ചിറയിൻകീഴ് : ഒട്ടേറെ ക്രിമിനൽ കേസുകളിൽ പ്രതിയായി ഒളിവിൽ കഴിഞ്ഞിരുന്ന യുവാവടക്കം രണ്ടു പേർ വൻ കഞ്ചാവു ശേഖരവുമായി ചിറയിൻകീഴ് പൊലീസിന്റെ പിടിയിൽ. തിരുവനന്തപുരം പാച്ചല്ലൂർ പനവിള വീട്ടിൽ റിയാസ്(24), കോവളത്തിനു സമീപം പാച്ചല്ലൂർ പനത്തുറ പള്ളിനടവീട്ടിൽ രാഹുൽ(24)എന്നിവരെയാണു അഞ്ചുകിലോഗ്രാം കഞ്ചാവു പൊതിക്കെട്ടും സഞ്ചരിച്ചിരുന്ന വാഹനവുമടക്കം പെരുങ്ങുഴിയിൽ വാഹനപരിശോധനയ്ക്കിടെ പിടികൂടിയത്.
റൂറൽ എസ്പി പി.കെ.മധുവിനു ലഭിച്ച രഹസ്യസന്ദേശത്തിന്റെ അടിസ്ഥാനത്തിലായിരുന്നു വാഹനപരിശോധന നടത്തിയത്. പ്രതികൾ ലഹരിമരുന്നു കേസുകളിലും ക്രിമിനൽ കേസുകളിലും അനവധി തവണ പൊലീസ് പിടിയിലായിട്ടുള്ളവരാണ്.
തമിഴ്നാടിന്റെ അതിർത്തിഗ്രാമങ്ങളിൽ നിന്നാണു വ്യാപകതോതിൽ കഞ്ചാവ് തിരുവനന്തപുരം ജില്ലയിലെത്തിച്ചുവരുന്നതെന്നു പ്രതികൾ പറഞ്ഞു. ചിറയിൻകീഴ് മേഖലയിൽ വ്യാപകമായ തോതിൽ കഞ്ചാവ് വിതരണം നടത്തിവന്ന സംഘത്തിലെ അംഗങ്ങളാണ്. ഇരുചക്രവാഹനങ്ങളിലാണു വിൽപ്പന.
കിലോയ്ക്കു 5000രൂപയ്ക്കു തമിഴ്നാട്ടിൽ നിന്നു വിലയ്ക്കു വാങ്ങുന്ന കഞ്ചാവ് നാട്ടിൽ കൈമാറ്റം ചെയ്യപ്പെടുമ്പോൾ 40,000രൂപയാണു ലഭിക്കുക. കഴിഞ്ഞ ദിവസം ജില്ലയിൽ നിന്നുള്ള രണ്ടംഗ ബൈക്ക് സംഘത്തിൽ നിന്നു 12കിലോഗ്രാം കഞ്ചാവുമായി തമിഴ്നാട് പൊലിസും ഏഴു കിലോഗ്രാം കഞ്ചാവുമായി രണ്ടുപേരെ മംഗലപുരം പൊലീസും കഴിഞ്ഞ ആഴ്ച അറസ്റ്റു ചെയ്തിരുന്നു.
ചോദ്യം ചെയ്യലിൽ പ്രതികളിൽ നിന്നു ലഭ്യമായ സൂചനകൾ വച്ചു കഞ്ചാവടക്കം ലഹരിവസ്തുക്കൾ കൈമാറുന്ന സംഘത്തെക്കുറിച്ചു വ്യക്തമായ വിവരങ്ങൾ ലഭ്യമായതായി പൊലീസ് അറിയിച്ചു.
ചിറയിൻകീഴ് എസ്എച്ച്ഒ ജി.ബി.മുകേഷ്, എസ്ഐ വിയഎസ്.വിനീഷ്, എഎസ്ഐ ഷജീർ, തിരു.റൂറൽ ഡാൻസാഫ് എസ്ഐ എം.ഫിറോസ്ഖാൻ എന്നിവരടങ്ങുന്ന പൊലീസ് സംഘമാണ് പ്രതികളെ പിടികൂടിയത്. വർക്കലകോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. പ്രതികളിൽ നിന്നും പിടിച്ചെടുത്ത കഞ്ചാവിനു വിപണിയിൽ അഞ്ചുലക്ഷത്തോളം രൂപ വിലവരുമെന്നും പൊലീസ് അറിയിച്ചു.
