാണ്, ഒരു ഓര്‍ഡര്‍ ലഭിച്ചിട്ടുണ്ട്, മുഴുവൻ അസംസ്കൃത വസ്തുക്കളും ഉടൻ തന്നെ കയറ്റി അയക്കണം എന്ന് പറഞ്ഞ് സുഹൃത്ത് വിളിക്കുന്നത്. പണം വൈകും എന്നും പറഞ്ഞു. ഗോഡൗണിൽ ഉണ്ടായിരുന്ന മുഴുവൻ സ്റ്റോക്കും സുഹൃത്ത് പറഞ്ഞതുപോലെ കയറ്റി അയച്ചു. എന്നാൽ സുഹൃത്ത് ലക്ഷങ്ങളുടെ സ്റ്റോക്കുമായി മുങ്ങി. ഒരു രൂപ പോലും കിട്ടിയതുമില്ല.
നേരിട്ടത് വൻ നഷ്ടം
പണം മുടക്കിയെങ്കിലും സുഹൃത്തിനെ പൂര്‍ണമായി ആശ്രയിച്ചായിരുന്നു ബിസിനസ് എന്നതിനാൽ ബിസിനസിൽ നിന്ന് പിന്നീടുണ്ടായ നഷ്ടം ഭീകരമായിരുന്നു. 30,000 രൂപയുടെ കെമിക്കൽ സ്റ്റോക്കുകൾ മാത്രമായിരുന്നു സുഹൃത്ത് പോയപ്പോൾ ബാക്കിയായത്. മനസ് മടുത്തെങ്കിലും ഉൽപ്പന്നങ്ങൾ വിൽക്കാൻ രണ്ട് മാർക്കറ്റിംഗ് പ്രൊഫഷണലുകളെ നിയമിച്ചു. പതിയെ പതിയെ നഷ്ടം മാറിത്തുടങ്ങി. മാന്യമായ വരുമാനം ലഭിച്ച് തുടങ്ങി. എല്ലാവരേയും വിശ്വസിക്കരുതെന്നും വിജയകരമായ ഒരു സംരംഭം നടത്താൻ സ്വന്തം കഴിവുകളെ ആശ്രയിക്കുകയാണ് ആദ്യം വേണ്ടതെന്നുമുള്ള വലിയ ബിസിവനസ് പാഠം പഠിച്ചത് ഇങ്ങനെയാണ് . ഒടുവിൽ 1.5 ലക്ഷം രൂപ വരെ വിറ്റുവരവ് ഒക്കെ എത്തിയെങ്കിലും വലിയ ലാഭകരമല്ലാത്ത കെമിക്കൽ രംഗം വിടാൻ തീരുമാനിച്ചു.
നിര്‍മാണ രംഗത്തേക്ക് ചുവടുമാറ്റം
ഒടുവിൽ നിര്‍മാണ രംഗത്തേക്ക് ചുവടുവയ്പ്. 1987-ൽ ആണ് പൂനെയിൽ 10,000 ചതുരശ്ര അടി വിസ്തീർണമുള്ള വിജനമായ ഒരു പ്ലോട്ട് ഉണ്ടെന്നറിയുന്നത്. ഇവിടെ ഒരു ഫ്ലാറ്റ് സമുച്ചയം നിർമ്മിക്കാൻ ആഗ്രഹിച്ച് ഉടമയെ കണ്ട് ഒരു ലക്ഷം രൂപ നൽകി. പ്രോജക്റ്റ് പൂർത്തിയായാൽ രണ്ട് ഫ്ലാറ്റുകൾ അവിടെ നൽകാമെന്ന് കരാറിൽ ഏർപ്പെട്ടു. നിർമ്മാണ പ്രവര്‍ത്തനങ്ങൾക്ക് ലോൺ എടുത്ത് പണം കണ്ടെത്താം എന്നായിരുന്നു ധാരണ എങ്കിലും ഫ്ലാറ്റ് ബുക്ക് ചെയ്തവരിൽ നിന്ന് അഡ്വാൻസ് പേയ്‌മെന്റ് ലഭിച്ചതിനാൽ ലോൺ എടുക്കേണ്ടി വന്നില്ല. പരാഞ്ജ്പെ സ്കീം കൺസ്ട്രക്ഷൻ എന്ന കമ്പനിയുടെ തുടക്കം അങ്ങനെയായിരുന്നു. ചെലവായത് ഒരു ലക്ഷം രൂപ. ആദ്യ പ്രോജക്ട് പൂര്‍ത്തിയാകും മുമ്പ് തന്നെ ഒരു ഫ്ലാറ്റിനായുള്ള ആവശ്യവുമായി ദമ്പതികൾ എത്തി. അടുത്ത അഡ്വാൻഡും കിട്ടി. 37 ഫ്സാറ്റുകൾ പണിതീര്‍ത്തപ്പോൾ ലഭിച്ചത് 20 ലക്ഷം രൂപയുടെ ലാഭം. അടുത്ത ഫ്ലാറ്റ് സമുച്ചയങ്ങൾ നിര്‍മാണം പൂര്‍ത്തിയാക്കി വിറ്റഴിച്ചതോടെ ലാഭം 80 ലക്ഷം രൂപയായി.
വിറ്റുവരവ് 2,000 കോടി രൂപയിലേറെ
മുംബൈയിൽ ആരംഭിച്ച പരാഞ്ജ്പെ ഗ്രൂപ്പിന് ഇന്ത്യ മുഴുവൻ ഇപ്പോൾ സാന്നിധ്യമുണ്ട്. 2,000 കോടി രൂപയിലേറെയാണ് വിറ്റുവരവ്. നിലവിൽ, മുംബൈ, പൂനെ, നാസിക്ക്, കോലാപ്പൂർ, രത്‌നഗിരി, ചിപ്ലൂൺ, ബാംഗ്ലൂർ എന്നിവിടങ്ങളിലായി നിരവധി പ്രോജക്ടുകൾ പൂര്‍ത്തിയാക്കി. 30 വര്‍ഷത്തിനിടെ 190-ഓളം പ്രോജക്ടുകൾ പൂര്‍ത്തിയാക്കി. വിറ്റുവരവ് 2000 കോടി രൂപയൊക്കെയായി പണ്ടേ ഉയര്‍ന്നിരുന്നു. പരഞ്ജപെ ഉപഭോക്താക്കളുടെ ഒരു കമ്മ്യൂണിറ്റിയും നിലവിൽ ഉണ്ട്..റെസിഡൻഷ്യൽ പ്രോജക്ടുകൾ മാത്രമല്ല, കൊമേഴ്‌സ്യൽ മേഖലയിലും ഇപ്പോൾ സസാന്നിധ്യമുണ്ട്. ഒരു പാര്‍ട്ണറുടെ ചതിയ്ക്ക് ഇരയായെങ്കിൽ എന്താ? പടുത്തുയര്‍ത്തിയത് ആ പാര്‍ട്ണര്‍ക്ക് സ്വപ്നം പോലും കാണാൻ ആകാത്ത ബിസിനസ് സാമ്രാജ്യം അല്ലെ?
