മാലിന്യം റോഡരികിൽ വലിച്ചെറിഞ്ഞവർക്ക് എതിരെ കർശന നിയമ നടപടി സ്വീകരിക്കുമെന്ന് വാർഡ് കൗൺസിലർ
ആറ്റിങ്ങൽ: നഗരസഭ എട്ടാം വാർഡ് കൊച്ചാലുംമൂട് ടോൾമുക്ക് റോഡിലാണ് രാത്രിയുടെ മറവിൽ സാമൂഹ്യവിരുദ്ധർ ഹോട്ടൽ മാലിന്യം വലിച്ചെറിഞ്ഞത്. നാട്ടുകാർ പരാതി അറിയിച്ചതിനെ തുടർന്ന് വാർഡ് കൗൺസിലറും ഡി.വൈ.എഫ്.ഐ ജില്ലാ വൈസ് പ്രസിഡന്റുമായ ആർ.എസ്.അനൂപ് സ്ഥലത്തെത്തി മാലിന്യ നിറച്ച കെട്ടുകൾ പരിശോധിച്ചു. ഒഴിഞ്ഞ പാൽ കവറുകളടക്കം ദുർഗന്ധം വമിക്കുന്ന തരത്തിലായിരുന്നു മാലിന്യ കെട്ടുകൾ കണ്ടെത്തിയത്. സമീപത്ത് സ്ഥാപിച്ചിരുന്ന സുരക്ഷാ ക്യാമറയിലൂടെ മാലിന്യം വലിച്ചെറിഞ്ഞ വ്യക്തിയെയും കൃത്യത്തിന് ഉപയോഗിച്ച വാഹനവും തിരിച്ചറിഞ്ഞു. നഗരസഭ ആരോഗ്യ വിഭാഗത്തിനും പോലീസിനും ദൃശ്യങ്ങളടക്കമുള്ള തെളിവുകൾ കൈമാറിയിട്ടുണ്ട്.
പട്ടണത്തിൽ സമ്പൂർണ മാലിന്യ നിർമ്മാർജ്ജനം നടപ്പിലാക്കുന്നതിന്റെ ഭാഗമായി ശുചീകരണ തൊഴിലാളികൾ വീടുകളിലും സ്ഥാപനങ്ങളിലും എത്തി ജൈവ അജൈവ മാലിന്യങ്ങൾ തരം തിരിച്ച് ശേഖരിക്കുന്ന സംവിധാനമാണ് നഗരസഭ നടപ്പിലാക്കിയിട്ടുള്ളത്. ഇത്തരം സംവിധാനങ്ങൾ ഉപയോഗിക്കാതെ പൊതു ഇടങ്ങളിൽ ചവറുകൾ നിക്ഷേപിക്കുന്നവർക്ക് എതിരെ കർശന നീയമ നടപടികൾ സ്വീകരിക്കുമെന്നും ആർ.എസ്.അനൂപ് അറിയിച്ചു.
